តើជប៉ុនអាចនឹងហក់ឡើងខ្ពស់ក្លាយជាប្រទេសមហាអំណាចដូចមុនសង្គ្រាមលោកលើកទី២ដែរឬទេ? នៅចំពោះមុខនៃការគំរាមកំហែងនុយក្លេអ៊ែរពីសំណាក់កូរ៉េខាងជើង និងការពង្រីកឥទ្ធិពលរបស់ចិន, ជប៉ុនអាចនឹងប្រែក្លាយកាលានុវត្តភាពនេះទៅជាឱកាសដើម្បីពង្រីកឥទ្ធិពលរបស់ខ្លួនជាមហាអំណាចឡើងវិញ។ តទៅនេះជាអ្វីដែលដែលនាយករដ្ឋមន្ត្រីជប៉ុនបានថ្លែងសុន្ទរកថានៅក្នុងសភាអាមេរិកដោយរំលេចឱ្យឃើញពីការប្រមើលមើលទៅអនាគតនៃស្ថានភាពនៅអាស៊ីបូព៌ា និងនៅលើពិភពលោក។
ទីក្រុងវ៉ាស៊ីនតោន៖ កាលពីយប់មិញ នាយករដ្ឋមន្ត្រីជប៉ុន លោកគីស៊ីដា បានឡើងថ្លែងសុន្ទរកថាដ៏រំជួលចិត្តនៅក្នុងសភាអាមេរិកដោយបង្កប់សារនយោបាយសំខាន់ៗពាក់ព័ន្ធនឹងជោគវាសនា-អនាគតនៃប្រទេសជាតិរបស់លោក និងពិភពលោក។ លោកថ្លែងថាអ៊ុយក្រែនត្រូវរុស្ស៊ីវាយប្រហារសឹងតែរលំរលាយ។ រឿងនេះច្បាស់ណាស់ថាបើអ៊ុយក្រែនគ្មានជំនួយពីប្រទេសអាមេរិកទេ អ៊ុយក្រែនត្រូវតែដួលរលំនៅចំពោះមុខនៃអំពើឈ្លានពានរបស់រុស្ស៊ី។
ដូច្នេះ លោកយល់ថានេះជាមេរៀនមិនល្អទាល់តែសោះ ហើយអាចធ្វើឱ្យប្រទេសចិនកាន់តែបានចិត្ត និងដុតបញ្ឆេះសង្គ្រាមនៅអាស៊ីបូព៌ានាពេលអនាគត។ លោកគីស៊ីដាបានជំរុញឱ្យពលរដ្ឋអាមេរិកាំងកុំនៅមានមន្ទិលសង្ស័យពីតួនាទីរបស់ខ្លួននៅក្នុងឆាកនយោបាយអន្តរជាតិ។ លោកយល់ថារដ្ឋាភិបាលទីក្រុងតូក្យូកំពុងខិតខំអភិវឌ្ឍសមត្ថភាពការពារជាតិរបស់ខ្លួនដើម្បីគាំទ្រសម្ព័ន្ធមិត្តមួយនេះ។
កញ្ចប់ថវិកា៦០ពាន់លានដុល្លារសម្រាប់ជួយអ៊ុយក្រែនដែលរដ្ឋាភិបាលរបស់លោកបៃដិនបានបញ្ជូនទៅសភាដើម្បីពិនិត្យ និងអនុម័តនោះឥឡូវនេះត្រូវកំពុងនៅជាប់គាំងត្រឹមសភា។ ប្រធានរដ្ឋសភាមកពីគណបក្សសាធារណរដ្ឋ លោកម៉ាយ ចនសុន (Mike Johnson) ព្យាយាមបិទខ្ទប់មិនឱ្យមានការពិភាក្សា ឬបោះឆ្នោតអនុម័តទេ។
លោកគីស៊ីដាសូមជម្រាបប្រាប់ពលរដ្ឋអាមេរិកាំងដែលកំពុងមានអារម្មណ៍ឯកា និងហត់នឿយក្នុងការបំពេញតួនាទីជាប្រទេសដែលជួយទ្រទ្រង់សណ្ដាប់ធ្នាប់ពិភពលោក។ លោកយល់ថាអាមេរិកមានតួនាទីសំខាន់មិនអាចខ្វះបាន។ «បើគ្មានអាមេរិកទេ សួរថាតើអ៊ុយក្រែនអាចរស់បានប៉ុន្មានខ្យល់នៅក្រោមទម្ងន់ដៃនៃការវាយប្រហារយ៉ាងសង្គ្រប់របស់រុស្ស៊ី? បើគ្មានអាមេរិកខំឈរជើងទប់ទេ សួរថាតើតំបន់ឥណ្ឌូ-ប៉ាស៊ីហ្វិចនឹងជួបវិបត្តិកម្រិតណា?»
