ទីក្រុងយេរូសាឡឹម៖ ប្រធានក្រុមស៊ើបការណ៍សម្ងាត់របស់អ៊ីស្រាអែលប្រកាសចុះចេញពីតំណែងព្រោះមិនអាចទប់ស្កាត់ផែនការវាយប្រហាររបស់ក្រុមហាម៉ាស់កាលពីថ្ងៃទី៧ ខែតុលា ឆ្នាំ២០២៣ ដែលនាំឱ្យស្លាប់មនុស្ស១២០០នាក់ និងចាប់ពង្រត់២៥០នាក់។ កាលនោះ ក្រុមហាម៉ាស់វាយប្រហារជើងគោក ជើងទឹក ជើងអាកាស…
ទីក្រុងយេរូសាឡឹម៖ ប្រធានក្រុមស៊ើបការណ៍សម្ងាត់របស់អ៊ីស្រាអែលប្រកាសចុះចេញពីតំណែងព្រោះមិនអាចទប់ស្កាត់ផែនការវាយប្រហាររបស់ក្រុមហាម៉ាស់កាលពីថ្ងៃទី៧ ខែតុលា ឆ្នាំ២០២៣ ដែលនាំឱ្យស្លាប់មនុស្ស១២០០នាក់ និងចាប់ពង្រត់២៥០នាក់។ កាលនោះ ក្រុមហាម៉ាស់វាយប្រហារជើងគោក ជើងទឹក ជើងអាកាស និងបាញ់រ៉ុកកែតជាង៥ពាន់គ្រាប់។
គេគិតថាក្រោយការលាលែងរបស់ឧត្ដមសេនីយ៍អាហារ៉ូន ហាលីវ៉ា (Aharon Haliva) ប្រហែលជាមានអ្នករបូតតំណែងរពុយៗជាបន្តទៀតព្រោះនេះជារឿងធំណាស់ មិនអាចលេងសើចបានឡើយ។ អ៊ីស្រាអែលពិតជាមានអារម្មណ៍អាម៉ាស់មុខយ៉ាងខ្លាំងដែលក្រុមហាម៉ាស់តូចតែមួយមិនដឹងពួកគេបានគ្រាប់រ៉ុកកែតមកពីណាអីក៏ច្រើនម៉្លេះបាញ់សម្រុកទៅលើអ៊ីស្រាអែល?
នៅក្នុងលិខិតលាលែងពីតំណែងនោះ លោកមេចារកម្មរូបនេះទទួលស្គាល់អំពីចំណុចខ្វះខាតដែលក្រុមការងាររបស់លោកមិនអាចចាត់វិធានការប្រកបដោយប្រសិទ្ធភាពខ្ពស់។ អីចឹងហើយបានជាក្រុមហាម៉ាស់អាចវាយប្រហារទៅលើមហាអំណាចនៅតំបន់មជ្ឈិមបូព៌ាមួយនេះបានសម្រេច។ លោកសោកស្ដាយ។ មិនគួរណាថ្នាក់លើខំផ្ញើសេចក្ដីទុកចិត្តដូចឃ្មុំផ្ញើសំបុកទុកចិត្តបង្គង បែរជាក្រុមរបស់លោកធ្វើឱ្យគេខកបំណងអស់រលីង។ ខកនេះមិនមែនខកតិចតួចទេ ធ្វើឱ្យមនុស្សខកចិត្តមួយនគរ។
រឿងនេះជារឿងរបស់ជាតិថែមទៅទៀត។ ដូច្នេះធំធេងណាស់។ លោកនឹងដេកឱបទុក្ខសោកជារៀងរហូត។ វិប្បដិសារីជេរស្ដីលោកអស់មួយជីវិត។ នឹកឃើញរឿងនេះកាលណាឱរាពើតផ្សាបៀមទុករីងរៃនៅក្នុងចិត្តឥតល្ហែល្ហើយ។ ខាងលើនេះជាអ្វីដែលលោកសរសេររៀបរាប់នៅក្នុងសារលិខិតលាលែងពីតំណែង។ ស្ដាប់ទៅលន្លង់លន្លោចសឹងតែស្រក់ទឹកភ្នែកម្ដងៗ។
លោកហាលីវ៉ានឹងបន្តកាន់តំណែងជាមេចារកម្មស្ដីទីជាបណ្ដោះអាសន្នរហូតដល់មានអ្នកមកជំនួសថ្មី។ ប៉ុន្តែគេគិតថាភារកិច្ចសំខាន់ៗប្រហែលជាគេដកហូតអស់ហើយ។ គ្រាន់តែគេឱ្យគាត់អង្គុយនៅកន្លែងធ្វើការកុំឱ្យទំនេរកៅអីតែប៉ុណ្ណោះ។ មានន័យថាជាមុខមុខតំណែងខ្យល់។ គាត់ថាគាត់ចង់ចុះពីតំណែងយូរមកហើយតាំងពីក្រោយព្រឹត្តិការណ៍ថ្ងៃទី៧ ខែតុលាមកម៉្លេះ។
