មន្ត្រីក្រោមឱវាទប្តឹងមេ សុំឱ្យសម្តេចនាយករដ្ឋមន្ត្រីដកចេញ
- ព្រះវិហារ
ខេត្តព្រះវិហារ ៖ លោក ឡង់ សុបិន អភិបាលស្រុកឆែប ខេត្តព្រះវិហារ កំពុងរងការចោទប្តឹងពីមន្ត្រី
ខេត្តព្រះវិហារ ៖ លោក ឡង់ សុបិន អភិបាលស្រុកឆែប ខេត្តព្រះវិហារ កំពុងរងការចោទប្តឹងពីមន្ត្រីក្រោមឱវាទជាច្រើននាក់ ចាប់ពីថ្នាក់ភូមិ ឃុំ ស្រុក បានដាក់ពាក្យប្ដឹងទៅសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា ព្រមទាំងលោកអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ សុំឱ្យដកចេញពីមុខតំណែងពីអភិបាលស្រុក ដោយថា គ្មានសមត្ថភាពដឹកនាព្រោះប្រកាន់បក្ខពួក បង្កជម្លោះផ្ទៃក្នុង និងប្រើប្រាស់ថវិកាមិនត្រឹមត្រូវ ។
នេះបើយោងតាមឯកសារដែលផ្តល់មកឱ្យក្រុមអ្នកសារព័ត៌មាននារសៀលថ្ងៃទី៦ ខែមេសា ឆ្នាំ២០២៤ នេះ ។
ខ្លឹមសារនៅក្នុងលិខិតនោះ បានបញ្ជាក់ថា លោកអភិបាលស្រុករូបនោះដឹកនាំ ប្រកាន់បក្ខពួក បង្ជម្លោះផ្ទៃក្នុង តែងតែធ្វើទុក្ខបុកម្នេញមន្ត្រីក្រោមឱវាទ គ្មានចំណេះដឹងផ្នែករដ្ឋបាល គ្មានសមត្ថភាពជាអ្នកដឹកនាំ ដោយថែមទាំងសហការជាមួយមន្ត្រីចូលនិវត្តន៍ និងក្រុមហ៊ុនចម្ការអំពៅចិន ទៀតផង។
ដើម្បីយកដីសម្បទានសេដ្ឋកិច្ចរបស់ក្រុមហ៊ុនចម្ការអំពៅចិនមកជួលឱ្យប្រជាពលរដ្ឋដាំដំឡូងមី ក្នុង ១ហិកតាៗ ជិត១លានរៀល។
នៅក្នុងលិខិតនោះបានអះអាងទៀតថា យើងខ្ញុំជាមន្ត្រីរាជការ នៅចំណុះរដ្ឋបាលស្រុកឆែប ក្រុមប្រឹក្សាឃុំទាំង៨ និងក្រុមប្រឹក្សាស្រុកឆែប ខេត្តព្រះវិហារ ពុំដែលទទួលបាននូវភាពកក់ក្ដៅសប្បាយរីករាយក្នុងការបំពេញកិច្ចការងារសោះឡើយ។
ដោយសារតែលោកអភិបាលស្រុករូបនោះ គឺតែងតែព្យាយាមធ្វើទុក្ខបុកម្នេញយើងខ្ញុំទាំងអស់គ្នាតាមគ្រប់រូបភាព ដែលមិនសមជាអ្នកដឹកនាំគ្រប់គ្រង មានពេលខ្លះស្រែកសំឡុតគំរាមកំហែង ស្ដីបន្ទោសថាស្រេចតែចិត្តគាត់ ហើយមិនមានភាពច្បាស់លាស់ទៅលើការងាររដ្ឋបាលឡើយ បញ្ជាឱ្យធ្វើការងារតាមតែអារម្មណ៍របស់ខ្លួន។
មន្ត្រីក្រោមឱវាទថា សកម្មភាពរបស់លោក ឡង់ សុបិន កន្លងមក ពុំមានការប្រាស្រ័យទាក់ទងល្អ ជាមួយមន្ត្រីក្រោមឱវាទក្រុមប្រឹក្សាឃុំ និងក្រុមប្រឹក្សាស្រុកនោះឡើយ។
ប្រើប្រាស់ថវិកាជាតិរបស់រដ្ឋបាលស្រុក មិនត្រឹមត្រូវកេងចំណេញ គិតតែប្រយោជន៍ផ្ទាល់ខ្លួន ជាពិសេសកញ្ចប់លទ្ធកម្ម។
មានអត្តចរិតឆេវឆាវគ្រប់គ្រងកំហឹងខ្លួនឯងមិនបាន បញ្ចេញសម្តីមិនល្អជាមួយមន្ត្រីក្រោមឱវាទ និងក្រុមប្រឹក្សា ។
