ខេត្តតាកែវ ៖ កាលពីវេលាម៉ោង១១និង​១៥នាទីព្រឹក​ថ្ងៃទី២ ខែមេសា ឆ្នាំ២០២៤ មានករណីអគ្គីភ័យ​ភ្លើងឆេះ​ជញ្ជ្រាំងនៅចំណុចវាលស្រែខាងជើងភូមិព្រៃស្លឹក ស្ថិតក្នុងភូមិសូភី ឃុំរនាម ស្រុកទ្រាំង ខេត្តតាកែវ បណ្ដាលឱ្យស្លា.ប់​បុរសចំណាស់ម្នាក់ និង​ឆេះ​ជញ្ជ្រាំង​លើ​ផ្ទៃដីអស់​ប្រហែល​២០ហិក​តា។ នេះបើយោងតាមការបង្ហោះរបស់ផេកអធិការដ្ឋាននគរបាលស្រុកទ្រាំង​ ។​

ក្នុងករណីខាងលើនេះដែរ ដោយមានការចង្អុលបង្ហាញពី​លោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ ដឹកនាំដោយលោកវរសេនីយ៍ទោ កប សេម អធិការ នៃអធិការដ្នាននគរបាលស្រុកទ្រាំង បានដឹកនាំកម្លាំងជំនាញ និងអន្តរាគមន៍ ចុះពន្លត់​អគ្គីភ័យ ភ្លើងឆេះជញ្ជ្រាំង​ នៅចំណុចវាលស្រែខាងលើ ។​

ជនរងគ្រោះដែលបានបាត់បង់ជីវិត​ឈ្មោះឡុង ទូច ភេទប្រុស អាយុ៧៥ឆ្នាំ មុខរបរកសិករ មានទីលំនៅក្នុង​ភូមិព្រៃស្លឹក ឃុំព្រៃស្លឹក ស្រុកទ្រាំង ខេត្តតាកែវ ។​

អធិការដ្ឋាននគរបាលស្រុកទ្រាំង បាន​ឱ្យដឹងបន្តថា ជនរងគ្រោះ​ក៏មានជំងឺប្រចាំកាយផងដែរ មុនពេលកើតហេតុ ជនរងគ្រោះ​បានចេញពីផ្ទះដោយ​យកដែកកេះពីឈ្មោះសិត សេម អាយុ​៧៤ឆ្នាំ ត្រូវជាប្រពន្ធ មានទាំង​កាំបិតក្រង៉ុកមួយផង និងបាន​ប្រាប់ប្រពន្ធថា មកដុតចុងត្នោតក្នុងស្រែរបស់​ជន​រងគ្រោះ ពេលដុតរួចភ្លើងឆេះមិនអាចពន្លត់​បាន ក៏ឆេះរាលដាលធំទៅៗ ។​

ពេលទទួលបាន​ព័ត៌មានខាងលើនេះ​ភ្លាមៗ កម្លាំងជំនាញ​នៃអធិការដ្ឋាននគរបាលស្រុក បានចេញ​រថយន្តពន្លត់អគ្គីភ័យមួយគ្រឿង​របស់អធិការដ្ឋាន និងរថយន្តរបស់ស្នងការដ្ឋាននគរបាលខេត្តចំនួន២គ្រឿងបានចុះ​ទៅដល់កន្លែងកើតហេតុ។ ករណីនេះនៅវេលាម៉ោង២រសៀលថ្ងៃដដែល​ កម្លាំង​សមត្ថកិច្ច​បានគ្រប់គ្រងអគ្គីភ័យបានទាំងស្រុង ។ ពេលនោះក៏បានប្រទះ​ឃើញជនរងគ្រោះ​ត្រូវភ្លើងឆេះស្លា.ប់នៅចម្ងាយ៤០ម៉ែត្រពីកន្លែងដុតចុងត្នោត។ ភ្លើងឆេះជើងជ្រាំងលើ​ផ្ទៃដីអស់​ប្រហែល ២០ហិក​តា និងប្រើប្រាស់ទឹកបាញ់ពន្លត់​អស់ចំនួន៤រថយន្ត ​តែ​មិនបណ្ដាលឱ្យឆេះខូចខាតទ្រព្យសម្បត្តិប្រជាពលរដ្ឋទេ។

ក្រោយពេលកើតហេតុ កម្លាំងផ្នែកជំនាញស្រុក បានសហការជាមួយកម្លាំងការិយាល័យនគរបាលបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលខេត្តតាកែវ និងដោយមានការចូលរួមពីលោកគ្រូពេទ្យ លោកមេឃុំ លោកមេភូមិ និងក្រុមគ្រួសារស.ព បានធ្វើការពិនិត្យស.ពជនរងគ្រោះ​នៅនឹងកន្លែងកើតហេតុ ផ្នែកជំនាញសន្និដ្ឋានថាជនរងគ្រោះពិតជាបានស្លា.ប់ដោយសារ​ត្រូវ​ភ្លើងឆេះ​ជញ្ជ្រាំង​ប្រាកដមែន ៕​