រាជធានីភ្នំពេញ ៖ ករណីទាហានថៃ នៅភូមិភាគ២ ដើរជាន់មីន បណ្ដាលឱ្យផ្ទុះរងរបួសចំនួន០៣នាក់ ត្រូវបានលោក ហេង រតនា ប្រតិភូរាជរដ្ឋាភិបាល…
រាជធានីភ្នំពេញ ៖ ករណីទាហានថៃ នៅភូមិភាគ២ ដើរជាន់មីន បណ្ដាលឱ្យផ្ទុះរងរបួសចំនួន០៣នាក់ ត្រូវបានលោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានចោទជាសំណួរថា តើការផ្ទុះគ្រាប់មីននោះ ក្នុងទឹកដីរបស់អ្នកណា ? បើសិនជាក្នុងទឹកដីសៀម គ្រាប់មីនចាស់ ឬថ្មី មានតែខាងសៀមខ្លួនឯងទេ ទើបដឹងច្បាស់ ។
លោក ហេង រតនា អគ្គនាយកស៊ីម៉ាក់ បានសរសេរនៅលើបណ្ដាគសង្គមហ្វេសប៊ុកនៅថ្ងៃទី១៧ ខែកក្កដា ឆ្នាំ២០២៥ យ៉ាងដូច្នេះថា ៖ «បន្ទាប់ពីមានទាហានសៀម រងរបួសដោយសារជាន់គ្រាប់មីនផ្ទុះដាច់ជើងម្នាក់ និងរបួស២នាក់ កាលពីថ្ងៃទី១៦ ខែកក្កដា ម្សិលមិញនេះ ភាគីសៀមខ្លះ បានបញ្ជាក់ថា គ្រាប់មីនចាស់សំណល់សង្គ្រាម មានក្រុមខ្លះថា ជាគ្រាប់មីនទើបដាក់ថ្មី ដោយសារដីនោះ បានបោសម្អាតមីនរួចហើយ ។ មានអ្នកសារព័ត៌មានខ្លះ បានសួរមកខ្ញុំ ឱ្យធ្វើការបកស្រាយ! ខ្ញុំគ្រាន់តែសួរត្រឡប់ទៅវិញថា ការផ្ទុះគ្រាប់មីននោះ ក្នុងបូរណភាពទឹកដីរបស់អ្នកណា ? បើសិនជាក្នុងទឹកដីសៀមមែននោះ ដូចនេះករណីគ្រាប់មីនចាស់ ឬថ្មី មានតែខាងសៀមខ្លួនឯងទេ ទើបដឹងច្បាស់!» ។
សូមជម្រាបថា សារព័ត៌មានរបស់ថៃ បានផ្សាយកាលពីថ្ងៃទី១៦ ខែកក្កដាម្សិលមិញនេះថា មានករណីទាហានថៃ នៅភូមិភាគ២ បានដើរជាន់មីន បណ្ដាលឱ្យយោធិនខ្លះរងរបួស និងខ្លះទៀត ត្រូវកាត់ជើង។ ជារួម ទាហានថៃបីនាក់ រងរបួសនៅក្នុងហេតុការណ៍មីនមួយគ្រាប់ផ្ទុះឡើងនៅតំបន់(Chong Bok) ស្រុកណាំយ៉ឺន (Nam Yuen) ខេត្តឧប៊ុនរាជធានី (Ubon Ratchathani) ។
ភ្លាមៗ មេបញ្ជាការភូមិភាគ២របស់ថៃ បានរាយការណ៍កាលពីយប់ថ្ងៃពុធថា ទាហានរបស់ខ្លួនម្នាក់ដើរជាន់មីន នៅពេលក្រុមការងាររបស់ពួកគេដើរល្បាត នៃចំណុចចាប់ផ្ដើម នៃការធ្វើដំណើររបស់ពួកគេ ពីតំបន់ប្រតិបត្តិការសឹកមរកតឆ្ពោះទៅភ្នំ៤៨១ នៅម៉ោង១និង៣០រសៀលថ្ងៃពុធ។ រំពេចនោះ គ្រាប់មីនក៏ផ្ទុះឡើងបណ្ដាលឱ្យរបួសទាហានទាំងបីនាក់ ។ ពួកគេត្រូវបានបញ្ជូនទៅមន្ទីរពេទ្យស្រុកមឿង ខេត្តឧប៊ុនរាជធានី។ នៅក្នុងចំណោមយោធិនទាំងនោះ ម្នាក់ឈ្មោះ ថាណាវ៉ាត់ ហួយវ៉ាន់ (Thanapat Huiwan) ត្រូវកាត់ត្រឹមកជើងខាងឆ្វេង។ នៅពេលជួយសង្គ្រោះបឋមនោះ គាត់នៅដឹងខ្លួននៅឡើយទេ។ គាត់ត្រូវបានលាងរបួស និងដាក់អុកស៊ីហ្សែន។ បន្ទាប់មកដឹកតាមឧទ្ធម្ភាគចក្រទៅមន្ទីរពេទ្យ ។
ឥឡូវនេះ គ្រូពេទ្យកំពុងវះកាត់មុខរបួស និងតាមដានអាការៈរបួសដោយយកចិត្តទុកដាក់ ដើម្បីទប់ស្កាត់មិនឱ្យក្លាយមុខរបួស ។ ដោយឡែក ទាហាន២នាក់ទៀត ដែលត្រូវរបួសដែរនោះ ម្នាក់ឈ្មោះ ផាធីផាន ស្រីឡាសាក់ (Patiphant Srilasak) និងម្នាក់ទៀតឈ្មោះ ណាថាវុទ្ធ ស្រីខឹម (Nathawut Srikhem)។ ពួកគេរងរបួស នៅត្រង់ដើមទ្រូង ៕
ចែករំលែកព័តមាននេះ