ទីក្រុងវ៉ាស៊ីនតោន៖ អាមេរិក និងសហភាពអឺរ៉ុបត្រៀមដាក់ទណ្ឌកម្មអ៊ីរ៉ង់ពីបទវាយប្រហារអ៊ីស្រាអែលកាលពីយប់ថ្ងៃសៅរ៍។ ទន្ទឹមនឹងនោះ អាមេរិក និងអឺរ៉ុបក៏ខិតខំបញ្ចុះបញ្ចូលអ៊ីស្រាអែលកុំឱ្យវាយប្រហារអ៊ីរ៉ង់។ បើមិនដូច្នេះទេអាចនឹងផ្ទុះសង្គ្រាមកាន់តែធំ។ វិធានការនេះធ្វើឡើងនៅពេលអ៊ីស្រាអែលត្រៀមកោះប្រជុំនៅថ្ងៃពុធដើម្បីសម្រេចថាត្រូវឆ្លើយតបបែបណា។
មែនទែនទៅ ការវាយប្រហាររបស់អ៊ីរ៉ង់មិនបានបង្កការខូចខាតធំដុំ ហើយក៏មិនបានសម្លាប់នរណាម្នាក់ឡើយដោយសារអ៊ីស្រាអែលមានប្រព័ន្ធការពារដែនអាកាសខ្លាំងពូកែ ហើយអ៊ីស្រាអែលបានរៀបជើងចំព្រួលបានរឹងមាំគ្រាន់បើព្រោះដឹងថាអ៊ីរ៉ង់នឹងវាយប្រហារ។ ការវាយប្រហារ និងការការពារខ្លួនបានល្អនេះក៏អាចផ្ដល់ផលចំណេញសម្រាប់អ៊ីស្រាអែលមិនតិចទេ។
ទី១- អ៊ីស្រាអែលមានមោទកភាពយ៉ាងខ្លាំងបើប្រៀបធៀបនឹងការវាយប្រហាររបស់ក្រុមហាម៉ាស់កាលពីខែតុលា ឆ្នាំ២០២៣ដែលអ៊ីស្រាអែលរងក្ដីអាម៉ាស់យ៉ាងខ្លាំងស្លាប់មនុស្ស១២០០នាក់។ ទី២-អ៊ីស្រាអែលធ្លាប់ទទួលរងសម្ពាធ និងការថ្កោលទោសពីសហគមន៍អន្តរជាតិជាច្រើនខែមកហើយដោយសារសង្គ្រាមនៅតំបន់ហ្កាហ្សាបណ្ដាលឱ្យស្លាប់មនុស្សច្រើនពេក។
ប៉ុន្តែនៅក្នុងទំហំចិត្តរបស់អ៊ីស្រាអែល អ៊ីស្រាអែលមិនទាន់ស្កប់ស្កល់ត្រឹមប៉ុណ្ណឹងទេ។ អ៊ីស្រាអែលចង់កេងចំណេញឱ្យបានច្រើនតាមដែលអាចធ្វើទៅបានពីព្រឹត្តិការណ៍នេះ។ ប៉ុន្តែសម្រាប់សហគមន៍អន្តរជាតិ ក៏ដូចជាសម្ព័ន្ធមិត្តអ៊ីស្រាអែល និងមជ្ឈិមបូព៌ា ពួកគេបារម្ភថាបើប្រទេសទាំងពីរសងសឹកគ្នាទៅវិញទៅមក បញ្ហាផ្ទុះឡើងកាន់តែខ្លាំងមិនដឹងបញ្ចប់ថ្ងៃណា។
ប្រទេសទាំងពីរធ្លាប់សង្គ្រឺតធ្មេញដាក់គ្នា និងចងសត្រូវនឹងគ្នាជាយូរមកហើយ គ្រាន់តែថាពួកគេច្រើនធ្វើសង្គ្រាមប្រយោល ឬសង្គ្រាមខ្ចីដៃអ្នកដទៃប្រើ (proxy war)។ ដូច្នេះ បើប្រទេសទាំងពីរផ្ទុះសង្គ្រាមនឹងគ្នាដោយផ្ទាល់ គេខ្លាចថាសង្គ្រាមមជ្ឈិមបូព៌ានឹងផ្ទុះឡើង។ យោងតាមនាយអគ្គសេនាធិការកងទ័ពអ៊ីស្រាអែល, អ៊ីស្រាអែលនៅតែចិញ្ចឹមចិត្តថានឹងចាត់វិធានការឆ្លើយតបឱ្យខាងតែបានចំពោះការវាយប្រហារដោយយន្តហោះដ្រូន និងមីស៊ីលជាង៣០០គ្រឿងចូលទឹកដីអ៊ីស្រាអែល។
