បុ.ករត់ទៀតហើយ! ឡានព្រូសបុ.កពីក្រោយម៉ូតូមួយគ្រឿង រួចគេចបាត់
- ភ្នំពេញ
រាជធានីភ្នំពេញ ៖ យុវជនម្នាក់បានរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ
រាជធានីភ្នំពេញ ៖ យុវជនម្នាក់បានរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ បន្ទាប់ពីជួបគ្រោះថ្នាក់ចរាចរណ៍រវាងរថយន្តបុកពីក្រោយម៉ូតូមួយគ្រឿងយ៉ាងពេញទំហឹង រួចរថយន្តបើកគេចបាត់ស្រមោល ។
ហេតុការណ៍ខាងលើនេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី ០៨ ខែមេសា ឆ្នាំ២០២៤ នៅក្បែរផ្សាររាត្រី ក្នុងតំបន់អភិវឌ្ឍន៍បឹងកក់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីសន្តិសុខក្បែរកន្លែងកើតហេតុបានឱ្យដឹងថា មុនពេលកើតហេតុ គេឃើញម៉ូតូមួយគ្រឿងម៉ាកហុងដាឌ្រីម ពណ៏ខ្មៅ ពាក់ស្លាកលេខ ភ្នំពេញ 1G-6749 បើកបរដោយយុវជនម្នាក់ ធ្វើដំណើរតាមបណ្ដោយផ្លូវ១១៣ ក្នុងគោលដៅទៅផ្ទះនៅព្រែកលាភ លុះមកដល់ត្រង់ចំណុចកើតហេតុ ជាផ្លូវបំបែកជាបួន យុវជនខាងលើបានបត់ឆ្លង បានពាក់កណ្ដាលផ្លូវ ក៏ស្រាប់តែមានរថយន្តមួយគ្រឿង ម៉ាកព្រូស ពណ៌ស មិនចាំស្លាកលេខ បើកតាមបណ្ដោយផ្លូវ៦១៦ បើកក្នុងល្បឿនលឿន បានទៅបុកពីក្រោយម៉ូតូយ៉ាងពេញទំហឹង បណ្ដាលឱ្យយុវជនជាអ្នកបើកម៉ូតូ បាក់ជើងឆ្វេង រងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត្រភ្លាមៗផងដែរ ។ ចំណែករថយន្តបង្កបានបើកគេចចេញពីកន្លែងកើតហេតុបាត់ស្រមោល ។
ក្រោយកើតហេតុ សមត្ថកិច្ចមូលដ្ឋានបានចុះមកវាស់វែងយកម៉ូតូទៅរក្សាទុកនៅប៉ុស្តិ៍នគរបាលស្រះចក រួចស្រាវជ្រាវតាមកាមេរ៉ាសុវត្ថិភាព ដើម្បីស្វែងរករថយន្តបង្ក យកមកចាត់ការតាមផ្លូវច្បាប់ ៕ (ដោយ ៖ រដ្ឋា)
ចែករំលែកព័តមាននេះ