ទីក្រុងបាងកក៖ កាលពីល្ងាចថ្ងៃអង្គារនេះ តុលាការថៃចាប់ផ្តើមបើកសវនាការការកាត់ក្តីករណីចោទប្រកាន់កូនប្រុសរបស់តារាសម្ដែងជនជាតិអេស្ប៉ាញម្នាក់ពីបទមនុស្សឃាតទៅលើបុរសជនជាតិកូឡុំប៊ីម្នាក់ និងកាត់សាកសពជនរងគ្រោះជាកង់ៗនៅលើកោះទេសចរណ៍ដ៏ពេញនិយម។ កាលពីខែតុលា បុរសឈ្មោះដានីញែល សាន់ឆូ (Daniel Sancho Bronchalo) អាយុ២៩ឆ្នាំត្រូវព្រះរាជអាជ្ញាចោទប្រកាន់ពីបទសម្លាប់បុរសឈ្មោះអេតវីន (Edwin Arrieta Arteaga)។
សំណុំរឿងមនុស្សឃាតនេះបានបែកការណ៍នៅពេលគេរកឃើញឆ្អឹងឆ្អែង និងសរីរៈរាងកាយរបស់ជនរងគ្រោះដែលកាលនោះគេមិនស្គាល់អត្តសញ្ញាត្រូវគេច្រកក្នុងថង់ប្លាស្ទិច និងយកទៅបោះចោលនៅកន្លែងចាក់សំរាមនៃកោះផាង៉ាន (Pha Ngan)។ ទីនេះជាតំបន់ទេសចរណ៍ដែលល្បីណាស់សម្រាប់អ្នកនិយមចូលចិត្តរៀបចំពិធីជួបជុំ និងជប់លៀងផ្សេងៗ។
លោកមេធាវីជូអាន (Juan Gonzalo Ospina Serrano) ជាតំណាងឱ្យគ្រួសារជនរងគ្រោះបានប្រាប់អ្នកសារព័ត៌មាននៅតុលាការសាលាដំបូងថាគ្រួសារជឿជាក់ថាព្រះរាជអាជ្ញាថៃនឹងជួយរកយុត្តិធម៌ឱ្យជនរងគ្រោះ។ លោកថ្លែងថា៖ «ពួកគេអរគុណការឈឺឆ្អាលរបស់ព្រះរាជអាជ្ញា ហើយសង្ឃឹមថាច្បាប់ប្រទេសថៃនឹងអនុវត្តដោយស្មើភាព។ ពួកគេសង្ឃឹមថានឹងដឹងការពិតជាមិនខាន»។
ជនជាប់ចោទរូបនេះត្រូវបានចោទប្រកាន់ជាច្រើនករណីមានតាំងពីអំពើមនុស្សឃាតគិតទុកជាមុន, ការលាក់បាំងសាកសព និងការបំផ្លិចបំផ្លាញឯកសាររបស់អ្នកដទៃ។ ជនជាប់ចោទរូបនេះត្រូវបានចោទប្រកាន់ថាបានបំផ្លាញលិខិតឆ្លងដែនរបស់ជនរងគ្រោះ។ ចំពោះបទចោទប្រកាន់ទាំងបីករណីនេះ ជនជាប់ចោទបដិសេធថាខ្លួនមិនបានសម្លាប់ និងបំផ្លាញឯកសាររបស់ជនរងគ្រោះទេ។ ប៉ុន្តែជនជាប់ចោទទទួលស្គាល់ថាខ្លួនពិតជាបានលាក់បំពួនសាកសពរបស់ជនរងគ្រោះពិតប្រាកដមែន។
យោងតាមច្បាប់ប្រទេសថៃ អំពើមនុស្សឃាតគិតទុកជាមុនត្រូវផ្ដន្ទាទោសប្រហារជីវិត, ការបំផ្លិចបំផ្លាញឯកសារអ្នកដទៃត្រូវជាប់ពន្ធនាគារ៥ឆ្នាំ និងពិន័យជាប្រាក់១សែនបាត, ការលាក់បំពួនសាកសព ឬរំខានសាកសពដូចជាករណីកាត់សាកសពជាកង់ៗបែបនេះត្រូវជាប់ពន្ធនាគារ១ឆ្នាំ និងពិន័យជាប្រាក់២ម៉ឺនបាត។ លោកអភិឆាត ស៊ីនូល (Apichart Srinual) ជាមេធាវីតំណាងឱ្យជនជាប់ចោទប្រាប់ថាការបើកសវនាការកាលពីល្ងាចថ្ងៃអង្គារនោះផ្ដោតសំខាន់ទៅលើការផ្ដល់សក្ខីកម្មពីសំណាក់សាក្សី។
ចំពោះសំណួរថាតើលោកមានទំនុកចិត្តដែរឬទេថាអាចការពារក្ដីឱ្យជនជាប់ចោទដោយជោគជ័យ? លោកអភិឆាតឆ្លើយតបថាវាអាស្រ័យទៅលើភស្តុតាងដាក់បន្ទុក។ ឥឡូវនេះឃើញថាសាក្សីមានច្រើនណាស់។ អ្វីៗអាស្រ័យទៅលើការផ្ដល់សក្ខីកម្មរបស់ពួកគេ។ ជនជាបចោទត្រូវគេដឹកតាមរថយន្តបិទកញ្ចក់ខ្មៅជិតឈឹងចូលទៅក្នុងបរិវេណតុលាការ។
តារាភាពយន្តអេស្ប៉ាញ លោករ៉ូដុលហ្វូ (Rodolfo Sancho) ដែលត្រូវជាឪពុកជនជាប់ចោទក៏ធ្វើដំណើរទៅតាមដានដំណើរការកាត់ក្ដីនេះផងដែរ។ សម្រាប់ពេលនេះ លោកសូមមិនធ្វើអត្ថាធិប្បាយអ្វីទាំងអស់។ ជនជាប់ចោទឈ្មោះដានីញែល សាន់ឆូ ((Daniel Sancho) ម្នាក់នេះធ្លាប់ជាមេចុងភៅ។ គាត់ត្រូវសមត្ថកិច្ចថៃចាប់ខ្លួនកាលពីខែសីហា ឆ្នាំ២០២៣ បន្ទាប់ពីគេរកឃើញសីរៈរាងកាយរបស់ជនរងគ្រោះវ័យ៤៤ឆ្នាំនៅកន្លែងចាក់សំរាម។
ជនជាប់ចោទរូបនេះរាយការណ៍ប្រាប់សមត្ថកិច្ចពីករណីបាត់ខ្លួនជនរងគ្រោះ។ ប៉ុន្តែដោយសារមានចំណុចសង្ស័យជាច្រើន សមត្ថកិច្ចក៏ចាប់ខ្លួនគាត់តែម្ដង។ ក្រោយមក គាត់ឆ្លើយសារភាពថាបានសម្លាប់ និងកាត់សាកសពជនរងគ្រោះជាកង់ៗយកទៅបោះចោលនៅកន្លែងចាក់សំរាមខ្លះ និងគ្រវាត់ចោលនៅក្នុងទឹកសមុទ្រខ្លះ។ ទោះជាយ៉ាងណាក្ដី គាត់ប្រាប់ថាគាត់ធ្វើនេះដោយគ្មានគម្រោងគិតទុកជាមុនទេ៕
ប្រភព៖ AP
ចែករំលែកព័តមាននេះ