រាជធានីភ្នំពេញ ៖ បុរសម្នាក់ ក្រោយពីលែងលះគ្នាជាមួយប្រពន្ធរួច អត់បានត្រលប់ទៅរស់នៅឯស្រុកកំណើតវិញទេ គាត់បានស្នាក់នៅតែលតោលគ្មានគោលដៅពិតប្រាកដឡើយ ជួនកាលស្នាក់នៅផ្ទះអ្នកភូមិ ផ្ទះអ្នកនេះបន្តិច ផ្ទះអ្នកនោះបន្តិច និងពេលខ្លះ…
រាជធានីភ្នំពេញ ៖ បុរសម្នាក់ ក្រោយពីលែងលះគ្នាជាមួយប្រពន្ធរួច អត់បានត្រលប់ទៅរស់នៅឯស្រុកកំណើតវិញទេ គាត់បានស្នាក់នៅតែលតោលគ្មានគោលដៅពិតប្រាកដឡើយ ជួនកាលស្នាក់នៅផ្ទះអ្នកភូមិ ផ្ទះអ្នកនេះបន្តិច ផ្ទះអ្នកនោះបន្តិច និងពេលខ្លះ ស្នាក់នៅក្នុងសាសបុណ្យភូមិ គាត់បានប្រកបរបរដកក្រអៅឈូកលក់ ដើម្បីយកប្រាក់ចិញ្ចឹមជីវិតរបស់គាត់ ប៉ុន្តែគាត់បានក្លាយទៅជាមនុស្សម្នាក់ខូចចិត្តខ្លាំង ហើយបានយកស្រា ធ្វើជាត្រីមុខ គិតតែពីផឹកៗស្រវឹងជោគជាំជាប្រចាំរាល់ថ្ងៃតែម្ដង ។
ដោយឡែកថ្ងៃទី១៧ ខែកក្កដា ឆ្នាំ២០២៥ វេលាម៉ោង៤និង៣០នាទីល្ងាច ស្រាប់តែអ្នកភូមិប្រទះឃើញគាត់លង់ទឹកស្លាប់នៅក្នុងស្រះឈូកមួយកន្លែង ដែលគាត់តែងតែចុះដកក្រអៅឈូកលក់រកប្រាក់ប្រចាំថ្ងៃ ដែលមានទីតាំងស្ថិតនៅក្បែរទួលអង្គរោងបុណ្យភូមិកំបូល សង្កាត់កំបូល ខណ្ឌកំបូល រាជធានីភ្នំពេញ ។
ប្រជាពលរដ្ឋបាននិយាយថា បុរសខាងលើនោះឈ្មោះ ជុន ជួន អាយុ៤៦ឆ្នាំ មុខរបរដកក្រអៅឈូកលក់ មានស្រុកកំណើតនៅខេត្តព្រៃវែង ។ គាត់គឺជាបុរសពោះម៉ាយ ដែលបានលែងលះប្រពន្ធរយៈពេល១០ឆ្នាំមកហើយ ។ ប៉ុន្តែក្រោយពីលែងលះប្រពន្ធរួច គាត់មិនបានទៅរស់នៅឯស្រុកកំណើតវិញទេ គឺបានស្នាក់នៅគ្មានគោលដៅឡើយ ដោយពេលខ្លះស្នាក់នៅតាមផ្ទះអ្នកភូមិ និងពេលខ្លះទៀតស្នាល់នៅក្នុងរោងបុណ្យខាងលើ ។
ប្រជាពលរដ្ឋ បាននិយាយបន្តទៀតថា មិនតែប៉ុណ្ណោះ ក្រោយពេលលែងលះប្រពន្ធរួចកាលណាមក បុរសនោះ ហាក់មានការខូចចិត្តខ្លាំងណាស់ គាត់បានយកស្រាធ្វើជាត្រីមុខ ហើយផឹកស្រវឹងជាប្រចាំរាល់ថ្ងៃ គ្មានថ្ងៃខានឡើយ។ ដោយឡែក នៅវេលាម៉ោងខាងលើខណៈអ្នកភូមិទៅដកក្រអៅឈូក និងបេះផ្កាឈូកនៅចំណុចស្រះទឹកនោះ ក៏ស្រាប់តែមានការភ្ញាក់ផ្អើលឆោឡោ ដោយសារតែបានប្រទះឃើញបុរសនោះលង់ទឹកស្លាប់ក្នុងស្រះឈូកនោះបាត់ទៅហើយ ។