លោកយល់ថាពិភពលោកកំពុងដើរដល់ចំណុចរបត់ប្រវត្តិសាស្ត្រថ្មីមួយនៅពេលដែល៖ ទី១-សេរីភាព និងលទ្ធិប្រជាធិបតេយ្យទទួលរងការគំរាមកំហែង, ទី២-ប្រទេសរីកចម្រើនថ្មីៗចាប់ផ្ដើមមានឥទ្ធិពលសេដ្ឋកិច្ចកាន់តែខ្លាំង, ទី៣-បញ្ហាប្រែប្រួលអាកាសធាតុក៏បង្កបញ្ហាខ្លាំងសម្រាប់ពិភពលោក និងទី៤-បញ្ញាសិប្បនិម្មិត ឬអេអាយ (AI) រីកចម្រើនកាន់តែខ្លាំងអាចនឹងប៉ះពាល់ជីវិតរស់នៅរបស់មនុស្ស។
លោកគីស៊ីដាចាត់ទុកប្រទេសចិនជាបញ្ហាប្រឈមខ្លាំងបំផុត
នៅក្នុងការថ្លែងសុន្ទរកថានៅក្នុងសភាអាមេរិកនោះ លោកគីស៊ីដាឆ្លៀតរំលេចឱ្យឃើញពីការគំរាមកំហែងពីសំណាក់កម្មវិធីនុយក្លេអ៊ែររបស់កូរ៉េខាងជើង និងការផ្ដល់គ្រាប់មីស៊ីល និងគ្រាប់កាំភ្លើងធំទៅឱ្យប្រទេសរុស្ស៊ីដើម្បីវាយប្រហារអ៊ុយក្រែន។ ប៉ុន្តែនេះគ្រាន់តែជាការគំរាមកំហែងរយៈពេលខ្លី។ អ្វីដែលធំជាងនេះដែលពិភពលោកត្រូវព្រួយបារម្ភគឺការពង្រីកឥទ្ធិពលរបស់ប្រទេសចិន។
លោកថ្លែងថានយោបាយការបរទេសរបស់ចិន និងការពង្រីកកម្លាំងយោធារបស់ចិនបានក្លាយជាបញ្ហាប្រឈមធំបំផុតមិនត្រឹមតែសម្រាប់សន្តិភាព និងស្ថិរភាពរបស់ប្រទេសជប៉ុនប៉ុណ្ណោះទេ ប៉ុន្តែសម្រាប់សហគមន៍អន្តរជាតិទាំងមូល។ «អ្វីដែលកើតឡើងនៅអ៊ុយក្រែនថ្ងៃនេះអាចនឹងកើតឡើងនៅអាស៊ីបូព៌ានៅថ្ងៃស្អែក»។ ប្រទេសជប៉ុនធ្លាប់បានបង្ហាញការខ្វាយខ្វល់ពីសកម្មភាពយោធារបស់ចិននៅក្បែរកោះរបស់ជប៉ុន និងកោះតៃវ៉ាន់ដែលស្ថិតនៅមិនឆ្ងាយប៉ុន្មានពីព្រំដែនទឹកជប៉ុន៕
ប្រភព៖ Channel News Asia
ចែករំលែកព័តមាននេះ