យេរូសាឡឹម៖ តាមមើលទៅពិភពលោកមិនទាន់សង្ឃឹមថាបានសុខទេ។ លោកណឺតាន់យ៉ាហ៊ូទើបតែប្រកាសថ្មីៗនេះថានៅក្នុងលោកនេះគ្មាននរណាមានសិទ្ធិអារកាត់ជំនួសអ៊ីស្រាអែលទេ។ ទោះបីអ៊ីស្រាអែលសងសឹកប្រទេសអ៊ីរ៉ង់ ឬមិនសងសឹកជាការសម្រេចចិត្តផ្ទាល់របស់អ៊ីស្រាអែល។ បស្ចិមប្រទេស និងសម្ព័ន្ធមិត្តអ៊ីស្រាអែលដដែលៗជាច្រើនដងហើយថា «អ៊ីស្រាអែលល្មមៗបានហើយ។ អ៊ីរ៉ង់មិនបានបង្កការខូចខាតជាដុំកំភួន ឬស្លាប់មនុស្សទេ។ ដូច្នេះ បញ្ចប់បញ្ហាត្រឹមហ្នឹងចុះ»។
ប៉ុន្តែលោកណឺតាន់យ៉ាហ៊ូមិនទទួលយកការបកស្រាយនេះទេ។ រដ្ឋមន្ត្រីការបរទេសអង់គ្លេស និងអាល្លឺម៉ង់ទៅជួបលោកទៀតនៅថ្ងៃនេះ។ ប៉ុន្តែជាការឥតប្រយោជន៍។ ឥឡូវនេះ កុំស្មានថាអ៊ីរ៉ង់ខ្លាចបាក់ស្បាត ឬចុះញ៉មអ៊ីស្រាអែល។ ប្រធានាធិបតីអ៊ីរ៉ង់ប្រកាសរួចហើយថាករណីដែលខ្លួនវាយប្រហារកាលពីយប់ថ្ងៃសៅរ៍នោះដើម្បីសងសឹកកាលពីវគ្គមុនដែលអ៊ីស្រាអែលបាញ់មីស៊ីលកម្ទេចស្ថានកុងស៊ុលនៅស៊ីរីកាលពីដើមខែមេសា។
អ៊ីរ៉ង់បញ្ជាក់ឡើងវិញបើអ៊ីស្រាអែលយល់ព្រមចប់ត្រឹមប៉ុណ្ណឹង អ៊ីរ៉ង់ក៏លែងបន្តទៀត។ ប៉ុន្តែបើអ៊ីស្រាអែលចង់វាយប្រហារអ៊ីរ៉ង់ទៀត អ៊ីរ៉ង់ក៏មិននៅស្ងៀមដែរ។ បើអ៊ីស្រាអែលហ៊ានប៉ះអ៊ីរ៉ង់តែមួយសរសៃសក់ អ៊ីរ៉ង់នឹងវាយបកវិញភ្លាម។ គ្រាន់តែឮដូចនេះ ក្រុមហេស្បូឡាដែលជាកូនចៅរបស់អ៊ីរ៉ង់ក៏ហក់ចូលសង្វៀននេះមុនគេដើម្បីចូលរួមលេងល្បែងនយោបាយនេះដែរ។ ពួកគេវាយប្រហារ១ប្រាវខ្លាំងគួរសមដែរទៅលើព្រំដែនអ៊ីស្រាអែលខាងជើងបណ្ដាលឱ្យរបួសទាហានអ៊ីស្រាអែល១៤នាក់។
លោកណឺតាន់យ៉ាហ៊ូបានទទួលជួបរដ្ឋមន្ត្រីអាល្លឺម៉ង់ និងអង់គ្លេស និងអរគុណចំពោះពួកគេដែលឈរនៅខាងអ៊ីស្រាអែល។ ប៉ុន្តែលោកប្រកាសថាអ្នកដែលមានសិទ្ធិអារកាត់នៅក្នុងការឆ្លើយតបចំពោះអ៊ីរ៉ង់ ឬមិនឆ្លើយតប ហើយឆ្លើយតបកម្រិតណានោះវាជាឆន្ទានុសិទ្ធិផ្ទាល់របស់រដ្ឋាភិបាលលោក។ «ខ្ញុំសូមបញ្ជាក់ឱ្យបានច្បាស់ថាយើងខ្ញុំជាអ្នកសម្រេចរឿងនេះដោយខ្លួនឯង។ អ៊ីស្រាអែលនឹងធ្វើអ្វីៗគ្រប់យ៉ាងដែលចាំបាច់ដើម្បីការពារខ្លួន»។ ខាងលើនេះជាពាក្យសម្ដីរបស់លោកណឺតាន់យ៉ាហ៊ូ។
