យោងតាមតារាងចំណាត់ថ្នាក់នៃការផឹកគ្រឿងស្រវឹងរបស់នារី នៅអាស៊ីអាគ្នេយ៍ ដែលចេញផ្សាយដោយ SEA Rising បានបង្ហាញថា នារីនៅក្នុងប្រទេសកម្ពុជាឈរនៅចំណាត់ទី៣ ក្រោមនារីថៃ និងនារីឡាវ ។
SEA Rising បានបង្ហោះតារាងចំណាត់ខាងលើ កាលពីថ្ងៃទី០៨ ខែមេសា ឆ្នាំ២០២៤ ដោយសរសេរជាភាសាអង់គ្លេសថា Female alcohol consumption in Southeast Asia ហើយ តារាងចំណាត់ថ្នាក់នេះ ត្រូវបានទំព័រហ្វេសបុក SEA Rising យោងតាមប្រភពពីរបាយការណ៍ worldpopulationreview គិតត្រឹមថ្ងៃទី០៩ ខែកុម្ភៈ ឆ្នាំ២០២៤ ។
តាមរយៈតារាងចំណាត់នោះ បង្ហាញថា ៖ – លេខ១ នារីឡាវ ម្នាក់ផឹកស្រាអស់៥.០៩លីត្រក្នុងមួយឆ្នាំ លេខ២នារីថៃ ម្នាក់ផឹកស្រាអស់៣.៦១លីត្រក្នុងមួយឆ្នាំ ចំណែកលេខ ៣នារីកម្ពុជា ម្នាក់ផឹកស្រាអស់ ៣.២១លីត្រក្នុងមួយឆ្នាំ លេខ៤នារីវៀតណាម ម្នាក់ផឹកស្រាអស់៣.១៩លីត្រ ក្នុងមួយឆ្នាំ លេខ៥នារីហ្វីលីពីន ម្នាក់ផឹកស្រាអស់២.៨៧ លីត្រក្នុងមួយឆ្នាំ លេខ៦ នារីសិង្ហបុរី ម្នាក់ផឹកស្រាអស់០.៩៩ លីត្រក្នុងមួយឆ្នាំ លេខ៧ នារីមីយ៉ាន់ម៉ា ម្នាក់ផឹកស្រាអស់០.៨៥ លីត្រក្នុងមួយឆ្នាំ លេខ៨នារីម៉ាឡេស៊ី ម្នាក់ផឹកស្រាអស់ ០.៣៥ លីត្រក្នុងមួយឆ្នាំ លេខ៩ នារីទីម័រ និងនារីប្រុយណេ ម្នាក់ផឹកស្រាអស់០.២១លីត្រក្នុងមួយឆ្នាំ លេខ១០ នារីឥណ្ឌូនេស៊ី ម្នាក់ផឹកស្រាអស់ ០.០៦លីត្រក្នុងមួយឆ្នាំ ។
គួររំលឹកថា មូលហេតុដែលប្រទេសឡាវ ដែលជាប្រទេសក្រីក្រជាងគេមួយនៅតំបន់អាស៊ាន ប៉ុន្តែបែរជានាំមុខគេរឿងនារីផឹកស្រាច្រើននោះ ត្រូវបានសារព័ត៌មានរដ្ឋឡាវ laotiantimes អះអាងថា ភេសជ្ជៈមានជាតិអាល់កុល ដើរតួយ៉ាងសំខាន់ក្នុងវប្បធម៌នៃការទំនាក់ទំនងនៅក្នុងសង្គមឡាវ ហើយគ្រឿងស្រវឹងមិនត្រឹមតែត្រូវបានចាត់ទុកជាមធ្យោបាយនៃបដិសណ្ឋារកិច្ចប៉ុណ្ណោះទេ ប៉ុន្តែស្រា ថែមទាំងជួយឱ្យមនុស្សងាយចូលចុះគេចុះឯង ។ ភាពពេញនិយមរបស់ស្រា នៅប្រទេសឡាវ បានឈានដល់កម្រិតថ្មីមួយដែលត្រូវបានទទួលស្គាល់ជាសកលថា ជាប្រទេសដែលផឹកស្រវឹងខ្ពស់ ។
