ADផ្ទាំងផ្សព្វផ្សាយពាណិជ្ជកម្ម

Picture

ជិតចូលឆ្នាំ ! ពលរដ្ឋកុំខំពឺតគ្រឿងស្រវឹងពេក ព្រោះវាប្រឈមជំងឺ២០០មុខ

3 អាទិត្យ មុន
  • ភ្នំពេញ

នៅ​មុន​ពេល​ពលរដ្ឋ​កម្ពុជា​ឈាន​ទៅ​រីករាយ និង​ទទួល​អំណរ​សប្បាយ​នៃ​ពិធី​បុណ្យចូលឆ្នាំ​ថ្មី ប្រពៃណី​ជាតិ​នៅ​ថ្ងៃ​ទី​១៣ ខែមេសា ឆ្នាំ​២០២៤ ខាង​មុខ​នេះ តំណាង​សង្គម​ស៊ី​វិល​មួយ​រូប​បាន​ចេញ​មុខ​ព្រមាន​អំពី​ហានិភ័យ​នៃ​ការ​ទទួលទាន​គ្រឿង​ស្រវឹង ខណៈ​ដែល​បរិមាណ​នៃ​ការ​ប្រើប្រាស់​គ្រឿង​ស្រវឹង នៅ​ឆ្នាំ​២០២៤ ត្រូវ​បាន​គេ​ព្យាករណ៍​ថា…

នៅ​មុន​ពេល​ពលរដ្ឋ​កម្ពុជា​ឈាន​ទៅ​រីករាយ និង​ទទួល​អំណរ​សប្បាយ​នៃ​ពិធី​បុណ្យចូលឆ្នាំ​ថ្មី ប្រពៃណី​ជាតិ​នៅ​ថ្ងៃ​ទី​១៣ ខែមេសា ឆ្នាំ​២០២៤ ខាង​មុខ​នេះ តំណាង​សង្គម​ស៊ី​វិល​មួយ​រូប​បាន​ចេញ​មុខ​ព្រមាន​អំពី​ហានិភ័យ​នៃ​ការ​ទទួលទាន​គ្រឿង​ស្រវឹង ខណៈ​ដែល​បរិមាណ​នៃ​ការ​ប្រើប្រាស់​គ្រឿង​ស្រវឹង នៅ​ឆ្នាំ​២០២៤ ត្រូវ​បាន​គេ​ព្យាករណ៍​ថា ពលរដ្ឋ​ម្នាក់​អាច​ទទួលទាន​គ្រឿង​ស្រវឹង​ដល់​ទៅ​២៧,៣៨​លី​ត្រ​នៅ​ក្នុង​មួយ​ឆ្នាំ ។

លោក យង់ គឹ​ម​អេ​ង ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព​បាន ធ្វើការ​ព្រមាន​ចំពោះ​ពលរដ្ឋ​ដែល​ទទួលទាន​សុរា លើស​កម្រិត​ដែល​នឹង​ប្រឈម​មុខ​សុខភាព ដែល​អង្គការ​សុខភាព​ពិភពលោក​រក​ឃើញ​ជំងឺ​ជាង​២០០​ប្រភេទ​ឯណោះ ។ លោក យង់ គឹ​ម​អេ​ង បានអោយ​កម្មវិធី​លុយ​នៃ​សារព័ត៌មាន​កោះសន្តិភាព​ដឹង​ថា «​គេ​បាន រក​ឃើញ​ជំងឺ​ជាង​២០០​មុខ ដូច​ជា ជំងឺ​លើស​សម្ពាធ​ឈាម ជំងឺ​ទឹកនោមផ្អែម ជំងឺថ្លើម ក្រពះ​…​ពោល គឺ​មាន​ច្រើន​ណាស់ ។ ជាមួយ​គ្នា​នោះ​យើង​ឃើញ​ថា វា​មាន​ផល​ប៉ះពាល់ ខាង​សង្គម​ធំ​ដែរ ដូច្នេះ​ការ​ទទួលទាន​គ្រឿង​ស្រវឹង ដែល​ថា អាច​អោយ​គាត់​មាន​សុខភាព​ល្អ បញ្ញា ភ្លឺស្វាង សុទ្ធតែ​ជា​ការ​កុហក​» ។

