ខេត្តក្រចេះ ៖ មន្ទីរសុខាភិបាលខេត្តក្រចេះ នៅថ្ងៃទី១៩ ខែមេសា ឆ្នាំ២០២៤នេះ បានសន្និដ្ឋានជាបឋមថា ករណីមនុស្សចំនួន១៦នាក់ ធ្លាក់ខ្លួនឈឺ និងបានបញ្ជូនទៅព្យាបាលនៅមន្ទីរពេទ្យបង្អែក…
ខេត្តក្រចេះ ៖ មន្ទីរសុខាភិបាលខេត្តក្រចេះ នៅថ្ងៃទី១៩ ខែមេសា ឆ្នាំ២០២៤នេះ បានសន្និដ្ឋានជាបឋមថា ករណីមនុស្សចំនួន១៦នាក់ ធ្លាក់ខ្លួនឈឺ និងបានបញ្ជូនទៅព្យាបាលនៅមន្ទីរពេទ្យបង្អែក ដោយសារពុលនំបញ្ចុកលក់នៅក្នុងភូមិ ដែលគ្មានអនាម័យល្អ ។
មន្ទីរសុខាភិបាល ខេត្តក្រចេះ បានឱ្យដឹងថា កាលពីថ្ងៃទី១៨ ខែមេសា ឆ្នាំ២០២៤ មានព្រឹត្តិការណ៍ពុលចំណីអាហារបានកើតឡើងនៅភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ ដែលបណ្តាលឱ្យមនុស្សចំនួន ១៦នាក់ (ស្រី១០នាក់) បានធ្លាក់ខ្លួនឈឺ និងបានបញ្ជូនទៅព្យាបាលនៅមន្ទីរពេទ្យបង្អែកសំបូរ ចំនួន១១នាក់ ស្រី៧នាក់ ដែលមានរោគ សញ្ញាឈឺពោះ រាក ក្អួត ឈឺក្បាល នឹងវិលមុខ។ ក្រោយទទួលបានការយកចិត្តទុកដាក់ថែទាំព្យាបាលដោយក្រុមគ្រូពេទ្យ នៃមន្ទីរពេទ្យបង្អែកសំបូរ ស្ថានភាពអ្នកជំងឺបានធូរស្រាលជាបណ្តើៗ ។
ដោយផ្អែកលើព័ត៌មាន និងភស្តុតាង លក្ខណៈអេពីដេមីសាស្ត្រ បានសន្និដ្ឋានជាបឋមថា ព្រឹត្តិការណ៍ដែលបណ្តាលឱ្យប្រជាពលរដ្ឋធ្លាក់ខ្លួនឈឺនេះ គឺបណ្តាលមកពីការបរិភោគនំបញ្ចុកលក់នៅក្នុងភូមិ ដែលនំបញ្ចុកទាំងនោះមានការផលិត ការរក្សាទុក និងការវេចខ្ចប់ មិនមានអនាម័យល្អ ។
ក្រុមការងារនៅកំពុងបន្តអន្តរាគមន៍អង្កេតស្រាវជ្រាវបន្តទៀត ដើម្បីប្រមូលព័ត៌មានបន្ថែម និងអន្តរាគមន៍ ពិនិត្យព្យាបាលករណីចាស់ និងករណីឈឺថ្មីៗផ្សេងទៀត មន្ទីរសុខាភិបាលនៃរដ្ឋបាលខេត្ត បានក្រើនរំលឹក ដល់បងប្អូនប្រជាពលរដ្ឋទាំងអស់ សូមអនុវត្តនូវវិធានការអនាម័យឱ្យបានខ្ជាប់ខ្ជួនដូចខាងក្រោម ៖
-ប្រកាន់ខ្ជាប់អនាម័យដោយលាងសម្អាតដៃឱ្យបានស្អាត និងញឹកញាប់ជាមួយសាប៊ូ និងទឹកស្អាត ឬ អាកុលមុនពេលធ្វើម្ហូបអាហារ និងមុនពេលបរិភោគ។
-កុំប៉ះពាល់ ឬបរិភោគបក្សីដែលឈឺ ឬងាប់ ។
-ត្រូវរក្សាទុកដាក់ម្ហូបអាហារដែលចំអិនហើយ និងឆៅឱ្យនៅដាច់ដោយឡែកពីគ្នា។
-សម្អាតសម្ភារប្រើប្រាស់សម្រាប់ធ្វើម្ហូបអាហារឱ្យបានត្រឹមត្រូវ និងត្រូវចំអិនម្ហូបឱ្យបានឆ្អិនល្អ ។
-ត្រូវរៀបចំទុកដាក់វេចខ្ចប់ម្ហូបអាហារឱ្យមានអនាម័យ និងសុវត្ថិភាព ស្ថិតក្នុងសីតុណ្ហភាពសមស្រប ។
-មិនត្រូវបរិភោគម្ហូបអាហារដែលរក្សាទុកយូរហួសពេលវេលាកំណត់ប្រើប្រាស់ ។