សម្ដីគ្មាន សុជីវធម៌ សីលធម៌ ក្នុងភាពជាអ្នកដឹកនាំមិនខ្វល់ខ្វាយ ពីសាមគ្គីភាពផ្ទៃក្នុងឡើយ។
មិនមានភក្ដីភាពជាអ្នកដឹកនាំ គ្មានក្រមសីលធម៌ ដឹកនាំតាមអារម្មណ៍របស់ខ្លួន ។
ធ្វើការអត្តនោម័តិមិនដែលស្តាប់យោបល់អ្នកណា ពិសេសគណៈ អភិបាលស្រុក និងក្រុមប្រឹក្សាស្រុក នោះទេ។
គ្មានចំណេះដឹងផ្នែករដ្ឋបាល ដឹកនាំគ្រប់គ្រងពុំសូវនៅអង្គភាព ដោយធ្វើការផ្ទេរសិទ្ធិជាញឹកញាប់ តែពេលនៅសាលាស្រុក តែងតែតាមដាន និងដាក់អវត្តមានមន្ត្រីកំពុងធ្វើការ ដែលពុំទាន់ចុះហត្ថលេខាលើបញ្ជីវត្តមាន ។
មិនចេះលើកទឹកចិត្ត និងយកចិត្តទុកដាក់ពីសុខទុក្ខរបស់មន្ត្រីក្រោមឱវាទ ចេះតែចាប់កំហុស រាល់ កិច្ចប្រជុំ គណៈបញ្ជាការឯកភាព និងប្រជុំ ប្រចាំខែ គឺពុំមានរបៀបវារៈត្រឹមត្រូវ ច្បាស់លាស់ ក្នុង កិច្ចប្រជុំ ហើយតែងតែស្តីបន្ទោសមន្ត្រី និងបណ្តេញមន្ត្រីចេញពីអង្គប្រជុំជារឿយៗ។
មិនដែលចូលរួមកិច្ចប្រជុំសាមញ្ញ ក្រុមប្រឹក្សាស្រុក រយៈពេលជាងមួយឆ្នាំ ហើយគេចវេសមិនចូលរួមវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក និងវេទិកាផ្សព្វផ្សាយ និងពិគ្រោះ យោបល់របស់ក្រុមប្រឹក្សាខេត្ត ។
ហើយមិនដែលចូលរួមដោះស្រាយបញ្ហាប្រឈមផ្សេងៗ ដែលកើតមានឡើងក្នុងស្រុកឡើយ ។
បង្កើតបក្សក្នុងបក្ស បង្កទំនាស់ផ្ទៃក្នុង បំបែកបំបាក់សាមគ្គី ផ្ទៃក្នុងរវាងថ្នាក់លើ ថ្នាក់ក្រោម ។
បង្កឱ្យមានទំនាស់ដីធ្លីជាញឹកញាប់ក្នុងភូមិសាស្ត្រស្រុកឆែប ហើយមិនចូលរួមដោះស្រាយ ។
បង្កើតចលនាដីធ្លី ដោយបានសហការជាមួយលោក ម៉ី សោភា មន្ត្រីចូលនិវត្តន៍ និងក្រុមហ៊ុនចម្ការអំពៅចិន ។
ដោយយកដីសម្បទានសេដ្ឋកិច្ចរបស់ក្រុមហ៊ុនចម្ការអំពៅចិន មិនវិនិយោគលើដំណាំអំពៅ បែរជាជួលដីឱ្យប្រជាពលរដ្ឋដាំដំឡូងមីវិញនៅឆ្នាំ២០២៣ ក្នុង១ហិកតាជួលក្នុងតម្លៃ៤៥០,០០០រៀល ទៅ ៦០០,០០០រៀល ក្នុង១ហិកតា។
លុះដល់ឆ្នាំ២០២៤ លោក ម៉ី សោភា បានបង្កើនថ្លៃជួលដីរហូតដល់៨០០,០០០រៀល ទៅ១,០០០,០០០រៀល ដើម្បីជួលឱ្យប្រជាជនក្រៅស្រុក ដែលធ្វើឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋជាម្ចាស់ឆ្នោតក្នុងស្រុកឆែបយ៉ាងធ្ងន់ធ្ងរ បំផុត ។
លោក ម៉ី សោភា ម្ចាស់សហគ្រាស អឹម សេ វែន គឺបានរំលោភបំពានលើប្រជាពលរដ្ឋ ដែលបានជួលដីហើយទាមទារលុយពីប្រជាពលរដ្ឋ មុនការកំណត់ជាប្រចាំ តាំងខ្លួនជាស្ដេចត្រាញ់ប្រចាំតំបន់ ដោយ មិន ខ្លាចរអាច្បាប់ឡើយ ព្រោះមានការសហការពីអភិបាលស្រុក ។
