ទីក្រុងណៃពិដោរ៖ ពាក់ព័ន្ធនឹងការវាយប្រហារសំណាក់កងទ័ពព្រៃទៅលើរបបសឹកភូមារបស់លោកមីនអុងឡាំងនោះ គេឃើញថាមានការបកស្រាយផ្សេងគ្នា។ ចលនាតស៊ូនៅក្នុងព្រៃដែលគាំទ្រលទ្ធិប្រជាធិបតេយ្យអះអាងថាទាហានរបស់ខ្លួនប្រើប្រាស់យន្តហោះដ្រូនវាយប្រហារបានសម្រេចទៅលើព្រលានយន្តហោះ និងបញ្ជាការដ្ឋានយោធានៅទីក្រុងណៃពិដោរ។ របបសឹកថ្លែងថាដ្រូនទាំងនោះមិនបានវាយប្រហារចំគោលដៅឡើយ ហើយត្រូវបានបាញ់ទម្លាក់គ្មានសល់មួយគ្រឿងទេ។
ក្រុមប្រឆាំងដែលហៅខ្លួនឯងថា «រដ្ឋាភិបាលបង្រួបបង្រួមជាតិ» ថ្លែងថាក្រុមប្រតិបត្តិការពិសេសរបស់ខ្លួនប្រើប្រាស់យន្តហោះដ្រូនជាច្រើនគ្រឿងវាយសង្គ្រប់ទៅលើគោលដៅជាច្រើនកន្លែងនៅក្នុងពេលតែមួយ។ ពួកគេអះអាងថាមនុស្សមួយចំនួនក៏បានស្លាប់នៅក្នុងការវាយប្រហារនោះផងដែរ។ ដោយឡែក របបយោធាមីនអុងឡាំងអះអាងថាទាហានរបស់ខ្លួនបានបាញ់ទម្លាក់យន្តហោះដ្រូន៧គ្រឿង។ របបនេះបញ្ជាក់ថាគ្មាននរណាម្នាក់ស្លាប់នៅក្នុងហេតុការណ៍នោះទេ។
ទោះជាយ៉ាងណាក្ដី ក្រុមអ្នកសារព័ត៌មានបានត្រឹមតែចុះផ្សាយតាមគេថាតែប៉ុណ្ណោះព្រោះមិនទាន់មានប្រភពឯករាជ្យណាមួយផ្ទៀងផ្ទាត់ព័ត៌មានទាំងនេះថាមានការពិតកម្រិតណាទេ។ ប្រទេសភូមាធ្លាក់ទៅក្នុងវិបត្តិនយោបាយ និងវិបត្តិសន្តិសុខជាតិអស់ជាច្រើនឆ្នាំមកហើយចាប់តាំងពីលោកមីនអុងឡាំងទម្លាក់លោកស្រីស៊ូជីពីអំណាចកាលពីដើមខែកុម្ភៈ ឆ្នាំ២០២១។
ពីដំបូងដៃ ក្រុមអ្នកគាំទ្រលោកស្រីស៊ូជីត្រឹមហែបាតុកម្មតវ៉ាដោយសន្តិវិធីតែប៉ុណ្ណោះ។ ប៉ុន្តែនៅពេលពួកយោធាប្រើកម្លាំងបង្ក្រាបខ្លាំងពេក ពួកគេក៏រត់ទៅរួមកម្លាំងជាមួយពួកតស៊ូនៅក្នុងព្រៃ។ ដូចនេះ សង្គ្រាមផ្ទៃក្នុងភូមាកាន់តែឆាបឆេះខ្លាំងជាងមុន។ ពួកឧទ្ទាមបានវាយប្រហារខ្លាំងៗស្រុះដៃគ្នាទៅលើប៉ុស្តិ៍ជួរមុខនៃរបបសឹកមីនអុងឡាំងចាប់ពីខែតុលា ឆ្នាំ២០២៣។