អ្នកវិភាគយល់ថានេះជារឿងធម្មតាទេ។ អ្នកនយោបាយចូលចិត្តបំផ្លោងវោហារសាស្ត្រដើម្បីទាក់ទាញចំណាប់អារម្មណ៍ និងការគាំទ្រ។ ប៉ុន្តែគេគិតថាលោកណឺតាន់យ៉ាហ៊ូមិនចិត្តធំដល់ថ្នាក់លើកទ័ពវាយប្រហារអ៊ីរ៉ង់ទាំងកម្រោលទេ។ បើគ្មានសញ្ញាភ្លើងខៀវពីអាមេរិកដែលជាសម្ព័ន្ធមិត្តដ៏ធំរបស់ខ្លួនទេ អ៊ីស្រាអែលក៏មិនហ៊ានដុតបញ្ឆេះសង្គ្រាមទាំងប្រថុយប្រថានដែរ។
យ៉ាងច្រើន អ៊ីស្រាអែលវាយឆ្មក់ទៅលើមេទ័ពរបស់អ៊ីរ៉ង់ ឬកូនចៅអ៊ីរ៉ង់ដូចជាមេទ័ពហេស្បូឡា ហ៊ូទី និងហាម៉ាស់។ អ៊ីស្រាអែលអាចនឹងរកវិធីសំឡេះពួកគេម្ដងមួយៗ។ ពុំនោះទេ អ៊ីស្រាអែលអាចនឹងវាយប្រហារតាមប្រព័ន្ធព័ត៌មានវិទ្យា។ បើគិតឱ្យសព្វៗទៅ គ្មាននរណាម្នាក់អាចព្យាករដឹង ឬទ្រង់ញាណដឹងអំពីអនាគតកាលបានឡើយ។ ឧបមាថាអ៊ីស្រាអែលមិនព្រមបញ្ចប់បញ្ហាត្រឹមហ្នឹង ហើយអ៊ីស្រាអែលវាយប្រហាររប៉េះរប៉ោះដាក់អ៊ីរ៉ង់។ ពេលនោះអ៊ីរ៉ង់មិនអាចនៅស្ងៀមតទៅទៀតទេ។
អ៊ីស្រាអែលនៅពេលនេះបើនិយាយពីការទាត់បាល់ប៉េណាល់ទីវិញអាចនិយាយបានថាខាងអ៊ីរ៉ង់បានស៊ុតបាល់មួយគ្រាប់ហើយ ហើយត្រូវអ្នកចាំទីអ៊ីស្រាអែលចាប់បាន។ ដូច្នេះ អ៊ីស្រាអែលនៅសល់បាល់មួយគ្រាប់នៅក្នុងដៃដែលត្រូវស៊ុតទៅខាងអ៊ីរ៉ងវិញម្ដង។ អ៊ីរ៉ង់បញ្ជូនមីស៊ីល និងដ្រូនជាង៣០០គ្រឿងវាយប្រហារអ៊ីស្រាអែល ហើយត្រូវអ៊ីស្រាអែលបាញ់ធ្លាក់៩៩%។ ចាំមើលបើអ៊ីស្រាអែលបាញ់មីស៊ីល ឬប្រើយន្តហោះវាយប្រហារអ៊ីរ៉ង់វិញម្ដង តើអ៊ីរ៉ង់អាចបាញ់ធ្លាក់៩៩%ដែរឬទេ។ នេះជាសំណួរដ៏ធំមួយ។
បញ្ហានេះមិនមែនពាក់ព័ន្ធតែនឹងប្រទេសទាំងពីរទេ។ ប៉ុន្តែពាក់ព័ន្ធនឹងប្រទេសមហាអំណាចនៅពីក្រោយខ្នងថែមទៀត។ ប្រទេសអាមេរិក អង់គ្លេស អាល្លឺម៉ង់ និងបារាំងជាដើមប្រកាសថាខ្លួនបានជួយជ្រោមជ្រែងផ្នែកចារកម្ម បច្ចេកវិទ្យាការពារដែនអាកាស និងជំនួយដទៃទៀត។ ហេតុនេះអ៊ីស្រាអែលអាចការពារខ្លួនយ៉ាងមានប្រសិទ្ធភាព។ កាលណោះ អ៊ីស្រាអែលសប្បាយចិត្តណាស់ព្រោះគ្មាននរណាស្លាប់ទេបើប្រៀបធៀបជាមួយការវាយប្រហាររបស់ក្រុមហាម៉ាស់កាលពីខែតុលា ឆ្នាំ២០២៣ស្លាប់ជនជាតិអ៊ីស្រាអែល១២០០នាក់៕
ចែករំលែកព័តមាននេះ