-ត្រូវប្រើប្រាស់ និងទទួលទានទឹកស្អាតទឹកមានសុវត្ថិភាព ដូចជាទឹកបរិសុទ្ធ ទឹកឆ្អិនជាដើម។
សូមជម្រាបដែរថា នៅយប់ថ្ងៃទី១៨ ខែមេសា ឆ្នាំ២០២៤ ស្ថិតនៅក្នុងភូមិទន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ ប្រជាពលរដ្ឋប្រុស-ស្រី ស្រាប់តែកើតអាការក្អួតចង្អោររាករូសអស់កម្លាំងល្ហិតល្ហៃដៃជើង ខណៈសង្ស័យពួកគេបានពុលនំបញ្ចុក ហើយក៏ត្រូវបានបញ្ជូនទៅកាន់មន្ទីរពេទ្យបង្អែកស្រុកសំបូរ ខេត្តក្រចេះ ។
ប្រភពពីអ្នកភូមិបានឱ្យដឹងថា ប្រជាពលរដ្ឋទាំងនោះ ពួកគាត់បានទិញនំបញ្ចុក ដែលលក់នៅតាមភូមិយកទៅទទួលទានកាលថ្ងៃទី១៥ មេសា ហើយក្រោយទទួលទាននំបញ្ចុកនោះរួច ប៉ុន្មានម៉ោង ក៏ស្រាប់តែមានអាការៈក្អួតចង្អោរ រាក អស់កម្លាំងបែបនេះតែម្តង ។
អ្នកមានអាការៈបែបនេះទាំងអស់ ត្រូវបានគេបញ្ជូនទៅមណ្ឌលសុខភាពនៅមូលដ្ឋាន ប៉ុន្តែដោយសារតែប្រជាពលរដ្ឋមានអាការក្អួតចង្អោរ រាក អស់កម្លាំងកើតឡើងបន្តបន្ទាប់ស្រដៀងគ្នា ធ្ងន់ធ្ងរឡើងៗ ទើបត្រូវបានគេបញ្ជូនបន្តទៅកាន់មណ្ឌលសុខភាពស្រុកសំបូរ ខេត្តក្រចេះ ។
លោកវេជ្ជបណ្ឌិត ផាត់ តុលា ប្រធានមណ្ឌលសុខភាពស្រុកសំបូរ បានឱ្យដឹងថា នៅព្រឹកថ្ងៃទី១៩ មេសា នេះ អាការរបស់ពួកគាត់ប្រសើរឡើងវិញហើយ ។ លោកបន្តថា មូលហេតុនៅពេលដែលបញ្ជូនមកពួកគាត់មានអាការក្អួតចង្អោរ និងរាក ក៏អាចរួមសមនឹងអាកាសធាតុក្តៅខ្លាំងផង ដូច្នេះយើងមិនទាន់អាចសន្និដ្ឋានបានថា មកពីករណីអ្វីពិតប្រាកដនៅឡើយទេ ។ ក្នុងពេលឥឡូវនេះ ពួកគាត់ហាក់មានសភាពធូរស្រាលធម្មតាវិញហើយ ។
លោក គង់ មេត្តា អភិបាលស្រុកសំបូរបានឱ្យដឹងថា ប្រជាពលរដ្ឋ ដែលត្រូវបានគេបញ្ជូនមកសម្រាកនៅមន្ទីរពេទ្យបង្អែកខាងលើ រួមមាន ៖ ទី១-ឈ្មោះរី ស្រីតុប ភេទស្រី អាយុ២៣ឆ្នាំ ។ ទី២-ឈ្មោះកុយ រ៉ា ភេទប្រុស អាយុ៥០ឆ្នាំ ។ ទី៣-ឈ្មោះ អ៊ុ សុខខែង ភេទស្រី អាយុ៤៤ឆ្នាំ ។ ទី៤-ឈ្មោះ រី សុខី ភេទស្រី អាយុ៧ឆ្នាំ ។ ទី៥-ឈ្មោះថាច ជីតា ភេទស្រី អាយុ៤ឆ្នាំ ។ ទី៦-ឈ្មោះ ឈឿន ស្រីយុទ្ធ ភេទស្រី អាយុ១១ឆ្នាំ ។ ទី៧-ឈ្មោះ ឈឿន ឆាលី ភេទប្រុស អាយុ១៤ឆ្នាំ ។ ទី៨-ឈ្មោះ ស្រី មឿន ភេទប្រុស អាយុ៤៩ឆ្នាំ ។ ទី៩-ឈ្មោះ សែម ឈុន ភេទប្រុស អាយុ៣៣ឆ្នាំ ។ ទី១០-ឈ្មោះ ថាច ឆៃ ភេទប្រុស អាយុ១៦ឆ្នាំ និងទី១១-ឈ្មោះ រី សុខៃ ភេទស្រី អាយុ១០ឆ្នាំ ។
បច្ចុប្បន្ន អ្នករងគ្រោះស្ថិតក្នុងការសម្រាកព្យាបាល និងតាមដានយ៉ាងយកចិត្តទុកដាក់ផងដែរពីសណាក់ក្រុមគ្រូពេទ្យនៅឡើយ ៕
ចែករំលែកព័តមាននេះ