ប្រភពពីរដ្ឋាភិបាលអ៊ីស្រាអែលបង្ហើបឱ្យដឹងថាក្រុមប្រឹក្សាសង្គ្រាមដែលគ្រោងកោះប្រជុំតាំងពីថ្ងៃអង្គារត្រូវលើកមកប្រជុំនៅថ្ងៃពុធវិញ។ ឥឡូវនេះ ទំនងជាអ៊ីស្រាអែល និងសម្ព័ន្ធមិត្តកំពុងរង់ចាំមើលបំណាំគ្នាទៅវិញទៅមក។ ជាគំនិតសាកលនិយយម គ្រប់ទង្វើទាំងអស់ត្រូវតែមានផលវិបាករបស់វាដូចទ្រឹស្ដីកម្ម-ផលអីចឹង។ មានន័យថាផលនៃអំពើ។ ដូច្នេះ អ៊ីស្រាអែលកំពុងរង់ចាំមើលសិនតើសហគមន៍អន្តរជាតិជួយឈឺឆ្អាលរឿងរបស់ខ្លួនដែរឬទេនៅពេលខ្លួនរងការវាយប្រហារបែបនេះ។
ដូច្នេះដើម្បីឱ្យអ៊ីរ៉ង់ទទួលរងផលវិបាកនៃទង្វើរបស់ខ្លួនផង និងដើម្បីទប់ចិត្តរបស់អ៊ីស្រាអែលកុំឱ្យប្រព្រឹត្តទង្វើជ្រុលជ្រួសផង ប្រទេសអាមេរិក និងសហភាពអឺរ៉ុបប្រកាសពីគម្រោងដាក់ទណ្ឌកម្មអ៊ីរ៉ង់ពីបទវាយប្រហារនេះ។ អាមេរិកនឹងហាមឃាត់អ៊ីរ៉ង់មិនឱ្យលក់គ្រាប់មីស៊ីល និងយន្តហោះដ្រូនទៅឱ្យប្រទេសរុស្ស៊ីទេ។ តាមដឹងមកថាអាមេរិកត្រៀមទប់ស្កាត់អ៊ីរ៉ង់មិនឱ្យផ្ដល់ហិរញ្ញប្បទានភេរវកម្ម។ មានន័យថាមិនឱ្យអ៊ីរ៉ង់ផ្ដល់អាវុធ ឬលុយកាក់ទៅឱ្យកូនចៅរបស់ខ្លួន។
ចំណែកសហភាពអឺរ៉ុបថ្លែងថារដ្ឋជាសមាជិកខ្លះស្នើសុំឱ្យដាក់ទណ្ឌកម្មអ៊ីរ៉ង់បន្ថែមទៀត។ លោកថ្លែងថាគម្រោងដាក់ទណ្ឌកម្មថ្មីនេះនឹងហាមឃាត់មិនឱ្យអ៊ីរ៉ង់លក់យន្តហោះដ្រូន ឬគ្រាប់មីស៊ីលទៅឱ្យរុស្ស៊ី និងហាមឃាត់ការផ្ដល់អាវុធទាំងនេះទៅឱ្យកូនចៅរបស់អ៊ីរ៉ង់។ អ៊ីស្រាអែលថ្លែងថាខ្លួនបានផ្ញើកំណត់ទូតទៅប្រទេសចំនួន៣២ដើម្បីដាក់ទណ្ឌកម្មអ៊ីរ៉ង់ និងដាក់បញ្ចូលឆ្នាំបដិវត្តអ៊ីរ៉ង់ជាចលនាភេរវកម្ម។ អ៊ីរ៉ង់ប្រកាសសងសឹកវិញបើខ្លួនទទួលរងការវាយប្រហារសងសឹកពីអ៊ីស្រាអែល។
ឥឡូវនេះ សហគមន៍អន្តរជាតិគ្មានអ្វីក្រៅពីការសំណូមពរទេ។ ទាំងអគ្គលេខាធិការអង្គការសហប្រជាជាតិ, ទាំងសម្ព័ន្ធមិត្តអ៊ីស្រាអែល ទាំងប្រទេសជាមិត្តរបស់អ៊ីរ៉ង់បន្តអំពាវនាវឱ្យប្រទេសទាំងពីរខិតខំអត់ធ្មត់ជាអតិបរមា។ លោកពូទីនបាននិយាយទូរស័ព្ទទៅប្រធានាធិបតីអ៊ីរ៉ង់ដើម្បីជជែកគ្នាអំពីបញ្ហានេះ។
ចំណែកលោកបៃដិនក៏និយាយទូរស័ព្ទទៅលោកណឺតាន់យ៉ាហ៊ូផងដែរ។ លោកបៃដិនប្រាប់លោកណឺតាន់យ៉ាហ៊ូថា «បើអ៊ីស្រាអែលនៅតែជម្នះចិត្តវាយប្រហារអ៊ីរ៉ង់ អាមេរិកមិនលេងចូលទេ»។ ដូច្នេះលោកបានស្នើសុំយ៉ាងទទូចឱ្យលោកណឺតាន់យ៉ាហ៊ូពិចារណាឲ្យបានហ្មត់ចត់បំផុតអំពីហានិភ័យនៃសង្គ្រាម៕
ចែករំលែកព័តមាននេះ