ប្រជាពលរដ្ឋខាងលើ បានរៀបរាប់ប្រាប់ឲ្យដឹងបន្តទៀតថា ស្រះឈូកនោះ មិនជ្រៅទេ ព្រោះពុំមែនជាស្រះជីកឡើយ ពីមុនជាវាលស្រែជម្រៅប៉ុណ្ណោះ ប៉ុន្តែបច្ចុប្បន្នដោយតំបន់ជុំវិញនោះ មានការចាក់ដីខ្ពស់ៗសាងសង់ផ្ទះជាច្រើន ទើបទីនោះក្លាយជាស្រះទឹកមួយ ដែលមានឈូកដុះណែនណាន់តាន់តាប់។ ចំណែកបុរសនោះ ទំនងជាស្រវឹងខ្លាំង ឬខ្យល់គ ទើបលង់ទឹកស្លាប់បែបនេះ ។ បន្ទាប់មក លោកមេភូមិ ក៏រាយការណ៍ប្រាប់ឲ្យនគរបាលឲ្យចុះទៅធ្វើកោសល្យវិច័យ ហើយនគរបាលបញ្ជាក់ថា បុរសនោះស្លាប់ដោយលង់ទឹក ។
បើតាមស្ត្រីឈ្មោះ ងិន សុខ អាយុ៦៤ឆ្នាំបាននិយាយថា គាត់ និងបុរសនោះ អតីតធ្លាប់ជាប្ដីប្រពន្ធនឹងគ្នា ប៉ុន្តែដោយរស់នៅមិនចុះសម្រុងគ្នា ក៏បានលែងលះគ្នារយៈពេល១០ឆ្នាំមកហើយ។ ចាប់តាំងពីលែងលះគ្នារួចមក បុរសនេះទៅបាត់ៗ អត់ដែលទៅនៅផ្ទះនោះទេ ប៉ុន្តែឧស្សាហទៅជេរគាត់ជាបន្តបន្ទាប់ ហើយប៉ុន្មានថ្ងៃចុងក្រោយ អត់ដែលឃើញទៅជេរគាត់ទៀតទេ ទើបតែនៅវេលាម៉ោង១១ព្រឹកថ្ងៃកើតហេតុ បានទៅជេរគាត់ដល់ផ្ទះម្ដងទៀត ។
អតីតប្រពន្ធរូបនោះ បាននិយាយបន្តថា ពេលនោះគាត់ក៏សួរថា «តើអ្ហែងជេរនរណាគេ ? អតីតប្ដីរូបនេះ ឆ្លើយថា អញមិនមែនជេរង៉ែងទេ អញជេរមីអស់នោះទេតើ» គាត់គិតថា អតីតប្ដីជេរគាត់ហើយ ពុំមែនជេរអ្នកផ្សេងនោះទេ ប៉ុន្តែគាត់ក៏មិនមាត់ទៀតដែរ ។ បន្ទាប់មក គាត់ក៏បានដេកលក់ រហូតដល់វេលាម៉ោង២រសៀលថ្ងៃដដែល ទើបភ្ញាក់ងូតទឹក ហើយបាត់អត់ឃើញអតីតប្ដីនេះឡើយ លុះដល់វេលាម៉ោង៤និង៣០នាទីល្ងាចថ្ងៃដដែល ក៏មានគេប្រទះឃើញអតីតប្ដីគាត់ លង់ទឹកស្លាប់បែបនេះ បាត់ទៅហើយ ។
នគរបាល បានប្រាប់ថា ក្រោយពេលកើតហេតុ អតីតប្រពន្ធរូបនោះ រួមជាមួយអ្នកភូមិ និងលោកមេភូមិ ព្រមទាំងអាជ្ញាធរសង្កាត់កំបូល បានរួមគ្នាចាត់ចែងធ្វើបុណ្យសពបុរសនោះ នៅនឹងសាលាបុណ្យភូមិ ជិតកន្លែងកើតហេតុនោះតែម្ដង ៕
ចែករំលែកព័តមាននេះ