រាជធានីភ្នំពេញ ៖ សត្វផ្សោត គឺជាថនិកសត្វ ដែលចិញ្ចឹមកូនដោយទឹកដោះ ហើយវាអាចបង្កកំណើតចន្លោះពី២ ទៅ៣ឆ្នាំ ដោយផ្សោតញីត្រូវពពោះរយៈពេល១៤ខែ ដោយកើតម្តងបានកូនតែ ១ក្បាលប៉ុណ្ណោះ…
រាជធានីភ្នំពេញ ៖ សត្វផ្សោត គឺជាថនិកសត្វ ដែលចិញ្ចឹមកូនដោយទឹកដោះ ហើយវាអាចបង្កកំណើតចន្លោះពី២ ទៅ៣ឆ្នាំ ដោយផ្សោតញីត្រូវពពោះរយៈពេល១៤ខែ ដោយកើតម្តងបានកូនតែ ១ក្បាលប៉ុណ្ណោះ ។
យោងតាមក្រសួងកសិកម្ម រុក្ខាប្រមាញ់ និងនេសាទបានឱ្យដឹងនៅថ្ងៃទី២២ ខែ មេសា ឆ្នាំ ២០២៤ថា ផ្សោតក្បាលត្រឡោកមានទីជម្រកពីរខុសគ្នា រវាងដែនទឹកសមុទ្រ និងទឹកសាប ហើយមានរូបរាងដូចគ្នា ។ ប្រវែងដងខ្លួនរបស់វាទើបកើតមកមានប្រវែង៩០-១០០ស.ម ពេញវ័យ២,៣២ – ២,៧៥ម និងកូនទើបកើតមានទម្ងន់១០-១២គ.ក ពេញវ័យ១៣០គ.ក ។
សូមជម្រាបថា ផ្សោតក្បាលត្រឡោកវាគ្មានចំពុះទេ វាមានក្បាលមាំរាងមូល រីឯព្រុយខ្នងមានទំរង់ផ្សេងៗគ្នា ។ ផ្នែកខាងខ្នង និងចំហៀងសង្ខាងមានពណ៌ប្រផេះចាស់ ឯពោះមានពណ៌ប្រផេះស្រាល ។ ព្រុយចំហៀងមានទំហំធំវែងរាងដូចច្រវ៉ា ។
ចំពោះការរស់នៅវិញ សត្វផ្សោតប្រភេទនេះ តែងតែហែលនិងក្រឡាប់ខ្លួនលើផ្ទៃទឹកយឺតៗ ហើយងើបដកដង្ហើមក្នុងបរិយាកាស រយៈពេលពី៧០ទៅ១៥០ វិនាទីម្តង។ សត្វផ្សោតប្រភេទក្បាលត្រ ឡោកញីអាចបន្តពូជបានចាប់ពីអាយុ៧ឆ្នាំឡើងទៅនឹងរយៈពេលពពោះ គឺ១៤ខែ។
សត្វផ្សោតប្រភេទនេះ វាត្រូវបានឃើញមាននៅរស់នៅក្នុងក្រុងព្រះសីហនុ បណ្តោយឆ្នេរខេត្តកោះកុង (ចំណុចប្រសព្វរវាងទឹកប្រៃ-សាប) ។ ស្ថានភាពអភិរក្ស ផ្សោតមេគង្គជាប្រភេទសត្វមានដោយកម្រ និងបានចុះបញ្ជីក្រហម IUCN (LR) ជាប្រភេទរងគ្រោះតិចតួច ប៉ុន្តែវាត្រូវបានចាត់ថ្នាក់នៅក្នុងឧបសម្ព័ន្ធទី១ នៃអនុសញ្ញា CITES ។
សត្វផ្សោតប្រភេទនេះងាយគ្រោះថ្នាក់នៅពេលជម្រៅទឹកមានកម្រិតរាក់ខ្លាំង ដែលមិនបង្កលក្ខណៈឲ្យវាហែលចាប់ចំណីបាន។ ជាពិសេសចំពោះផ្សោតទន្លេ វាកំពុងរងគ្រោះថ្នាក់ដោយសារជាប់សំណាញ់អ្នកនេសាទ និងការប្រែប្រួលជម្រៅ និងគុណភាពនៃទឹកទន្លេរ។
ក្រសួងកសិកម្មរុក្ខាប្រមាញ់ និងនេសាទ បានអំពាវនាវនិងសូមចូលរួមថែរក្សាការពារសត្វផ្សោតទន្លេមេគង្គទាំងអស់គ្នា ដោយបញ្ឈប់ការដាក់មងក្រឡាធំក្នុងទន្លេ ឬដោយការនេសាទដោយឧបករណ៍ខុសច្បាប់ ពុំនោះសោតទេ អ្នកប្រព្រឹត្តនឹងត្រូវប្រឈមមុខនឹងការអនុវត្តច្បាប់ដោយតឹងរ៉ឹងពីមន្ត្រីផលផល ៕
ចែករំលែកព័តមាននេះ