ខេត្តស្វាយរៀង ៖ រយៈពេល០៤ថ្ងៃ នៃបុណ្យចូលឆ្នាំថ្មី ប្រពៃណីជាតិខ្មែរ «សង្ក្រានស្វាយរៀង» ក៏មិនខុសពីបណ្ដាខេត្តដទៃ ទូទាំងប្រទេសដែរ ពិធីបុណ្យចូល ឆ្នាំថ្មីឆ្នាំរោង…
ខេត្តស្វាយរៀង ៖ រយៈពេល០៤ថ្ងៃ នៃបុណ្យចូលឆ្នាំថ្មី ប្រពៃណីជាតិខ្មែរ «សង្ក្រានស្វាយរៀង» ក៏មិនខុសពីបណ្ដាខេត្តដទៃ ទូទាំងប្រទេសដែរ ពិធីបុណ្យចូល ឆ្នាំថ្មីឆ្នាំរោង ឆស័ក ព.ស ២៥៦៨ នៅខេត្តស្វាយរៀង បានបញ្ចប់ដោយក្តីរីករាយ ខណៈរបាយការណ៍បឋមបានបង្ហាញថា រយៈពេលបួនថ្ងៃ នៃបុណ្យចូលឆ្នាំថ្មីមានភ្ញៀវក្នុងខេត្ត ភ្ញៀវទេសចរជាតិ និងអន្តរជាតិ ជាងកន្លះលាននាក់ បានទៅកម្សាន្តខេត្តជាប់ព្រំដែនវៀតណាមមួយនេះ ។
បើតាមរបាយការណ៍ដំបូង នៃមន្ទីរទេសចរណ៍ខេត្តនៅថ្ងៃពុធនេះ បានឱ្យដឹងថា នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ រយៈពេលបួនថ្ងៃ ចាប់គិតពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខេត្តស្វាយរៀង មានភ្ញៀវជាតិ និងអន្តរជាតិ បានធ្វើដំណើរកម្សាន្តទៅតំបន់រមណីយដ្ឋាននានា និងទីកន្លែងកម្សាន្ដសំខាន់ៗ ក្នុងខេត្តស្វាយរៀងប្រមាណ ៥៤៣,៦៩៥នាក់។ ក្នុងនោះភ្ញៀវទេសចរបរទេសប្រមាណ១៦,៤៩៤នាក់ ។
កំណើនភ្ញៀវ ពុំធ្លាប់មានបែបនេះ ដោយសារ រដ្ឋបាលខេត្ត គណៈបញ្ជាការឯកភាពខេត្ត ដឹកនាំដោយផ្ទាល់របស់លោក ប៉េង ពោធិ៍សា អភិបាលខេត្ត កម្លាំងពាក់ព័ន្ធទាំងអស់យកចិត្តទុកដាក់លើបញ្ហាសន្ដិសុខ សុវត្ថិភាព និងសណ្ដាប់សាធារណៈ បានយ៉ាងល្អប្រសើរ បង្កបរិយាកាសសប្បាយរីករាយយ៉ាងកក់ក្តៅ។
ជាការកត់សម្គាល់ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរនេះដែរ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាអ្នកតំណាងរាស្ត្រ មណ្ឌលខេត្តស្វាយរៀង, ឯកឧត្តមបណ្ឌិត សម តារា អ្នកតំណាងរាស្ត្រមណ្ឌលខេត្តស្វាយរៀង, លោកជំទាវដួង វណ្ណា អ្នកតំណាងរាស្ត្រមណ្ឌលខេត្តស្វាយរៀង, ឯកឧត្តម ម៉ែន វិបុល រួមទាំងក្រុមការងារជាច្រើន រូបទៀតបានអញ្ជើញពិនិត្យការរៀបចំ និងសប្បាយ រីករាយជាមួយ ប្រជាពលក្នុងខេត្ត។ ពិសេសចូលរួមលេងល្បែងប្រជាប្រិយការលេងកម្សាន្ត ជាមួយភ្ញៀវជាតិ អន្តរជាតិទៀតផង ។
របាយការណ៍ស្ថិតិទេសចរណ៍ដំបូង នៃពិធីបុណ្យចូលឆ្នាំថ្មី ប្រពៃណីជាតិ រយៈពេលបីថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែមេសា ឆ្នាំ ២០២៤ រាជធានី ខេត្ត មានទេសចរផ្ទៃ ក្នុងនិងបរទេសធ្វើដំណើរកម្សាន្តចំនួន ១៣,២៧៧,៥៥៦នាក់ និងភ្ញៀវអន្តរជាតិ ៨១,៧៤៥នាក់៕
ចែករំលែកព័តមាននេះ