ថៃ ៖ ឧប្បទេវហេតុធរណីស្រុតដ៏កម្រមួយត្រូវបានគេរាយការណ៍ថា បានកើតមានឡើងនៅប្រទេសថៃ លើកំណាត់ផ្លូវក្នុងទីប្រជុំជនដ៏មមារញឹកមួយកន្លែង ក្រោមស្ពានរ៉ាម៉ាទី៤ ក្នុងស្រុកប៉ាកក្រិត ខេត្តនន់ថាបុរី។
សារព័ត៌មានថៃជាច្រើនមានដូចជា The Nation និង PBS World បានបញ្ជាក់អោយដឹងថា ឧប្បទេវហេតុនេះបានកើតឡើងកាលពីវេលាម៉ោង១១ និង២៥នាទីព្រឹក ថ្ងៃទី០៧ ខែមេសា ឆ្នាំ២០២៤ ដែលជំរុញឱ្យអាជ្ញាធរប្រកាសបិទផ្អាកចរាចរណ៍ទាំងស្រុង ដែលនាំឱ្យការកកស្ទះចរាចរណ៍យ៉ាងខ្លាំង។ ការបិទផ្លូវធ្វើឡើងដើម្បីបង្ការគ្រោះថ្នាក់ផ្សេងៗ និងបើកការស៊ើបអង្កេតលើមូលហេតុ ។
តាមរយៈវីដេអូពីកាមេរ៉ាសុវត្ថិភាពបង្ហាញថា ស្របពេលដែលមានយានយន្តជាច្រើនគ្រឿង កំពុងធ្វើដំណើរឆ្លងកាត់ផ្លូវខាងលើ ខណៈមានបុរសម្នាក់ជិះម៉ូតូជាមួយកូនស្រី ហើយកំពុងថយម៉ូតូបកក្រោយ ស្រាប់តែផ្លូវនោះ បាក់ស្រុងចុះក្រោម នឹងធ្លាយទឹកចេញមក ។ មុនពេលបាក់ស្រុតតែប៉ុន្មានវិនាទីប៉ុណ្ណោះ យុវជនម្នាក់ដែលដើរ ចុចទូរស័ព្ទគឺទើបតែដើរផុត ខណៈរថយន្តពណ៌សមួយគ្រឿងទៀតត្រូវបានផ្លូវបាក់ស្រុតក្បែរកង់ខាងមុខទាំងពីរ ក៏រ៉ឺយែថយក្រោយដោយសុវត្ថិភាព ។
ក្រោយឃើញឳពុកកូនដែលជិះម៉ូតូស្ថិតនៅក្នុងកន្លែងបាក់ស្រុង មនុស្សម្នានៅក្បែរនោះក៏ប្រញាប់ប្រញាល់ទៅជួយ ដោយយកក្មងស្រីមកដាក់នៅម្ខាង ហើយជួយទាញម៉ូតូឡើងលើចិញ្ចើមផ្លូវ ។
លោក Panupong Bantasak សមាជិកក្រុមប្រឹក្សាក្រុងប៉ាក់ក្រិតបានឱ្យដឹងថា ទោះបីជាករណីនេះមិនមានអ្នកណារងរបួស ប៉ុន្តែវាបានប៉ះពាល់ដល់ហេដ្ឋារចនាសម្ពន័នៅក្នុងវត្ត ដោយខ្លោងទ្វារ និងជញ្ជាំងព្រះវិហារត្រូវបានគេឃើញមានស្នាមប្រេះ ។
ពេលចុះត្រួតពិនិត្យ សមត្ថកិច្ចបានរកឃើញថា ផ្លូវដែលបាក់ស្រុតមានជម្រៅប្រហែល៤ម៉ែត្រ ទទឹង១៥ម៉ែត្រ មានទឹកហូរចូលរន្ធ។ គេសង្ស័យថាទឹកនេះហូរចេញពីទន្លេចៅប្រាយ៉ា ។
បើតាមអ្នកស្រុករស់នៅក្នុងតំបន់កើតហេតុបានបង្ហើបប្រាប់អ្នកសារព័ត៌មានថា មូលហេតុដែលបណ្តាលឲ្យបាក់ផ្លូវនេះ ត្រូវបានគេសន្និដ្ឋានថា មកពីកត្តា៣ ទី១ គឺការដាច់បំពង់ទុយោទឹកស្អាតកាលពីពាក់កណ្តាលយប់ថ្ងៃទី៥ មេសា ទី២ គឺបណ្តាលឱ្យដីដែលភាគច្រើនគឺជាដីខ្សាច់ និងទី៣ កត្តាទីតាំង ព្រោះកើតហេតុស្ថិតនៅចំងាយប្រហែល១០០ម៉ែត្រ ពីទន្លេចៅប្រាយ៉ា ដែលអាចបណ្តាលឲ្យទឹកពីទន្លេចៅប្រាយ៉ាហូរច្រោះ ។
បន្ថែមលើនេះ លោកវរសេនីយ៍ទោ ថាផាន់ ណាផុង ភឿងម៉ី អធិការនគបាលចរាចរណ៍ផ្លូវគោកនៃស្នងការដ្ឋាននគរបាលខេត្តប៉ាកក្រេតបានឲ្យដឹងថា កាលពីប៉ុន្មានថ្ងៃមុន ផ្លូវនេះទើបតែត្រូវបានគេគាស់កាយដើម្បីតបណ្តាញអគ្គិសនី ប៉ុន្តែមូលហេតុពិតយ៉ាងណានោះ នៅមិនទាន់អាចបញ្ជាក់បាននៅឡើយទេ។ លោកថា អាជ្ញាធរពាក់ព័ន្ធនឹងធ្វើការស៊ើបអង្កេតឲ្យបានហ្មត់ចត់ ដើម្បីបញ្ជាក់ពីមូលហេតុពិតប្រាកដ ដោយសន្យាថា ការងារនេះនឹងពន្លឿនការងារនេះឱ្យបានឆាប់រហ័ស ។
គួររំលឹកថា ហេតុការណ៍ស្រដៀងគ្នានេះ ធ្លាប់បានកើតឡើងម្តងរួចមកហើយនៅក្បែរទីតាំងខាងលើ ពោលគឺកាលពីខែវិច្ឆិកា ឆ្នាំ២០២៣កន្លងទៅ ៕
ចែករំលែកព័តមាននេះ