ជាក់ស្តែង កាលពីថ្ងៃទី២៩ ខែមករា ឆ្នាំ ២០២៤ បានប្តឹងឱ្យកម្លាំងកងរាជអាវុធហត្ថស្រុក ចាប់យកត្រាក់ទ័ររបស់ប្រជាពលរដ្ឋចំនួនមួយគ្រឿងម៉ាកគូបូតា ពណ៌ក្រហម លេខ១០៥០ ដែលកំពុងភ្ជួរដីរើសផលដំឡូងមីក្នុងដីចម្ការ ដែលបានជួលពីខាងសហគ្រាស អឹម សេ វែន ។
ពេលចុះចាប់នោះ មានកម្លាំងកងរាជអាវុធហត្ថស្រុកចំនួន៣នាក់ សន្តិសុខសហគ្រាស អឹម សេ វែនចំនួន៦នាក់ អ្នកបកប្រែចិនចំនួន១នាក់ ដឹកនាំដោយលោក ហុង ហាំ មេបញ្ជាការកងរាជអាវុហត្ថ ស្រុកឆែប ខេត្តព្រះវិហារ បានចាប់យកត្រាក់ទ័រ ទៅរក្សាទុកនៅទីបញ្ជាការ កងរាជអាវុធហត្ថខេត្តព្រះវិហារ ។
ពេលដែលប្រជាពលរដ្ឋ ស្នើសុំឱ្យជួយអន្តរាគមន៍ តែលោក ឡង់ សុបិន មិនព្រមចុះហត្ថលេខាលើឯកសារសំណើរបស់ប្រជាពលរដ្ឋ ដោយគ្មានភាពទទួលខុសត្រូវចំពោះប្រជាពលរដ្ឋរបស់ខ្លួនឡើយក្នុងនាមជាថ្នាក់ដឹកនាំស្រុក ។
តាមប្រភពដដែលបន្ថែមទៀតថា កន្លងមក ធ្លាប់មានជនអាណាមិកបានបោះត្រាក់នៅមុខសាលស្រុកឆែប និងនៅមុខសាលាខេត្តព្រះវិហារ រិះគន់អំពីអសមត្ថភាពដឹកនាំរបស់លោក ឡង់ សុបិន ទៀតផង។
បន្ទាប់មក គណៈចាត់តាំងនៃគណៈកម្មាធិការគណបក្សប្រជាជនកម្ពុជាខេត្តព្រះវិហារ បានចុះមកសាកសួរក្រុមប្រឹក្សាស្រុក និងគណៈអភិបាលស្រុកថាតើអត្ថន័យក្នុងត្រាក់នោះជាការពិតដែរឬទេ?
ប៉ុន្តែមកទល់ពេលនេះ មិនទាន់បានឃើញចំណាត់ការណាមួយចំពោះបុគ្គលនេះនៅឡើយទេ។
មន្ត្រីក្រោមឱវាទ ស្នើសុំឱ្យសម្ដេចធិបតី ហ៊ុន ម៉ា ណែត មេត្តាដក ឬសម្រួលភារកិច្ចលោក ឡង់ សុបិន ចេញពីអភិបាលនៃគណៈអភិបាលស្រុកឆែបខេត្តព្រះវិហារ ដោយក្ដីអនុគ្រោះ ។
លោក ឡង់ សុបិន អភិបាលស្រុកឆែប បានប្រាប់ក្រុមអ្នកសារព័ត៌មាន នៅថ្ងៃទី៦ ខែមេសា ឆ្នាំ ២០២៤ នេះ ថា ការដឹកនាំរបស់លោក គឺល្អប្រសើរ ក្នុងនោះរូបលោកក៏មិននឹកស្មានថា មានអ្នកមិនពេញចិត្តនឹងលោកដែរ ។
លោកបន្តថា ខ្ញុំតែងតែធ្វើការណែនាំដល់មន្ត្រីជំនាញ ឬការិយាល័យនានា ឱ្យអនុវត្តតួនាទីភារកិច្ចល្អ ដើម្បីបម្រើពលរដ្ឋ ។
ចំពោះរឿងជួលដីសម្បទានសេដ្ឋកិច្ចរបស់ក្រុមហ៊ុនចម្ការអំពៅចិន លោកបានបដិសេធថា លោកមិនពាក់ព័ន្ធនោះទេ ។
ទោះជាយ៉ាងនេះក្ដី មហាជនកំពុងរង់ចាំមើលថាតើថ្នាក់ដឹកនាំ នឹងមានចំណាត់ការបែបណាទៅលើបណ្ដឹងរបស់ក្រុមមន្ត្រី ដែលបានប្ដឹងលោកអភិបាលស្រុកឆែបនេះ ។
ព័ត៌មានពិស្តារនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