ខេត្តកំពង់ស្ពឺ ៖ ដូចយើងគ្រប់គ្នាដឹងហើយថា ចាប់តាំងពីផ្លូវល្បឿនលឿន រាជធានីភ្នំពេញ-ខេត្តព្រះសីហនុ ដាក់ឲ្យធ្វើចរចរណ៍នោះ ការធ្វើដំណើរតាមផ្លូវជាតិលេខ៤ ហាក់ស្ងប់ស្ងាត់បាត់បង់យានយន្តឆ្លងដែលបង្កផលប៉ះពាល់ជាខ្លាំងដល់បងប្អូនដែលប្រកបរបរលក់ដូរតាមដងផ្លូវ ជាពិសេសអាហារដ្ឋានជាច្រើន នៅតំបន់ពេជ្យនិលត្រូវបានបិទទ្វារជាបន្តបន្ទាប់…
ខេត្តកំពង់ស្ពឺ ៖ ដូចយើងគ្រប់គ្នាដឹងហើយថា ចាប់តាំងពីផ្លូវល្បឿនលឿន រាជធានីភ្នំពេញ-ខេត្តព្រះសីហនុ ដាក់ឲ្យធ្វើចរចរណ៍នោះ ការធ្វើដំណើរតាមផ្លូវជាតិលេខ៤ ហាក់ស្ងប់ស្ងាត់បាត់បង់យានយន្តឆ្លងដែលបង្កផលប៉ះពាល់ជាខ្លាំងដល់បងប្អូនដែលប្រកបរបរលក់ដូរតាមដងផ្លូវ ជាពិសេសអាហារដ្ឋានជាច្រើន នៅតំបន់ពេជ្យនិលត្រូវបានបិទទ្វារជាបន្តបន្ទាប់ ។
កុំថាឡើយ តែអ្នករកស៊ីលក់ដូរ សូម្បីតែអាស្រមលោកយាយម៉ៅពេជ្យនិល ដ៏ល្បីល្បាញថា សក្តិសិទ្ធខ្លាំងនោះត្រូវបានគេមើលឃើញថា ស្ងប់ស្ងាត់មិនសូវមានបងប្អូនទៅបន់ស្រន់សែនព្រេនដូចមុននោះឡើយ ។ បើយើងក្រឡេកទៅមើលផ្លូវល្បឿនលឿនវិញ អាស្រមលោកយាយម៉ៅថ្មី ក៏ត្រូវបានសាងសង់ឡើងនៅចំណតកំពង់សីលា តាមបណ្តោយផ្លូវល្បឿនលឿន ដោយមានរូបបដិមា និងវិមានដ៏ប្រណិតស្កឹមស្កៃទុកជាទីសក្ការៈ និងដើម្បីផ្តល់នូវអារម្មណ៍កក់ក្តៅដល់អ្នកដំណើររាប់ម៉ឺននាក់ ដែលឆ្លងកាត់ផ្លូវនេះ បានបន់ស្រន់សូមសុខសុវត្ថិភាពតាមផ្លូវធ្វើដំណើរ បន្ទាប់ពីគ្រោះថ្នាក់ចរាចរណ៍ត្រូវបានរាយការណ៍កើតឡើងយ៉ាងញឹកញាប់នៅលើផ្លូវល្បឿនលឿន ។
យាយម៉ៅ ផ្លូវល្បឿនលឿន ត្រូវបានកសាងនៅចំណុចចំណតចន្លោះគីឡូម៉ែត្រលេខ១០៩ និង១១០ ស្ថិតក្នុងភូមិស្ទឹងសំរោងឃុំអូបាក់រទេះ ស្រុកកំពង់សិលា ខេត្តព្រះសីហនុ ហើយត្រូវបានសាងសង់ឡើងទាំងសងខាងផ្លូវទាំងទិសដៅភ្នំពេញ-ព្រះសីហនុ និងទិសដៅព្រះសីហនុ-ភ្នំពេញ។ សំណួរសួរថា តើយាយម៉ៅពេជ្រនិល ផ្លូវជាតិលេខ៤ និងលោកយាយម៉ៅកំពង់សិលា ផ្លូវល្បឿនលឿន មួយណាស័ក្តិសិទ្ធិជាង?