សូមជម្រាបព្រលានយន្តហោះដែលក្រុមតស៊ូវាយប្រហារដោយយន្តហោះដ្រូននោះជាមូលដ្ឋានទ័ពអាកាសរបស់របបសឹកផង និងក៏ជាអាកាសយានដ្ឋានសម្រាប់ទទួលយន្តហោះដឹកអ្នកដំណើរឡើងចុះផងដែរ។ ទីនេះស្ថិតនៅចម្ងាយ២៥គីឡូម៉ែត្រពីបញ្ជាការដ្ឋានកងទ័ពមួយចំនួនដែលក្រុមតស៊ូអះអាងថាពួកគេក៏បានបញ្ជាយន្តហោះដ្រូនទៅវាយប្រហារផងដែរ។
ក្រុមដែលហៅខ្លួនឯងថាក្លោតធីម (Kloud Team) ប្រកាសថាការវាយប្រហារដោយយន្តហោះដ្រូននោះជាស្នាដៃរបស់ខ្លួន។ ពួកគេទទួលរ៉ាប់រងខាងធ្វើសង្គ្រាមដែនអាកាស។ ពួកតស៊ូដែលហៅខ្លួនឯងថា «កងទ័ពស្វ័យការពារ» ច្រើនប្រគល់ការងារឱ្យក្រុមក្លោតធីមជាអ្នកវាយប្រហារជើងអាកាសព្រោះពួកគេ (កងទ័ពស្វ័យការពារ) មិនសូវមានអាវុធធុនធ្ងន់។ ក្រុមក្លោតធីមថ្លែងថាគោលដៅវាយប្រហារពេលនោះគឺផ្ទះរបស់លោកមីនអុងឡាំង, បញ្ជាការដ្ឋានកងទ័ព និងមូលដ្ឋានទ័ពអាកាស។
ថ្វីដ្បិតរបបសឹកមានប្រៀបជាងពួកតស៊ូផ្នែកចំនួនកងទ័ព និងអាវុធយុទ្ធភ័ណ្ឌក៏ពិតមែន ប៉ុន្តែរបបសឹកមិនទាន់អាចបង្ក្រាបពួកតស៊ូបានទេ។ កាលពីពេលកន្លងមក បើត្រូវវាយប្រហារទៅលើពួកបះបោរនៅក្នុងព្រៃ របបសឹកច្រើនប្រើប្រាស់យន្តហោះវាយប្រហារពីលើអាកាស។ ដូច្នេះ អ្នកដែលស្លាប់គឺយុទ្ធជនរបស់ពួកបះបោរផង និងជនស៊ីវិលផង។ មិនតែប៉ុណ្ណោះ អង្គការសហប្រជាជាតិប៉ាន់ស្មានថាជនស៊ីវិលជាង២លាននាក់ត្រូវបង្ខំចិត្តផ្លាស់ប្ដូរកន្លែងដើម្បីគេចចេញពីការប្រយុទ្ធគ្នា។
ឥឡូវនេះ យន្តហោះដ្រូនបានក្លាយជាអាវុធសម្ងាត់របស់ពួកតស៊ូដើម្បីចាត់ការទៅលើរបបសឹក។ ពីដំបូងដៃ ពួកគេប្រើប្រាស់ត្រឹមតែយន្តហោះដ្រូនខ្នាតតូចដែលបំពាក់គ្រឿងផ្ទុះបន្តិចបន្តួចតែប៉ុណ្ណោះ។ ប៉ុន្តែនៅដំណាក់កាលចុងក្រោយនេះ ពួកគេលេងសុទ្ធតែដ្រូនបំពាក់បច្ចេកវិទ្យាទំនើបៗ និងដាក់គ្រឿងផ្ទុះបានច្រើនៗដើម្បីវាយប្រហារគោលដៅយោធា។ ជានិច្ចកាល បន្ទាប់ពីវាយប្រហារដោយយន្តហោះដ្រូនរួចហើយ ពួកគេច្រើនបង្ហោះសកម្មភាពទាំងនោះនៅលើបណ្ដាញសង្គម៕
ប្រភព៖ Associated Press
https://apnews.com/article/myanmar-naypyitaw-drone-attack-military-3258d004bbf83f3ae77e10c3252ce453
ចែករំលែកព័តមាននេះ