ប៉ុន្តែគ្រាន់តែក្រុមហាម៉ាស់ទើបតែវាយប្រហារពីថ្ងៃមិនទាន់ប៉ុន្មានម៉ោងផងស្រាប់តែយប់ឡើងអ៊ីស្រាអែលពន្លះមួយក្ឌាំងទៅលើតំបន់ហ្កាហ្សាបណ្ដាលឱ្យស្លាប់មនុស្សជាង៥០០នាក់ត្រឹមតែមួយយប់។ ស្ថានការណ៍បន្ទាន់បែបនេះធ្វើឱ្យមេចារកម្មអ៊ីស្រាអែលរកដកឃ្លាមិនរួច។ ម៉្លោះហើយត្រូវតែជម្រុលដំណើរការងាររបស់គាត់ទៅមុខទៀតព្រោះជាតិកំពុងត្រូវការគាត់។
ក្រោយមក គាត់គិតថាប្រហែលនៅតទៅទៀតមិនកើតទេនៅពេលរដ្ឋាភិបាលចាប់ផ្ដើមស៊ើបអង្កេតផ្ទៃក្នុង។ ការប្រកាសលាលែងពីតំណែងនេះកើតឡើងចំពេលជនជាតិជ្វីបចាប់ផ្ដើមឈប់សម្រាកវិស្សមកាល និងក៏ស្របពេលដែលអ៊ីស្រាអែលចាប់ផ្ដើមវាយប្រហារចូលតំបន់រ៉ាហ្វាជាបណ្ដើរៗហើយ។ ទោះបីនរណាឱ្យយោបល់យ៉ាងណាក៏អ៊ីស្រាអែលមិនព្រមស្ដាប់ដែរ។
ការលាលែងពីតំណែងរបស់មេចារកម្មថ្នាក់ជាតិនៅក្នុងកាលៈទេសៈនេះពិតជាសញ្ញាមិនល្អទាល់តែសោះ។ ពោលគឺលាលែងចំពេលសង្គ្រាមដើរដល់ចំណុចរបត់ថ្មី និងមានលក្ខណៈស្មុគស្មាញជាងមុន។ នៅទល់ដែនរវាងអ៊ីស្រាអែល និងលីបង់ ក្រុមហេស្បូឡាក៏កំពុងវាយយ៉ាងរន្ថើនផងដែរ។ ម៉្យាងទៀត អ៊ីស្រាអែល និងអ៊ីរ៉ង់នៅបន្តសង្គ្រឺតធ្មេញដាក់គ្នានៅឡើយទេ។
អ្នកជំនាញខាងវិស័យការពារជាតិយល់ថាការដែលមន្ត្រីចារកម្មលាលែងពីតំណែងនៅក្នុងស្ថានភាពបែបនេះមិនល្អទាល់តែសោះព្រោះប្រទេសជាតិកំពុងតែហ៊ុមព័ទ្ធដោយសត្រូវជុំទិស។ នៅពេលកំពុងត្រូវការកម្លាំងដើម្បីជ្រួយស្រោចស្រង់ជោគវាសនា-អនាគតរបស់ជាតិ យើងបែរជាលាលែងដើម្បីយករួចខ្លួន។ វាជាការបង្ហាញនូវភាពកម្សោយឱ្យសត្រូវ ឬក្រុមអ្នកដែលចាំតែជាន់ពន្លិចសើចចម្អក។ ប៉ុន្តែពាក្យទំនឹមទំនៀមមួយឃ្លាពោលថា «បើគ្មានភ្លើងក៏គ្មានផ្សែងដែរ»។ បើមេចារកម្មរូបនេះមិនទទួលរងការជេរប្រទេចផ្ដាសាឡើងបោរមុខទេ គាត់ក៏មិនលាលែងពីតំណែងដែរ។
ធម្មតាមនុស្សយើងស្រឡាញ់អំណាចសឹងស្លាប់។ រឿងអីនៅសុខៗចុះពីតំណែង។ កុំថាឡើយដល់អំណាចនៅក្នុងស្ថាប័នរបស់រដ្ឋ សូម្បីតែតួនាទី និងមុខតំណែងកំប៉ិកកំប៉ុកនៅក្នុងវិស័យឯកជនក៏អ្នកខ្លះមិនចង់ចុះចេញផង។ រឿងនេះច្បាស់ណាស់។ ឧត្ដមសេនីយ៍ហាលីវ៉ា និងមន្ត្រីក្រោមឱវាទរបស់គាត់ពេលខ្លះក្រពុលមុខខ្លាំងពេកនិយាយត្រង់ៗជាសាធារណៈដើម្បីឱ្យធូរទ្រូងខ្លះ។ ពួកគេប្រាប់ថាខ្លួនទទួលរងការស្ដីបន្ទោសធ្ងន់ៗណាស់ពីបទបណ្ដោយឱ្យក្រុមហាម៉ាស់វាយប្រហារអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣៕
ចែករំលែកព័តមាននេះ