លួចម៉ូតូបានសម្រេច អស់លក្ខណ៍ត្រឹមប្រព័ន្ធ GPS
រាជធានីភ្នំពេញ ៖ ជនសង្ស័យចំនួន៣នាក់ បានធ្វើសកម្មភាពលួចយកម៉ូតូពីនារីម្នាក់ បានសម្រេច រួចគេចខ្លួនបាត់ ដោយពុំបានដឹងថា ម៉ូតូនោះមានភ្ជាប់ប្រព័ន្ធតាមដានសុវត្ថិភាព GPS ឡើយ…
រាជធានីភ្នំពេញ ៖ ជនសង្ស័យចំនួន៣នាក់ បានធ្វើសកម្មភាពលួចយកម៉ូតូពីនារីម្នាក់ បានសម្រេច រួចគេចខ្លួនបាត់ ដោយពុំបានដឹងថា ម៉ូតូនោះមានភ្ជាប់ប្រព័ន្ធតាមដានសុវត្ថិភាព GPS ឡើយ…
រាជធានីភ្នំពេញ ៖ ជនសង្ស័យចំនួន៣នាក់ បានធ្វើសកម្មភាពលួចយកម៉ូតូពីនារីម្នាក់ បានសម្រេច រួចគេចខ្លួនបាត់ ដោយពុំបានដឹងថា ម៉ូតូនោះមានភ្ជាប់ប្រព័ន្ធតាមដានសុវត្ថិភាព GPS ឡើយ ហើយក្រោយមក បាននាំគ្នាទៅជួបជុំគ្នានៅកន្លែងលក់ទឹកត្នោតជូរមួយកន្លែង ក៏ត្រូវបាននគរបាលទៅដល់ល្មម រួចឃាត់ខ្លួនបានទាំងសម្បុកតែម្ដង ។
ហេតុការណ៍នេះ បានកើតឡើង កាលពីវេលាម៉ោង៥និង៥នាទីព្រឹកថ្ងៃទី២៤ ខែមេសា ឆ្នាំ២០២៤ នៅចំណុចបន្ទប់ជួល ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យទាំង៣នាក់ រួមមាន ៖
១. ឈ្មោះ ចាន់ សុផាណា អាយុ២៤ឆ្នាំ
២. ឈ្មោះ ថុន បញ្ញា អាយុ២៦ឆ្នាំ
និង៣. ឈ្មោះ សឿន សុខ ជា អាយុ២៧ឆ្នាំ ។
ជនសង្ស័យទាំង៣នាក់នេះ ស្នាក់នៅក្នុងភូមិកើតហេតុខាងលើ ។
នគរបាលដកហូតបាន ៖ ពិលឆក់ ពណ៌ខៀវ១ដើម សោរអក្សរតេ០១ដើម ដែកកែច្នៃសម្រាប់ឆ្កឹះសោម៉ូតូ១ និងទូរសព្ទដៃម៉ាកណូគា១គ្រឿង ។
ម្ចាស់ម៉ូតូឈ្មោះ ម.ស.ន ភេទស្រី អាយុ២១ឆ្នាំ ស្នាក់នៅបន្ទប់ជួល ភូមិកន្លែងកើតហេតុ និងមានស្រុកកំណើតនៅខេត្តព្រៃវែង។ ចំណែកម៉ូតូរបស់នាង ម៉ាក Honda Beat ពណ៌សលាយខៀវ ពាក់ស្លាកលេខភ្នំពេញ 1KK-6359 ។
តាមប្រភពព័ត៌មាន បានឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូម៉ាកហុងដាប៊ីត ពណ៌ខៀវ ស្លាកលេខ ភ្នំពេញ1KK-6359 នៅមុខបន្ទប់ផ្ទះជួល ដែលនាងស្នាក់នៅរួចចូលសម្រាកនៅក្នុងបន្ទប់ជួល និងដេកលង់លក់រយៈពេលប្រមាណ៣០នាទី។ លុះពេលក្រោកពីដំណេក ស្រាប់តែបាត់ម៉ូតូ នាងក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី៣ ដោយបានប្រាប់ថា ម៉ូតូរបស់នាងមានភ្ជាប់ប្រព័ន្ធ តាមដានសុវត្ថិភាព GPS ។
ប្រភពដដែល បានប្រាប់ឲ្យដឹងបន្តទៀតថា ក្រោយពីទទួលពាក្យបណ្ដឹងរបស់នាងរងគ្រោះរួចហើយ កម្លាំងនគរបាលក៏បានធ្វើការស្រាវជ្រាវតាមប្រព័ន្ធ GPS នោះ និងកំណត់បានទីតាំងលាក់ខ្លួនរបស់ក្រុមចោរ។ ទើបឈានដល់ការឃាត់ខ្លួនបានទាំងសម្បុកនៅចំណុចកន្លែងលក់ទឹកត្នោតជូរមួយកន្លែង ដែលមានទីតាំងស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បន្ទាប់មកបាននាំខ្លួនធ្វើការសាកសួរ ។
ប្រភពខាងលើបានបញ្ជាក់ប្រាប់ទៀតថា ជនសង្ស័យឈ្មោះ ចាន់ សុផាណា និងឈ្មោះ ថុន បញ្ញា បានឆ្លើយសារភាពថា ខ្លួនធ្លាប់ជាប់ពន្ធធានាគារព្រៃ.ស ចំនួន០៨ខែ ក្នុងបទល្មើសគ្រឿងញៀន និងចោរកម្ម ហើយធ្លាប់ជាប់នៅមណ្ឌលកែប្រែផងដែរ។
ចំណែកជនសង្ស័យឈ្មោះ សឿន សុខជា បានឆ្លើយសារភាព ខ្លួនថាធ្លាប់ជាប់ពន្ធធានាគារចំនួន ០៨ខែ នៅខេត្តព្រៃវែង និងធ្លាប់ជាប់នៅមណ្ឌលកែប្រែគ្រឿងញៀននៅខេត្តបន្ទាយមានជ័យ១ដង និងជាប់នៅមណ្ឌលកែប្រែគ្រឿងញៀនឈ្មួញ០១ដង។ នគរបាលក៏បានប្រគល់ម៉ូតូម៉ាកហុងដាប៊ីត ពណ៌ខៀវ ជូនទៅឲ្យនាងជនរងគ្រោះវិញហើយដែរ ៕
ចែករំលែកព័តមាននេះ