រាជធានីភ្នំពេញ ៖ មានការចុះបង្ក្រាបក្នុងក្លិបមួយកន្លែង ដោយកម្លាំងសមត្ថកិច្ចដកហូតបានថ្នាំចម្រុះគ្រវីជាច្រើនគីឡូ រួមទាំងឃាត់មនុស្សជាង១០០នាក់ឯណោះ ។
យោងតាមផេកស្នងការដ្ឋាននគរបាលរាជធានីភ្នំពេញបានឱ្យដឹងថា ការបង្ក្រាបទីតាំងក្លិបយីហោ «ថាំងហួយ»ពាក់ព័ន្ធករណីជួញដូរ និងប្រើប្រាស់គ្រឿងញៀន និងឃាត់ខ្លួនជនសង្ស័យចំនួន១១១នាក់ ។
ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅវេលាម៉ោង០២ និង១០នាទីរំលងអធ្រាត្រចូលថ្ងៃទី០១ ខែមេសា ឆ្នាំ២០២៤ ដោយមានការសម្របសម្រួលពីលោក គឹម ហុងសាន ព្រះរាជអាជ្ញារងនៃសាលាដំបូងរាជធានីភ្នំពេញ លោកឧត្តមសេនីយ៍ទោ គល់ យី ស្នងការរង ទទួលផែនការងារប្រឆាំងគ្រឿងញៀន ដឹកនាំការិយាល័យជំនាញប្រឆាំងគ្រឿងញៀន និងកម្លាំងអធិការដ្ឋាននគរបាលខណ្ឌចំការមន ចូលរួមសហការជាមួយកម្លាំងមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ដឹកនាំ ដឹកនាំដោយឯកឧត្តម ឧត្តមសេនីយ៍ឯក ប៊ុនប៉ា ម៉ារីលុច អគ្គស្នងការរង ទទួលការងារប្រឆាំងគ្រឿងញៀន និងឯកឧត្តម ឧត្តមសេនីយ៍ឯក ឃឹង សារ៉ាត់ ប្រធានមន្ទីរប្រឆាំងគ្រឿងញៀន បានចុះបង្ក្រាប ជាក់ស្តែងទីតាំងក្លិបយីហោ ថាំងហួយ ពាក់ព័ន្ធករណីលួចលាក់ជួញដូរ និងប្រើប្រាស់គ្រឿងញៀនខុសច្បាប់ នៅចំណុចផ្ទះលេខ ៦៦ ផ្លូវ១០៣ សង្កាត់បឹងត្របែក ខណ្ឌចំការមន ។
ក្នុងប្រតិបត្តិការនេះ សមត្ថកិច្ចឃាត់ខ្លួនជនសង្ស័យសរុបចំនួន១១១នាក់ (ស្រី៤៥នាក់) (ជនជាតិខ្មែរ ១៤នាក់ និងជនបរទេស៩៧នាក់ (ចិន៦០, វៀតណាម៣៤, កូរ៉េ២, ម៉ាឡេស៊ី១)។
ប្រភពបន្តថា ចំពោះវត្ថុតាងចាប់យកបានថ្នាំញៀនប្រភេទគ្រវីចម្រុះប្រហែលជាង5គីឡូក្រាម, ឧបករណ៍សម្រាប់លេងគ្រឿងញៀនមួយចំនួន, រថយន្តចំនួន៤គ្រឿង (Alpharetta 1, Mercedes 1, RangRover 1, Starex 1)។ បច្ចុប្បន្ន ជនសង្ស័យ សម្ភារៈ និងវត្ថុតាងខាងលើ យកទៅរក្សាទុកនៅមន្ទីប្រឆាំងគ្រឿងញៀន ៕
ចែករំលែកព័តមាននេះ