ទីក្រុងប៉េកាំង៖ ប្រធានាធិបតីចិន លោកស៊ីជីនពីង ថ្លែងប្រាប់លោកម៉ាអ៊ីងជាវដែលបំពេញទស្សនកិច្ចឯកជនក្រៅផ្លូវការនៅប្រទេសចិនថាទោះបីអ្នកខាងក្រៅគេនិយាយអ្វីក៏និយាយចុះ។ ប៉ុន្តែប្រទេសចិននៅតែប្ដេជ្ញាមុតមាំថានឹងបង្រួបបង្រួមទឹកដីឡើងវិញឱ្យទាល់តែបាន។ ដូច្នេះ ពួកគេមិនអាចបញ្ឈប់ប្រទេសចិននៅក្នុងបញ្ហានេះបានឡើយ។ លោកម៉ាអ៊ីងជាវជាអតីតប្រធានាធិបតីតៃវ៉ាន់ និងជាអ្នកដែលចង់មានទំនាក់ទំនងល្អជាមួយចិន គ្រាន់តែថាលោកមិនគាំទ្រការរណបប្រទេសចិនទេ។
លោកស៊ីជីនពីងថ្លែងបន្តទៀតថាដែនដីទាំងពីរនេះទោះបីអាក្រក់ល្អសខ្មៅនឹងគ្នាយ៉ាងណាក៏ដោយក៏យើងនៅតែអាចនិយាយគ្នាបាន។ គ្មានអ្វីដែលថាយើងមិនអាចនិយាយគ្នាបាននោះទេ។ ចាប់តាំងពីពួកអ្នកជាតិនិយមរត់ភៀសខ្លួនទៅកោះតៃវ៉ាន់កាលពីឆ្នាំ១៩៤៩មិនដែលមានមេដឹកនាំដែលកំពុងកាន់តំណែងនៅកោះតៃវ៉ាន់រូបណាធ្វើដំណើរទៅប្រទេសចិនទេ។
លោកម៉ាធ្លាប់ជាប្រធានាធិបតីតៃវ៉ាន់ពីឆ្នាំ២០០៨-២០១៦។ កាលពីឆ្នាំ២០២៣ លោកជាអតីតប្រធានាធិបតីតៃវ៉ាន់ទី១ដែលធ្វើដំណើរទៅប្រទេសចិន។ ឥឡូវនេះទៀត លោកធ្វើដំណើរជាន់ទឹកដីចិនជាលើកទី២ចំពេលមានភាពល្អក់កករនឹងគ្នារវាងចិន និងតៃវ៉ាន់កាន់តែខ្លាំង។ តាំងពីមុនកិច្ចជំនួបរវាងលោកម៉ា និងលោកស៊ីជីនពីងនេះទៅទៀត គេទាយគ្រប់មាត់ថាអ្នកទាំងពីរប្រាកដជាជួបគ្នាជាមិនខានឡើយ។ លោកទាំង២ធ្លាប់ជួបគ្នាក្រៅផ្លូវការម្ដងនៅប្រទេសសិង្ហបុរីកាលពីចុងឆ្នាំ២០១៥។
នៅក្នុងកិច្ចជំនួបនៅរសៀលថ្ងៃពុធរវាងលោកស៊ីជីនពីង និងលោកម៉ានៅវិមានប្រជាជនចិននៃទីក្រុងប៉េកាំង លោកស៊ីជីនពីងថ្លែងថាប្រជាជនចិន និងតៃវ៉ាន់សុទ្ធតែមានឈាមជ័រជាជនជាតិចិនតែមួយ។ លោកចង់មានន័យថាអ្នកខាងក្រៅចង់ជ្រៀតជ្រែកយ៉ាងណាក៏មិនអាចធ្វើអ្វីយើងកើតដែរ។ សំខាន់ឱ្យតែយើងចេះរួបរួមសាមគ្គីគ្នាជាមហាគ្រួសារតែ១។ ប្រសាសន៍របស់លោកស៊ីជីនពីងត្រង់ចំណុចនេះត្រូវសារព័ត៌មាននៅកោះតៃវ៉ាន់យកទៅចុះផ្សាយយ៉ាងព្រោងព្រាត។
