ខេត្តប៉ៃលិន ៖ រហូតមកដល់ថ្ងៃទី២៣ ខែមេសា ឆ្នាំ២០២៤នេះ គេសង្កេតឃើញលោកយាយវ័យចំណាស់ម្នាក់ ដែលពិការដៃជើងកំពុងអង្គុយសុំទានគេនៅក្នុងផ្សារព្រំ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ…
ខេត្តប៉ៃលិន ៖ រហូតមកដល់ថ្ងៃទី២៣ ខែមេសា ឆ្នាំ២០២៤នេះ គេសង្កេតឃើញលោកយាយវ័យចំណាស់ម្នាក់ ដែលពិការដៃជើងកំពុងអង្គុយសុំទានគេនៅក្នុងផ្សារព្រំ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមការរៀបរាប់ពីលោកយាយមានវ័យចំណាស់ ឈ្មោះ អ៊ុន ឡាន អាយុ៨៨ឆ្នាំ មានស្រុកកំណើតរស់នៅខេត្តកំពង់ឆ្នាំង បានឱ្យដឹងថា ៖ គាត់បានចូលមកក្នុងខេត្តប៉ៃលិន តាមរយៈចៅស្រីម្នាក់ ដែលមកស៊ីឈ្នួលលក់ផ្លែឈើឱ្យគេនៅក្នុងផ្សារព្រំខាងលើ ដោយលោកយាយបានសុំព្រះសង្ឃត្រង់កន្លែងបរិវេណវត្តផ្សារព្រំ ស្នាក់នៅជារៀងរាល់យប់ ហើយក៏អង្គុយសុំទានគេអស់រយ:ពេលជាង១ឆ្នាំមកហើយដែរ ។
លោកយាយបន្តទៀតថា កាលពីមុនលោកយាយអាចដើរបានដូចគេឯងធម្មតាទេ ។ ប៉ុន្តែ ដោយសារបញ្ហាជំងឺលើសឈាម ឱ្យលោកយាយប្រែក្លាយទៅជាខ្វិនដៃ ខ្វិនជើងដើរលែងរួច ក៏គ្មានអ្នកចិញ្ចឹមដែរ ។ គាត់មានកូនចំនួន២នាក់ កូនប្រុសម្នាក់ រស់នៅខេត្តព្រះវិហារ ដោយគេមានកូនក្រមុំកម្លោះអស់ហើយ តែមិនដែលមកលែង ឬសួរសុខទុក្ខគាត់ជាម្តាយនោះទេ ។ រីឯកូនស្រីម្នាក់ទៀតរស់នៅក្នុងខេត្តបាត់ដំបង ជាស្ត្រីមេម៉ាយក៏មិនធ្លាប់ធ្វើដំណើរមកលេងគាត់ជាម្តាយដែលកំពុងស្នាក់នៅក្នុងខេត្តប៉ៃលិននេះដែរ ។ លោកយាយរៀបរាប់ទាំងសំឡេងញ័របន្តទៀតថា ការអង្គុយសុំទានគេនៅក្នុងផ្សារនេះក្នុង១ថ្ងៃបានថវិកាចាប់ពី១ទៅ២ម៉ឺនរៀល ដើម្បីទិញអាហារទទួលទានលុះដល់ពេលល្ងាចទើបចៅមកដឹកយកទៅកន្លែងស្នាក់នៅ ឯក្នុងបរិវេណវត្តផ្សារព្រំវិញ ។
លោកយាយបញ្ជាក់ថា រាល់ថ្ងៃលោកយាយស្នាក់នៅតែម្នាក់ឯងទេ ពិតជាលំបាកខ្លាំង ដោយសារតែខ្លួនកាន់តែចាស់ ហើយងងឹតភ្នែកថែមទៀត ដោយចៅស្រីជួលបន្ទប់ផ្ទះគេស្នាក់នៅក្បែរផ្សារ ដើម្បីងាយស្រួលងើបពីយប់ទៅលក់ផ្លែឈើឱ្យគេ បានប្រាក់កម្រៃសម្រាប់ផ្គត់ផ្គង់ជីវភាពខ្លួនឯង ហើយក៏តែងតែដាំបាយ និងធ្វើម្ហូបអាហារយកទៅជូនលោកយាយពិសាជាញឹកញាប់ដែរ ។
ចំពោះការអង្គុយសុំទាននៅក្នុងផ្សារនេះ មិនមានការហាមឃាត់ពីអាជ្ញាធរមូលដ្ឋាន ឬដេញពីម្ចាស់ផ្សារនោះទេ ខណៈដែលគាត់មានសភាពងងឹតភ្នែក មើលអ្វីមិនឃើញច្បាស់ឡើយ ដោយស្តាប់ឮតែសំឡេងប៉ុណ្ណោះ ។ តែអ្វីដែលគួរឱ្យអាណិតអាសូរនោះ គឺលោកយាយមានវ័យចំណាស់ដល់ថ្នាក់នេះហើយ គួរតែមានកូនចៅបីបាច់ថែរក្សាឱ្យបានដិតដល់ល្អ ខណ:ដែលគាត់បង្កើតកូនមក សូម្បីតែស្រមោចមួយក្បាលក៏មិនហ៊ានឱ្យវារកាត់លើខ្លួនឡើយ ។ តែដល់ពេលលោកយាយមានវ័យកាន់តែចាស់ និងជរាពិការថែមទៀត បែរជាមកអង្គុយអង្គុយសុំទានគេទៅវិញ៕
ចែករំលែកព័តមាននេះ