ជាក់ស្តែងចំណាត់ថ្នាក់លេខមួយ នៅអាស៊ីអាគ្នេយ៍ក្នុង «ការប្រើប្រាស់គ្រឿងស្រវឹងសម្រាប់នារី» ចំណាត់ថ្នាក់នេះ មិនបានបង្កើតភាពភ្ញាក់ផ្អើលដល់ស្រទាប់ប្រជាជនឡាវនោះទេ ព្រោះគេអាចទាយដឹងមុខថា ជារឿងដែលនឹងកើតឡើងដោយជៀសមិនរួច ព្រោះវប្បធម៌នៃការផឹកស្រារបស់ប្រជាជនឡាវ ។
ជុំវិញចំណាត់ថ្នាក់នេះ ត្រូវបានកញ្ញា Chantina Tinanoii ហៅក្រៅថា Tina ជាអ្នកជំនាញផ្នែកបរិស្ថាននិងសង្គមឡាវ បានកត់សម្គាល់ឃើញថា យុវជនជាច្រើននៅទីក្រុងវៀងចន្ទន៍ កំពុងព្យាយាមជៀសវាងការសេពគ្រឿងស្រវឹង ប៉ុន្តែវាសមហេតុផល ដោយសារយើងមានចំនួនស្ត្រីច្រើនជាងបុរស» ។
កញ្ញា Tina ថា តាមធម្មជាតិប្រជាជនឡាវមានភាពអៀនខ្មាសច្រើន ដូចនេះហើយការផឹកស្រា គឺជាមធ្យោបាយជួយឱ្យពួកគេក្លាហានក្នុងការសប្បាយ និងនិយាយដោយបើកចំហនូវមតិយោបល់របស់ពួកគេក្នុងអំឡុងពេលជួបជុំ ។
ដោយឡែក លោក Siphachan Sawatvong ហៅកាត់ថា Max ជានិស្សិតថ្នាក់អនុបណ្ឌិត IT ដែលពិភាក្សាអំពីផលប៉ះពាល់នៃគ្រឿងស្រវឹងលើអន្តរកម្មសង្គមបានអះអាងថា៖ «ខ្ញុំមិនប្រាកដថា ការផឹកជាមធ្យោបាយក្នុងសង្គមទេ ប៉ុន្តែតាមការសង្កេតរបស់ខ្ញុំ ក្នុងពិធីជប់លៀង មនុស្សម្នាតែងតែស្វាគមន៍គ្នាដោយជល់កែវ ។ Max ទទួលស្គាល់សក្តានុពលសម្រាប់ភេសជ្ជៈ ដើម្បីពង្រឹងចំណងមិត្តភាពដោយនិយាយថា «នៅពេលដែលយើងផឹក វាជាឱកាសពិសេសរួចទៅហើយវានាំឱ្យយើងស្និទ្ធស្នាលជាមួយគ្នា»។
ទោះជាយ៉ាងណាក៏ដោយ Max ក៏បានគូសបញ្ជាក់ពីជ្រុងមួយនៃវប្បធម៌ផឹកស្រា នៅទូទាំងតំបន់អាស៊ីអាគ្នេយ៍ថា «ខ្ញុំបានឃើញមនុស្សមួយចំនួនបង្ខំឱ្យអ្នកផ្សេងទៀតផឹក… ហើយបើយើងបដិសេដមិនផឹក ពួកគេនឹងនិយាយពីក្រោយខ្នងថា គ្រាន់តែមួយកែវសោះ វៃឫកណាស់អានេះ ។ នៅក្នុងហ្វូងអ្នកផឹក ប្រសិនបើយើងមិនចេះផឹក ឬយើងប្រកែកមិនផឹក គឺយើងត្រូវប្រឈមមុខនឹងសម្ពាធ ការរើសអើង និងមិនចុះចំណោមគេ ។ ជុំវិញបញ្ហានេះ Max លើកទឹកចិត្តដល់អ្នកផឹកស្រា គោរពដល់ជម្រើសរបស់អ្នកដែលមិនដែលផឹកស្រា ៕ ដោយ៖ អោម ចែតច័ន្ទណារ៉ា
ចែករំលែកព័តមាននេះ