លោក យង់ គឹ​ម​អេ​ង បាន​បន្ត​ថា ការ​ជំរុញ​អោយ​អតិថិជន​នៃ​សេវាកម្ម​កម្សាន្ត ទទួលទាន សុរា​ច្រើន ជា​រឿង​គ្រោះថ្នាក់​បំផុត ជា​ពិសេស គឺ​គ្រោះថ្នាក់​ចរាចរណ៍ ដែល​មិនមែន​ប៉ះពាល់​តែ​ប្រជាពលរដ្ឋ​ធម្មតា​មានការ​បាត់បង់​ជីវិត មានការ​របួស ប្រជាពលរដ្ឋ​ទូទៅ​មិន​ថា អ្នកមាន ឬ​អ្នកក្រ ។

ដោយឡែក លោក ហ៊ឹ​ម អូន ជា​ប្រជាពលរដ្ឋ​រស់នៅ​ជាយ​រាជធានី​ភ្នំពេញ​បានអោយ​ដឹង​ថា ជា​មធ្យម​លោក​ទទួលទាន​សុរា នៅ​ក្នុង​មួយ​ខែ ៣​ទៅ​៤​ដង​ទៅ​តាម​កម្មវិធី​នានា ការ​ជួបជុំ សប្បាយ​រីករាយ​នៅ​រៀង​រាល់​ចុង​ស​ប្តា​ហ៍​ជាដើម ។ លោក​ថា ការ​ទទួលទាន​សុរា​ទាំងនោះ បាន​ជួយ​កសាង​មិត្តភាព និង​ការ​រំសាយ​អារម្មណ៍​នឿយណាយ​ពី​ការងារ​មុខរបរ​រកស៊ី ។ លោក ហ៊ឹ​ម អូន បន្ថែម​ថា ការ​ទទួលទាន​សុរា​ម្តង​ៗ​លោក​តែងតែ​ចំណាយ​យ៉ាងតិច​ចន្លោះ​ពី ៣០​ទៅ​៤០​ដុល្លារ ហើយ​នៅ​ក្នុង​វង់​នៃ​ការ​ជួបជុំ​មនុស្ស​៤​ទៅ​៥​នាក់​សុទ្ធតែ​ចំណាយ សឹងតែ​ដូច​ៗ​គ្នា ។ លោក​ថា លោក​ដឹង​ពី​ផលវិបាក​សុខភាព និង​គ្រោះថ្នាក់​ផ្សេង​ៗ​ពី​ការ​សេពសុរា តែ​ប្រសិនបើ​ទទួលទាន​ក្នុង​កម្រិត​ធម្មតា​នោះ​ជា​រឿង​ធម្មតា ។

អ្នក​នាង ជា វ៉ា​ន់​ដា ជា​អ្នក​លក់ដូរ​គ្រឿង​កំប៉ុង និង​ភេសជ្ជៈ ក្នុង​រាជធានី​ភ្នំពេញ​បានអោយ​ដឹង​ថា អ្នក​នាង​លក់ដូរ​ភេសជ្ជៈ​ជា​ពិសេស​សុរា ក្នុង​មួយ​ថ្ងៃ​អ្នក​នាង​លក់​ចេញ​យ៉ាងតិច​១០​កេស តែ​ប្រសិនបើ​ចុង​ស​ប្តា​ហ៍​ឈាន​ចូល​ដល់​៣០​កេស និង​ប្រសិនបើ​ចំ​រដូវ​បុណ្យ​ទាន ពិសេស​ដូច​ជា ចូល​ឆ្នាំ​វិញ​នោះ​ឈាន​ដល់​៥០​កេស​ក៏​មាន ហើយ​ក្នុង​មួយ​កេស តម្លៃ​១៣​ដុល្លារ ។ អ្នក​នាង ជា វ៉ា​ន់​ដា បន្ថែម​ថា អតិថិជន​ភាគច្រើន​ជា​អ្នក​រស់នៅ​ក្នុងភូមិ​ក្បែរ​ខាង ហើយ​ក៏​មាន អ្នក​មក​ពី​ចម្ងាយ​ៗ​ប្រសិនបើ​ពួក​គាត់​ជិះ​កាត់ និង​មាន​តម្រូវការ​សុរា​ទាំងនោះ ហើយ​ក៏​មាន អ្នកបញ្ជា​ទិញ​តាម​ប្រព័ន្ធ​អន​ឡាញ​ក៏​មាន ។

