គម្រោងកសាងផ្លូវដែកល្បឿនលឿនភ្នំពេញ-ប៉ោយប៉ែត ដែលផ្ទុះការចាប់អារម្មណ៍កាលពីចុងឆ្នាំ២០២២ មកដល់ពេលនេះហាក់មិនទាន់មានពន្លឺនៅឡើយទេ ស្របពេលដែលប្រទេសនានានៅក្នុងតំបន់សុទ្ធតែចង់បានគម្រោងកសាងផ្លូវដែកល្បឿនលឿនបែបនេះដូចៗគ្នា សូម្បីតែប្រទេសប្រុយណេដែលតូចបំផុតនៅក្នុងតំបន់ ។ គម្រោងរថភ្លើងល្បឿនលឿន គឺមិនដំណើរការបានលឿនដូចការចង់បានរបស់យើងទេ ។ គេក៏មិនទាន់ច្បាស់ថា តើពេលណាកម្ពុជានឹងមានលុយ ដើម្បីធ្វើអោយសុបិនមួយនេះក្លាយជាការពិតនៅឡើយទេ ។
តាមការប្រកាសរបស់ក្រសួងសាធារណការ និងដឹកជញ្ជូនបានឲ្យដឹងថា គម្រោងសាងសង់ផ្លូវដែកល្បឿនលឿនភាគខាងជើង ភ្នំពេញ-ប៉ោយប៉ែត គ្រោងចាយទុនប្រមាណ៤ពាន់លានដុល្លារអាមេរិក និងប្រើពេលសាងសង់ប្រមាណ ៤ឆ្នាំ ។
គម្រោងនេះបានសិក្សាសមិទ្ធិលទ្ធភាពដោយក្រុមហ៊ុនសាជីវកម្មថ្នល់ និងស្ពានចិន (CRBC) ដោយផ្ទាល់ និងតាមរយៈប្រព័ន្ធពីចម្ងាយជាមួយក្រុមការងារជំនាញរបស់ក្រុមហ៊ុននេះ ។
តាមរយៈការសិក្សាបឋមនេះ បានបញ្ជាក់ថា គម្រោងនេះមានប្រវែងសរុបប្រមាណ៣៨២គ.ម ត្រូវការទុនវិនិយោគប្រមាណជាង៤ពាន់លានដុល្លារអាមេរិក ដោយរួមបញ្ចូលទាំងក្បាល និងទូរថភ្លើងសម្រាប់ដំណើរការ និងប្រើប្រាស់រយៈពេលសាងសង់ប្រមាណ៤ឆ្នាំ ។ ផ្លូវរថភ្លើងល្បឿនលឿននេះ មានខ្នាតទទឹងប្រវែង១.៤៣៥ មម ល្បឿនសម្រាប់ធ្វើចរាចរណ៍ គឺ ១៦០គ.ម នៅក្នុងមួយម៉ោង និងមានស្ថានីយសរុបចំនួន៣៣ សម្រាប់ដំណើរការ ដោយស្ថានីយចំនួន១៩ ក្នុងផែនការរយៈពេលខ្លី និងគ្រោងបន្ថែមចំនួន១៤ទៀត ក្នុងផែនការរយៈពេលវែង ។
ក្នុងនោះដែរ ខ្សែររថភ្លើងត្រូវបំពាក់ប្រភេទក្បាលរថភ្លើង ដែលដំណើរការ ដោយថាមពលអគ្គិសនី ដោយមានការសាងសង់ផ្លូវអាកាសរំលងកាត់ទទឹងផ្លូវប្រមាណជាង៣០០កន្លែង ដើម្បីបញ្ចៀសគ្រោះថ្នាក់ចរាចរណ៍ត្រង់ចំណុចប្រសព្វជាមួយផ្លូវថ្នល់ និងមានបែងចែកដាច់ពីគ្នារវាងស្ថានីយអ្នកដំណើរ និងស្ថានីយលើកដាក់ទំនិញនៅភូមិសាស្ត្រ រាជធានីភ្នំពេញ ។
គម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើង ល្បឿនលឿន គឺជាគម្រោងដែលផ្តោតចម្បងលើសេវាដឹកជញ្ជូនអ្នកដំណើរ និងដឹកទំនិញ អន្តរជាតិ រវាងប្រទេសកម្ពុជា និងប្រទេសថៃ ក៏ដូចជា ការដឹកជញ្ជូនអ្នកដំណើរ និងទំនិញតាមខ្សែបណ្ដោយពីរាជធានីភ្នំពេញទៅក្រុងប៉ោយប៉ែត ដោយឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ ។ គម្រោងនេះនឹងក្លាយជាផ្លូវដែកល្បឿនលឿនស្ដង់ដាដំបូងគេបំផុត នៅក្នុងប្រទេសកម្ពុជា ហើយនឹងក្លាយទៅជាខ្សែផ្លូវដឹកជញ្ជូនអ្នកដំណើរ និងដឹកទំនិញដ៏សំខាន់ទាំងនៅក្នុងប្រទេស និងភ្ជាប់ទៅក្រៅប្រទេសផងដែរ។
