រាជធានីភ្នំពេញ ៖ នៅមុននេះបន្តិច កម្លាំងសមត្ថកិច្ចនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃ នារសៀលថ្ងៃទី២៦ ខែមេសា ឆ្នាំ២០២៤ បានចាប់ឃាត់ខ្លួនបញ្ជូនថៅកែធ្វើអាជីវកម្មបូមខ្សាច់សមុទ្រលក់នៅក្រុងព្រះសីហនុ បញ្ជូនទៅសាលាដំបូងរាជធានីភ្នំពេញ ពាក់ព័ន្ធពីបទ.ឆបោក…
រាជធានីភ្នំពេញ ៖ នៅមុននេះបន្តិច កម្លាំងសមត្ថកិច្ចនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃ នារសៀលថ្ងៃទី២៦ ខែមេសា ឆ្នាំ២០២៤ បានចាប់ឃាត់ខ្លួនបញ្ជូនថៅកែធ្វើអាជីវកម្មបូមខ្សាច់សមុទ្រលក់នៅក្រុងព្រះសីហនុ បញ្ជូនទៅសាលាដំបូងរាជធានីភ្នំពេញ ពាក់ព័ន្ធពីបទ.ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន ពោលគឺចាយសែកស្អុយប្រមាណ១០ម៉ឺនដុល្លារអាមេរិក ។
ជនសង្ស័យមានឈ្មោះ ផាត់ ផា ភេទប្រុស អាយុ៣៩ឆ្នាំ មុខរបរធ្វើអាជីវកម្មបូមខ្សាច់សមុទ្រលក់ ស្នាក់នៅក្នុងភូមិលេខ១ សង្កាត់លេខ២ ក្រុង.ខេត្តព្រះសីហនុ ។ ការចាប់ឃាត់ខ្លួនជនសង្ស័យថៅកែបូមខ្សាច់សមុទ្រខាងលើនេះ គឺសមត្ថកិច្ចបានធ្វើឡើងនៅក្រុងព្រះសីហនុ ដោយអនុវត្តតាមដីកាបង្គាប់ឲ្យនាំខ្លួនលេខ២៤៤«ក១»ដចន ចុះថ្ងៃទី២០ ខែមីនា ឆ្នាំ២០២៤ របស់លោក ហុក ពៅ ចៅក្រមស៊ើសួរសាលាដំបូងរាជធានីភ្នំពេញ ។
ដើមចមនៃការនាំខ្លួនជនសង្ស័យសមត្ថកិច្ចបានបង្ហើបឲ្យដឹងថា យោងតាមដីកាបង្គាប់ឲ្យនាំខ្លួនរបស់ចៅក្រមស៊ើបសួរបានបញ្ជាក់ថា តំណាងអយ្យការអមសាលាដំបូងរាជធានីភ្នំពេញបានសម្រេចធ្វើការចោទប្រកាន់សំណុំរឿងឈ្មោះផាត់ ផា ពីបទ«ឆបោក និងបទមិនបំពេញកតព្វកិច្ចចំពោះឧបករណ៍ដែលអាចជួញដូរបាន» ប្រព្រឹត្តនៅរាជធានីភ្នំពេញកាលពីឆ្នាំ២០២១ ដល់ឆ្នាំ២០២២ តាមបញ្ញាតមាត្រា៣៧៧ មាត្រា៣៧៨ នៃក្រមព្រហ្មទណ្ឌ និងមាត្រា២៣១ នៃច្បាប់ស្ដីពីឧបករណ៍ដែលអាចជួញដូរបាន និងប្រតិការទូទាត់សងប្រាក់ ដែលកន្លងមក ជននេះបានគេចវេសមិនព្រមចូលខ្លួន តាមដីការបញ្ជាររបស់ស្ថាប័នអយ្យការ ក៏ដូចជាដីកាបង្គាប់ឲ្យចូលខ្លួនរបស់ចៅក្រមសើបសួរឡើយ ។
ដូច្នេះ ដើម្បីធានាដល់ការស៊ើបសួរឲ្យបានពេញលេញ និងបំភ្លឺការពិតនៃរឿងគប្បីចៅក្រមស៊ើបសួរ សម្រេចចេញដីកាបង្គាប់ឲ្យសមត្តកិច្ចនាំខ្លួនជនសង្ស័យខាងលើ ស្របតាមមាត្រា១៨៩ និងមាត្រា១៩០ នៃក្រមនីតិវិធីព្រហ្មទណ្ឌ ។ សមត្ថកិច្ចបង្ហើបឲ្យដឹងទៀតថា នៅក្នុងអំឡុងឆ្នាំ២០២១ ដល់ឆ្នាំ២០២៣ ជនសង្ស័យបានលួងលោមភាគីដើមបណ្តឹងខ្ចីប្រាក់ប្រមាណ១០ម៉ីនដុល្លារអាមេ
រិក ដើម្បីយកទៅដាក់ទុនធ្វើអាជីវកម្មបូមខ្សាច់សមុទ្រលក់ ។
ពេលនោះ ជនសង្ស័យក៏បានប្រើប្រាស់មូលប្បទានប័ត្រ«សែក»២សន្លឹក សែកទី១-ទឹកប្រាក់៤ម៉ឺនដុល្លារអាមេរិក សែកទី២-មានទឹកប្រាក់៦ម៉ឺនដុល្លារអាមេរិក សរុបទាំងពីរលើកប្រមាណ១០ដុល្លារអាមេរិក ដោយដាក់ដម្កល់នៅធនាគារ ទុកសម្រាប់ទូទាត់ជាមួយម្ចាស់បំណុល ។ លុះដល់ថ្ងៃកំណត់ជនរងគ្រោះបានទៅបើកយកប្រាក់នោះ ស្រាប់តែខាងធនាគារឆ្លើយតបវិញថា មូលប្បទានប័ត្រខាងលើនេះ គ្មានសាច់ប្រាក់ទេ ពោលគឺ«សែកស្អុយ»។
បន្ទាប់ពីដឹងថា ជនសង្ស័យបានប្រើប្រាស់សែកស្អុយហើយ ជនរងគ្រោះក៏ទាក់ទងទៅកូនបំណុល ដើម្បីជួបនិយាយគ្នាក្រៅប្រព័ន្ធតុលាការ តែជនសង្ស័យគេចវេស និងចេះតែសន្យាសុំពន្យារពេល
រហូតដូច្នោះហើយ ទើបជនរងគ្រោះសម្រេចចិត្តប្តឹងសមត្ថកិច្ចឲ្យចាត់ការតាមផ្លូវច្បាប់ ។
ក្រោយពីបញ្ចប់ការសាកសួរ សំណុំរឿងថៅកែអាជីវកម្មបូមខ្សាច់សមុទ្រលក់ នារសៀលថ្ងៃដដែលនេះ លោក ហុក ពៅ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនជនសង្ស័យដាក់ពន្ធនាគារ រាជធានីភ្នំពេញ PJ ជាបណ្តោះអាសន្ន ៕
ចែករំលែកព័តមាននេះ