ទីក្រុងញូយ៉ក៖ នេះជាផ្នែកមួយនៃការបម្លែងកាលានុវត្តភាពទៅជាឱកាស។ ឆ្លៀតពេលមនុស្សរាប់លាននាក់សប្បាយនឹងការទស្សនាបាតុភូតសូរ្យគ្រាសដែលកើតមាននៅលើទឹកដីម៉ិកស៊ីកូ, កាណាដា និងអាមេរិកកាលពីយប់មិញ មនុស្សមួយចំនួនបានជ្រើសរើសយកពេលវេលានោះដើម្បីរៀបការ ឬភ្ជាប់ពាក្យជាមួយគ្នា។ គេដឹងថាមានគូស្នេហ៍យ៉ាងតិច២គូបានរៀបការ និងភ្ជាប់ពាក្យនៅល្បាក់ទឹកនីញ៉ាហ្ការ៉ា ដែលស្ថិតនៅចន្លោះព្រំដែនម៉ិកស៊ីកូ និងអាមេរិក។
នៅវេលានោះ គេប៉ាន់ស្មានថាមានអ្នកទេសចរពីរពាន់នាក់រង់ចាំទស្សនាសូរ្យគ្រាសនៅល្បាក់ទឹកនោះ។ ដោយឡែកនៅរដ្ឋអូហៃយ៉ូ (Ohio) ប្រទេសអាមេរិក គេឃើញថាគូស្នេហ៍យ៉ាងតិចម្ភៃគូបានជ្រើសរើសយកពេលវេលាដែលព្រះចន្ទបាំងជិតព្រះអាទិត្យធ្វើឱ្យផ្ទៃមេឃងងឹតឈឹងដើម្បីរៀបមង្គលការជាមួយគ្នានៅសួនឧទ្យានជាតិទីក្រុងត្រឹនតុន (Trenton) ក្រោមអធិបតីភាពរបស់ចៅហ្វាយក្រុងផ្ទាល់តែម្ដង។ នៅទីនេះ គេឃើញភ្ញៀវទេសចររាប់រយនាក់ដែលរង់ចាំមើលសូរ្យគ្រាស ហើយក៏ឆ្លៀតចូលរួមពិធីមង្គលការនោះតែម្ដង។
កូនក្រមុំម្នាក់ឈ្មោះសាមន្ថា ផាមមើ (Samantha Palmer) ដែលទើបតែផ្លាស់ពីទីក្រុងដេឌ្រ័រ (Detroit) ទៅរដ្ឋអូហៃយ៉ូជាមួយស្វាមីដែលទើបតែរៀបការនៅក្រោមបរិយាកាសសូរ្យគ្រាសនោះប្រាប់ថានេះជាគម្រោងរៀបការដែលទើបតែសម្រេចចិត្តភ្លាមៗតែប៉ុណ្ណោះ។ ដូច្នេះអ្នកទាំង២មិនបានរៀបគម្រោងធំដុំប៉ុន្មានទេ។ គ្រាន់តែគិតគ្នាមួយភ្លែត ពួកគេក៏រៀបការតែម្ដង។
យើងមិនសូវមានពេលច្រើនដើម្បីរៀបគម្រោងនេះទេ។ កាលពីព្រឹកថ្ងៃសុក្រ យើងគិតថាប្រហែលជាមានមនុស្សរៀបការនៅពេលមានសូរ្យគ្រាស។ ដូច្នេះ ពួកយើងចាំអង្កាល់ទៀត? រៀបការនៅក្នុងពេលនោះតែម្ដងទៅ! កាលនោះហាក់ដូចជាមានអ្វីមកអន្ទងចិត្តយើងឱ្យគិតគូរអំពីគម្រោងនេះតែម្ដង។ ឥតបង្អង់យូរ អ្នកទាំងពីរក៏ធ្វើដំណើរទៅទិញខោអាវអាពាហ៍ពិពាហ៍តែម្ដង។
ងាកមកមើលកូនកំលោះ-កូនក្រមុំមួយគូទៀតគឺលោករ៉ូបឺត (Robert) និងភរិយារបស់គាត់ឈ្មោះរ៉ាឆែល (Rachel) រស់នៅរដ្ឋអូហៃយ៉ូ។ ពួកគេរៀបការចំពេលសូរ្យគ្រាសផុតរលត់ទៅវិញនៅនាទីចុងក្រោយដើម្បីឱ្យដាច់ស្រឡះពីគូស្វាមី-ភរិយាដទៃទៀត។ នៅអូហៃយ៉ូ សូរ្យគ្រាសបាំងបិទផ្ទៃមេឃឱ្យងងឹតឈឹងរយៈពេលប្រហែលបីនាទី។ ពេលនោះ គូស្វាមី-ភរិយារាំកម្សាន្ត និងស្រែកអបអរសាទរ។ អ្នកខ្លះមានអារម្មណ៍ហោះហើរប្រៀបបាននឹងចក្រវាឡនេះមានតែគូស្នេហ៍របស់ពួកគេតែពីរនាក់។
បាតុភូតសូរ្យគ្រាសពេញនៅអាមេរិកពិតជាមានអត្ថន័យជ្រាលជ្រៅ និងជាករណីកម្រ។ ជានិច្ចកាល សូរ្យគ្រាសកើតមាននៅតំបន់ខុសៗគ្នារៀងរាល់១១ទៅ១៨ខែម្ដង។ ប៉ុន្តែដែលគេចាត់ទុកថាមានលក្ខណៈពិសេសនៅត្រង់ថាសូរ្យគ្រាសលើកនេះមានសភាពងងឹតឈឹងមានន័យថាព្រះចន្ទបាំងព្រះអាទិត្យជិត និងមានមនុស្សរាប់លាននាក់ត្រៀមខ្លួនចាំមើលសូរ្យគ្រាស។
ពលរដ្ឋអាមេរិកធ្លាប់មើលសូរ្យគ្រាសកាលពីឆ្នាំ២០១៧ម្ដង និងលើកនេះម្ដងទៀត។ ពួកគេត្រូវរង់ចាំរហូតដល់ឆ្នាំ២០៤៥ទើបមានឱកាសមើលសូរ្យគ្រាសម្ដងទៀត។ នេះជាបាតុភូតសូរ្យគ្រាសឆ្លងកាត់តំបន់អាមេរិកខាងត្បូងប្រកបដោយទស្សនីយភាពដ៏ធំទូលាយ និងអូសបន្លាយពេលយូរដល់រាប់ម៉ោងទម្រាំផុតរលត់ទៅវិញ។ មនុស្សប្រហែលពីររយលាននាក់រស់នៅចំតំបន់សូរ្យគ្រាសឆ្លងកាត់ ឬនៅក្បែរៗនោះអាចមានឱកាសទស្សនាបាតុភូតនេះ៕
ប្រភព៖ India TV News
ចែករំលែកព័តមាននេះ