ខេត្តរតនគិរី ៖ មេប៉ុស្តិ៍ការពារព្រំដែនលេខ៥០៩ភូមិភិ ស្ថិតក្នុងស្ថានភាពស្រវឹងជោកជាំ ហើយក៏បានប្រើហិង្សាដោយទាញយកកាំបិតកាប់ទៅលើជនរងគ្រោះម្នាក់បណ្តាលឲ្យរងរបួសធ្ងន់ហើយសមត្ថកិច្ចក៏ឃាត់ខ្លួនបណ្តោះអាសន្ន ។
ការបង្កហិង្សាដោយចេតនាមានស្ថានទម្ងន់ទោសនោះ បានកើតឡើងនៅវេលាម៉ោង១៧ និង៣០នាទីថ្ងៃទី០២ មេសា ឆ្នាំ២០២៤ នៅចំណុចផ្លូវលំទៅភូមិភិ ស្ថិតនៅភូមិភិ ឃុំសេសាន ស្រុកអូរយ៉ាដាវខេត្តរតនគិរី ។
ប្រភពពីសមត្ថកិច្ចបានឲ្យដឹងថា ជនសង្ស័យឈ្មោះ ធី សិទ្ធិ ភេទប្រុស អាយុ៣៧ឆ្នាំ ជនជាតិខ្មែរជានគរបាលព្រំដែន ។ រីឯជនរងគ្រោះឈ្មោះ សេវ សារឿន ភេទប្រុស អាយុ២១ឆ្នាំ ជនជាតិចារ៉ាយ មុខរបរកសិករ ។
តាមការរៀបរាប់ជនរងគ្រោះថា ខ្លួនបានមកពីចំការរើសស្វាយចន្ទី ដើម្បីទៅលក់ហើយនៅតាមផ្លូវម៉ូតូក៏អស់ប្រេងសាំងនៅត្រង់ចំណុចលើផ្លូវលំភូមិភិ ឃុំសេសានស្រុកអូរយ៉ាដាវ បានឈប់សំរាកក្រោមម្លប់ឈើ ហើយក៏ស្រាប់តែមានឈ្មោះ ធី សិទ្ធិ មានតួនាទីជាមេប៉ុស្តិ៍ការពារព្រំដែនលេខ៥០៩ ភូមិភិបានជិះម៉ូតូមកពីទីបញ្ជាការវរការពារព្រំដែនលេខ៦២៣ មកដល់ជួបគ្នាត្រង់ចំណុចកើតហេតុខាងលើ ក៏ឈប់ដោយមានស្ថានភាពស្រវឹងផង និងបានសួរនាំពីបីម៉ាត់ក៏បានចុះមកទាញយកកាំបិតរបស់ខ្លួន ហើយកាប់តែម្តងបណ្តាលឲ្យរងរបួសក្បាល។
ក្រោយរងរបួស ខ្លួន (ជនរងគ្រោះ) ក៏បានរត់គេចចូលទៅព្រៃដោយបន្សល់ទុកម៉ូតូ និងគ្រាប់ស្វាយចន្ទីមួយថង់រួមទាំងកាំបិតមួយនៅនិងកន្លែងកើតហេតុ ។
ក្រោយកើតហេតុ ជនសង្ស័យឈ្មោះ ធីសិទ្ធិ បានហៅមន្ត្រីរបស់ខ្លួននៅប៉ុស្តិ៍ការពារព្រំដែនភូមិភិនោះ ឈ្មោះ ហាក់ ធារ័ត្ន មកជួយយកសម្ភរទៅរក្សាទុកទៀតផង។
រហូតមកដល់បច្ចុប្បន្ន ជនសង្ស័យនោះមិនទាន់មានប្រភពច្បាស់លាស់ថា មានចំណាត់ការយ៉ាងណានៅឡើយទេ គ្រាន់តែសមត្ថកិច្ចប្រាប់ថា កំពុងស៊ើបអង្កេតស្រាវជ្រាវចាត់ការនិតិវិធីបន្តទៀតដើម្បីបញ្ជូនទៅស្ថាប័នអយ្យការអមសាលាដំបូងខេត្តរតនគិរី៕
ចែករំលែកព័តមាននេះ