លោកថ្លែងដោយសង្ខេបៗតែប៉ុណ្ណឹងដោយមិនធ្វើអត្ថាធិប្បាយលម្អិតពេកទេ។ ប៉ុន្តែគេអាចកាត់យល់ថាភាសារបស់រដ្ឋាភិបាលចិនត្រង់ចំណុចនៃការជ្រៀតជ្រែកពីខាងក្រៅនេះចង់សំដៅលើក្រុមបស្ចិមប្រទេសដែលតែងតែគាំទ្រកោះតៃវ៉ាន់។ ឧទាហរណ៍ដូចជាប្រទេសអាមេរិកជាដើម។ អាមេរិកលក់អាវុធទៅឱ្យតៃវ៉ាន់ ហើយធ្វើឱ្យចិនខឹងសម្បារយ៉ាងខ្លាំង។ លោកស៊ីជីនពីងថ្លែងប្រាប់លោកម៉ាអ៊ីងជាវថាយើងជាជនជាតិតែមួយ។ ដូច្នេះ គ្មានអ្វីដែលយើងមិនអាចដោះស្រាយបានឡើយ, គ្មានបញ្ហាអ្វីដែលយើងមិនអាចពិភាក្សាគ្នាបានឡើយ ហើយក៏គ្មានកម្លាំងអ្វីដែលអាចបំបែកបំបាក់ពួកយើងបានឡើយ។
ប្រទេសចិនបានចិញ្ចឹមចិត្តតាំងពីយូរមកហើយថាត្រូវតែយកកោះតៃវ៉ាន់មកគ្រប់គ្រងឱ្យខាងតែបាន។ បើបង្រួបបង្រួមទឹកដីដោយធម៌ត្រជាក់មិនបានទេ មានតែប្រើធម៌ក្ដៅ។ មានន័យថាប្រើកម្លាំងទ័ពវាយចូលកោះតៃវ៉ាន់។ រឿងនេះច្បាស់ណាស់មិនអាចលេងសើចបានទេ។ សូម្បីតែប្រទេសអាមេរិកក៏ធ្លាប់ទស្សន៍ទាយថាប៉ុន្មានឆ្នាំខាងមុខនេះប្រទេសចិននឹងវាយតៃវ៉ាន់។
លោកម៉ាអ៊ីងជាវជម្រាបប្រាប់លោកស៊ីជីនពីងថានៅពេលមានភាពតានតឹងរវាងចិន និងតៃវ៉ាន់ធ្វើឱ្យប្រជាជនតៃវ៉ាន់ភ័យបុកពោះមិនស្ទើរទេ។ លោកថ្លែងបន្តទៀតថាបើផ្ទុះសង្គ្រាមរវាងចិន និងតៃវ៉ាន់ ប្រជាជនចិនពិតជាជួបការលំបាកយ៉ាងខ្លាំង។ លោកយល់ថាប្រជាជនចិន និងតៃវ៉ាន់ចង់ដោះស្រាយជម្លោះដោយសន្តិវិធី ហើយចង់ជៀសវាងការប្រទាំងប្រទើសគ្នា។
ជាការបញ្ចេញប្រតិកម្មតបទៅនឹងការជួបគ្នានេះ តៃវ៉ាន់សោកស្ដាយមិនគួរលោកម៉ាអ៊ីងជាវបានជ្រុលទៅដល់ប្រទេសចិន និងជួបទល់មុខគ្នាជាមួយលោកស៊ីជីពីងទៅហើយលោកបែរជាមិនបានពាំនាំនូវការប្ដេជ្ញាចិត្តរបស់ប្រជាជនតៃវ៉ាន់ដែលត្រៀមការពារអធិបតេយ្យភាពជាតិ និងលទ្ធិប្រជាធិបតេយ្យរបស់ខ្លួន។ ការិយាល័យទំនាក់ទំនងជាមួយចិនដីគោកដែលមានទីស្នាក់ការនៅតៃវ៉ាន់ថ្លែងថារដ្ឋាភិបាលចិនគួរឈប់ប្រើភាសាគំរាមកំហែង ហើយគួរដោះស្រាយការខ្វែងគំនិតគ្នាដោយសន្តិវិធី៕
ប្រភព៖ Reuters និងប្រភពដទៃទៀត
ចែករំលែកព័តមាននេះ