មុននឹងឆ្លើយសំណួរខាងលើ សូមរំលឹកបន្តិចថា លោកយាយម៉ៅ ត្រូវបានអ្នកមានជំនឿចាត់ទុកថា ជាអ្នកតា ឬម្ចាស់ទឹកម្ចាស់ដី ដែលគ្របគ្រងប្រចាំទិសនិរតី និងសមុទ្រ ដែលត្រូវបានគេគោរពបូជា ជាប្រជាពលរដ្ឋខេត្តព្រះសីហនុ កំពត កែប កោះកុង ។ ក្រៅពីយាយម៉ៅពេជ្យនិល ក៏មានយាយម៉ៅភ្នំបូកគោ មានយាយម៉ៅឆ្នេរកែប ឬដែលគេហៅថា «សិលាចាំប្តី» រួមនឹងអាស្រមយាយម៉ៅច្រើនទីតាំងទៀត ដោយអ្នកមានជំនឿហៅលោកយាយថា «ម្ចាស់ស្រីនៅទិសនិរតី ជាអធិបតីប្រចាំដែនដីសមុទ្រ» យាយម៉ៅត្រូវបានគេគេនិយាយតៗគ្នា ពីមាត់មួយទៅមាត់មួយថា នៅមុនសម័យអាណានិគមបារាំង យាយម៉ៅ គឺជាស្ត្រីដ៏ស្អាតមួយរូបដែលបានរៀបអាពាពិពាហ៍ជាមួយនឹងមេទ័ពម្នាក់ ។ ក្រោយពីស្វាមីទទួលមរណភាពក្នុងសង្គ្រាម លោកយាយ ក៏បានដឹកនាំទ័ពឡើងសងសឹក ហើយបានក្លាយជាវីរៈនារីដ៏ល្បីល្បាញ ។
ដោយឡែក រឿងផ្សេងទៀតដំណាលថា ស្វាមីរបស់ដូនម៉ៅ ដែលជាមេទ័ពបានចេញទៅធ្វើសង្គ្រាមតាមផ្លូវសមុទ្រ ដោយសារតែនឹកស្វាមីខ្លាំងពេកនាងក៏ទៅតាមរក ហើយក៏បានមកដួលស្លា.ប់នៅខេត្តកោះកុង ក្លាយជាអ្នកដូន (ឆ្មាំរក្សាសមុទ្រ) រួមនឹងរឿងផ្សេងៗដែលលើកឡើងស្រដៀងគ្នាជាច្រើនទៀត ។
ងាកត្រឡប់ទៅសំណួរខាងលើ តើយាយម៉ៅ ផ្លូវជាតិលេខ៤ និងយាយម៉ៅ ផ្លូវល្បឿនលឿន មួយណាស័ក្តិសិទ្ធិជាង?ពាក្យស័ក្តិសិទ្ធិដែលត្រូវបានលើកឡើង គឺចង់សំដៅលើសុវត្ថិភាពក្នុងការធ្វើដំណើរ ដូចនេះមិនថា យាយម៉ៅ ផ្លូវជាតិលេខ៤ និងយាយម៉ៅផ្លូវល្បឿនលឿនទេនឹងស័ក្តិសិទ្ធិដូចគ្នា បើសិនជាអ្នកបញ្ជាយានយន្តគ្រប់ៗរូបបើកបរដោយគោរពឱ្យខ្ជាប់ខ្ជួនតាមច្បាប់ចរាចរណ៍ បើកបរដោយស្មារតីប្រុងប្រយ័ត្នខ្ពស់បើកបរក្នុងល្បឿនមួយត្រឹមត្រូវ តាមច្បាប់កំណត់ បើកបរដោយការយោគយល់អធ្យាស្រ័យ ។
ក្នុងករណី អ្នកបញ្ជាយានយន្តបើកបរលើសល្បឿនកំណត់បើកបរបញ្ច្រាសទិស បើកបរខុសពីវិធានការសុវត្ថិភាពផ្សេងៗ ដែលងាយនឹងបង្កឱ្យមានគ្រោះថ្នាក់នោះ ទោះជាលោកយាយស័ក្តិសិទ្ធិប៉ុណ្ណា ក៏មិនអាចការពារអាយុជីវិត និងសុវត្ថិភាពជូនលោកអ្នកបាននោះដែរ ។ ក្នុងន័យនេះ បន្ទាប់ពីមានអាស្រមលោកយាយម៉ៅលើផ្លូវល្បឿនលឿនភ្នំពេញ-ក្រុងព្រះសីហនុក្តីក៏ក្រសួងស្ថាប័នជំនាញនៅតែបន្តអំពាវនាវដល់បងប្អូនប្រជាពលរដ្ឋគ្រប់រូបមេត្តាអនុវត្តតាមលក្ខខណ្ឌក្នុងការប្រើប្រាស់ផ្លូវល្បឿនលឿន ព្រមទាំងចូលរួមគោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន កុំបើកបរលើសល្បឿនកំណត់ និងកុំបើកបរបញ្ច្រាសទិសចរាចរណ៍ ជាពិសេនៅក្នុងឱកាសនៃពិធីបុណ្យចូលឆ្នាំថ្មីប្រពៃណីខ្មែរខាងមុខ ៕ អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