គម្រោងទាំងនេះ ពិតជាអស្ចារ្យណាស់ ប្រសិនបើកម្ពុជាធ្វើបាន ប៉ុន្តែហាក់ស្ងប់ស្ងាត់មកដល់ពេលនេះ ហើយមកដល់ពេលនេះនៅមិនទាន់ដឹងថា វាវិវត្តន៍ទៅមុខយ៉ាងណានៅឡើយទេ ខណៈដែលគេដឹងថា ប្រទេសនៅអាស៊ានផ្សេងទៀត គឺកំពុងតែកញ្ជ្រោកចង់បានផ្លូវដែកល្បឿនលឿនដូចកម្ពុជាដែរ ។
ក្រៅពីឥណ្ឌូនេស៊ី និង ឡាវ ដែលបានដាក់ឲ្យដំណើរការផ្លូវដែកល្បឿនលឿនរួចហើយនោះ ប្រទេសនានានៅអាស៊ានកំពុងដុតដៃដុតជើងចង់បានសូម្បីតែប្រុយណេដែលមានប្រជាជន ត្រឹមតែប្រមាណជាកន្លះលាននាក់ក៏ចង់បានដែរ ។
ប្រទេសថៃកំពុងតែប្រឹងប្រែងសាងសង់រថភ្លើងល្បឿនលឿនថៃ-ចិនរវាងទីក្រុងបាងកក និងខេត្តជាប់ព្រំដែនភាគឦសាននៃខេត្តណងខៃ ដោយការសាងសង់កំណាត់ផ្លូវប្រវែង២៥១គីឡូម៉ែត្ររវាងទីក្រុងបាងកក និងខេត្តនគររាជសីមាសម្រេចបានជិត៤០ភាគរយហើយ ។ គម្រោងនេះយឺតហើយក៏ប្រទាំងប្រទើសដែរ ប៉ុន្តែគេនៅតែរំពឹងថា នឹងអាចកសាងរួចនៅអំឡុងឆ្នាំ២០២៧ ។
ដោយឡែកគម្រោងការកសាងផ្លូវដែកល្បឿនលឿនរបស់ម៉ាឡេស៊ីភ្ជាប់ទៅសិង្ហបុរីដែលបានលុបចោលដោយរដ្ឋបាលម៉ាឡេស៊ីមុននៅពេលនេះក៏ហាក់ដូចជាកំពុងតែចែចូវឲ្យដំណើរការឡើងវិញ ។ វៀតណាមឯណោះវិញ គឺដាក់ផែនការកសាងផ្លូវដែកល្បឿនលឿននៅក្នុងប្រទេស ដែលមានតម្លៃរហូតដល់ទៅជាង៧០ ពាន់លានដុល្លារ ។
ដោយឡែកប្រុយណេឯណោះវិញ ទោះបីជាប្រទេសតូចតែក៏មានមហិច្ឆិតាដណ្តើមឧត្តមភាព ជាអធិរាជផ្លូវដែកល្បឿនលឿនមួយនៅអាស៊ានផងដែរ ដោយបង្ហើបនូវគម្រោង ដែលមានប្រវែង១៦០០ គីឡូម៉ែត្រភ្ជាប់ទៅ ឥណ្ឌូនេស៊ី និង ម៉ាឡេស៊ី សូម្បីតែទៅរដ្ឋធានីថ្មីរបស់ ឥណ្ឌូនេស៊ី គឺទីក្រុង នូសានតារា ក៏ជាគោលដៅតភ្ជាប់ដែរនៅក្នុងទឹកប្រាក់រហូតដល់ទៅ៧០ពាន់លានដុល្លារដែរ ។
ផ្អែកតាមគម្រោងដែលលើកឡើងដោយប្រទេសនានានេះ តើគម្រោងផ្លូវដែកល្បឿនលឿន កម្ពុជាយើងសិចស៊ីគ្រប់គ្រាន់ ដើម្បីទាក់ទាញគម្រោងវិនិយោគពីបរទេសគ្រប់គ្រាន់ហើយឬនៅ ខណៈដែលទុន គឺជាបញ្ហាចម្បងមួយហើយប្រជាប្រិយភាពនៃការធ្វើដំណើរក៏ជាចំណុចមួយស្របពេលដែលសុវត្ថិភាពក៏ជាចំណុចស្នូល ខណៈដែលរថភ្លើងរត់យឺតៗសោះ គឺបានកើតហេតុគ្រោះថ្នាក់ចរាចរណ៍ជាបន្តបន្ទាប់ហើយនោះ ៕ ដោយៈ ហេង ចេស្តារ
ចែករំលែកព័តមាននេះ