ខំជិះឡានឈ្នួលពីខេត្ត មកដល់ភ្នំពេញ លួចគេបានច្រើនដង តែលើកនេះជាប់អន្ទា.ក់
- ភ្នំពេញ
រាជធានីភ្នំពេញ ៖ ជនសង្ស័យម្នាក់រស់នៅក្នុងខេត្តកំពង់ធំ ហើយកន្លងមកតែងតែជិះរថយន្តឈ្នួល
រាជធានីភ្នំពេញ ៖ ជនសង្ស័យម្នាក់រស់នៅក្នុងខេត្តកំពង់ធំ ហើយកន្លងមកតែងតែជិះរថយន្តឈ្នួលពីផ្ទះ មកធ្វើសកម្មភាពលួចម៉ូតូនៅភ្នំពេញបានសម្រេចជាច្រើលើករួចមកហើយ ពុំត្រូវដែលសមត្ថកិច្ចឃាត់ខ្លួនបានម្ដងណាឡើយ ។ លុះថ្ងៃទី១០ ខែឧសភា ឆ្នាំ២០២៤ ជិះរថយន្តឈ្នួលពីផ្ទះនៅឯខេត្តកំពង់ធំមកភ្នំពេញដើម្បីរកលួចម៉ូតូទៀត ហើយនៅវេលាម៉ោង១២និង៣៥នាទីរសៀលថ្ងៃដដែល បានចូលទៅធ្វើសកម្មភាពលួចម៉ូតូ១គ្រឿង នៅក្នុងភូមិចែងម៉ែង សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ។
ប៉ុន្តែលើកនេះពិតជាស៊យខ្លាំងណាស់ត្រូវអស់លក្ខណ៍ ត្រូវកូនស្រីម្ចាស់ម៉ូតូដែលកន្លងមកធ្លាប់រងគ្រោះបាត់ម៉ូតូស៊េរីទំនើប២គ្រឿងរួចមកហើយនោះឃើញទាន់ ស្រាប់តែជនសង្ស័យព្យាយាមរត់គេចខ្លួន ។ ពេលនោះបុរសជាម្ចាស់ម៉ូតូបានហៅកម្លាំងប្រជាការពារតាមវិទ្យុទាក់ទងឲ្យទៅជួយដេញតាមឃាត់បានភ្លាមៗ និងឆែករកឃើញឧបករណ៍សម្រាប់កាច់សោ ក ម៉ូតូ១ដើមផងដែរ។
ជនសង្ស័យម្នាក់នោះឈ្មោះផុន វ៉ាន់ឌី អាយុជាង២៧ឆ្នាំ មានទីលំនៅក្នុងខេត្តកំពង់ធំ គឺជាមុខសញ្ញាចាស់ ដែលកន្លងមកធ្លាប់ធ្វើសកម្មភាពលួចម៉ូតូបានសម្រេច៤ទៅ៥ដងមកហើយ ។ លើកចុងក្រោយនិងជាប់អន្ទាក់នេះបានលួចម៉ាកហុងដាឌ្រីមស១២៥ ស៊េរីឆ្នាំ២០១៨ ពណ៍ខ្មៅពាក់ស្លាកលេខភ្នំពេញ 1GX-7443 ដែលជាកម្មសិទ្ធិរបស់បុរសម្នាក់ឈ្មោះ ស្ដើង រឿង អាយុ៧៥ឆ្នាំ មានទីលំនៅផ្ទះកើតហេតុខាងលើ ។
បើតាមស្ត្រីឈ្មោះរឿង សុខចាន់ អាយុ៤២ឆ្នាំ មុខរបរលក់ចាប់ហួយនៅផ្ទះជាប់កន្លែងកើតហេតុនោះបាននិយាយថា គាត់គឺជាកូនស្រីរបស់ម្ចាស់ម៉ូតូខាងលើ ហើយនៅមុនពេលកើតហេតុឪពុកគាត់បានទុកម៉ូតូនៅក្នុងផ្ទះ រួចបានដាក់ប៉ូវអ៊ីដេកក្បែនោះដែរ ។ ក្រោយមកស្រាប់តែឃើញជនសង្ស័យខាងលើទៅរកទិញនំ និង មី នៅផ្ទះគាត់ហើយទិញហើយទិញទៀតចំនួន៤ដង ម្យ៉ាងទៀតរាល់ពេលទៅទិញនំ និងមីម្ដងៗក្រឡេកមើលឆ្វេងស្ដាំ សព្វទីកន្លែងនិងមើលម៉ូតូឪពុកគាត់ជាញឹកញាប់ថែមទៀត។
ស្ត្រីរូបនោះបានប្រាប់ឲ្យដឹងបន្តទៀតថា គាត់មានការសង្ស័យមិនហ៊ានដើរទៅណានោះទេចាំមើលក្រែងជននោះគឺជាចោរ ព្រោះកាលពីពេលថ្មីៗកន្លងមកនេះ គាត់ធ្លាប់បាត់ម៉ូតូអស់២គ្រឿងរួចមកហើយរកមុខចោរមិនទាន់ឃើញនៅឡើយ ។ លុះក្រោយមកស្រាប់តែជនសង្ស័យខាងលើបានចូលទៅក្នុងផ្ទះឪពុកគាត់ រួចចាប់កាន់ដៃចង្កូតនិងក្បាលម៉ូតូប្រុងកាច់សោ ក ម៉ូតូ ប៉ុន្តែគាត់ទៅទាន់ ជនសង្ស័យបានរត់ចេញ ហើយឪពុកគាត់ក៏បានហៅកម្លាំងប្រជាការពារដេញតាមឃាត់បានភ្លាមៗតែម្ដង។
គាត់បានរៀបរាប់ប្រាប់ឲ្យដឹងបន្ថែមទៀតថា នៅក្នុងឆ្នាំ២០២៤នេះ គាត់បានបាត់ម៉ូតូជាបន្តបន្ទាប់ចំនួន២គ្រឿងរួចមកហើយ គឺនៅក្នុងអំឡុងខែកុម្ភៈ បាត់១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០២១ ពណ៍ខ្មៅ ។ លុះ១ខែក្រោយមកគឺនៅក្នុងខែមិនា បានបាត់ម៉ូតូ១គ្រឿងទៀតម៉ាកហុងដាឌ្រីមសេ១២៥ ស៊េរីឆ្នាំ២០២២ ពណ៍ខ្មៅ ហើយគាត់ពុំដឹងថាត្រូវជនសង្ស័យរូបនោះជាអ្នកលួច ឬ ក៏ជាអ្នកផ្សេងនោះឡើយ។
ក្រោយពេលចាប់ខ្លួនប្រជាពលរដ្ឋសួរនាំជនសង្ស័យខាងលើ ហើយជននេះបាននិយាយថា ខ្លួនបានជិះរថយន្តឈ្នួលមកពីខេត្តកំពង់ធំដើម្បីធ្វើសកម្មភាពលួចម៉ូតូនៅភ្នំពេញ ហើយមានបំណងថាពេលលួចបានខ្លួននិងជិះយកទៅកាន់ខេត្តកំពង់ធំវិញតែម្ដង។ បន្ទាប់មកក៏បានចូលទៅធ្វើសកម្មភាពលួចនៅក្នុងផ្ទះខាងលើ ប៉ុន្តែមិនបានសម្រេចក៏ត្រូវប្រជាការពារភូមិឃាត់ខ្លួន ហើយកន្លងមកខ្លួនធ្លាប់លួចបានសម្រេច៣ទៅ៤ដងរួចមកហើយដែរ ៕
ចែករំលែកព័តមាននេះ