នៅ​ក្នុង​ស្ថានភាព​បែប​នេះ លោក យង់ គឹ​ម​អេ​ង បន្ថែម​ថា «​យើង​មិន​មាន​តួរ​លេខ​ក្នុង​ការ​ចំណាយ​ទិញ​សុរា​របស់​ប្រជាពលរដ្ឋ​ទេ ដោយសារ​យើង​មិន​មានការ​សិក្សា​ស្រាវជ្រាវ ដែល​មិន​ទាន់​បាន​ធ្វើ​អោយ​ទូលំទូលាយ ។ ចំពោះ​ការ​ចំណាយ គឺ​វា​ទៅ​តាម​ធនធាន​របស់​ពួក​គាត់ អ្នក​ខ្លះទៅ​គាត់​ចំណាយ​តិច​ទៅ​គាត់​មាន​ធនធាន​តិច អ្នកខ្លះ​ចំណាយ​ច្រើន​ទៅ ។ អ៊ីចឹង​បាន​គេ​ថា តម្លៃ​នេះ​សំខាន់​ណាស់ កាលណា​ពន្ធ​លើ​គ្រឿង​ស្រវឹង​កាន់តែ​ខ្ពស់ តម្លៃ​វា​កាន់តែ​ខ្ពស់​ធ្វើ​អោយ​មនុស្ស​ពិចារណា​ក្នុង​ការ​ចំណាយ​» ។ លោក យង់ គឹ​ម​អេ​ង បន្ត​ថា កាលណា​តម្លៃ​សុរា​ថោក​ធ្វើ​អោយ​មនុស្ស​អាច​ទិញ​បាន​ដោយ ងាយស្រួល​ធ្វើ​អោយ​គ្រោះថ្នាក់​កើតឡើង​ខ្ពស់ ហើយ​ប្រសិនបើ​ទីផ្សារ​មិន​ផ្លូវការ (​ស្រាស ស្រាថ្នាំ​) ក៏​ឡើង​ដូច​គ្នា​ផង​ដែរ ហើយ​ក៏​ធ្វើ​អោយ​មនុស្ស​ពិចារណា​ក្នុង​ការ​ទទួលទាន​ដូច​គ្នា​។

លោក យង់ គឹ​ម​អេ​ង បន្ថែម​ថា «​កាលណា​កាត់​បន្ថយ​គ្រឿង​ស្រវឹង​ទី​១ វា​ជួយ​សុខភាព ខ្លួន​គាត់​អោយ​កាន់តែ​ប្រសើរ ជួយ​ទី​២ អាច​សល់​លុយ​សល់​កាក់​អោយ​កូនចៅ​គាត់​ទៅ​រៀន ហើយ​ជួយ​ទី​៣ នោះ​អោយ​គ្រួសារ​របស់​គាត់​នោះ​មាន​សុភមង្គល អត់​ឈ្លោះ​ទាស់ទែង​គ្នា អត់​មាន​ហិ​.​ង្សា​កើតឡើង​នៅ​តាម​សហគមន៍​ដែល​យើង​ជួប​ជាក់ស្តែង គឺ​បែប​ហ្នឹងហើយ ជួយ​ទី​៤ ធ្វើ​អោយ​គាត់​ញាតិ​មិត្ត​រាប់អាន​ច្រើន ហើយ​ប្រសិនបើ​គាត់​ឈ្លក់​វង្វេង​ជាមួយ និង​សុរា ថ្ងៃ​ណា​ក៏​យក​ស្រា​ធ្វើ​ជា​ត្រីមុខ មិនមែន​គាត់​ផឹក ដើម្បី​រក​មិត្តភក្តិ​ទេ គឺ​បាត់​មិត្តភក្តិ​អស់ ហើយ​បាទ​» ។

ពាក់ព័ន្ធ​នឹង​បញ្ហា​នេះ លោក​បណ្ឌិត គី សេរី​វឌ្ឍន៍ អ្នកជំនាញ​ផ្នែក​សេដ្ឋកិច្ច នៃ​រាជ្យ​បណ្ឌិតសភា​កម្ពុជា បាន​ថ្លែង​ថា «​វិស័យ​គ្រឿង​ស្រវឹង​នេះ​ឃើញ​ថា មានការ​កើនឡើង​ខ្លាំង​ដែរ ក្នុង​ឆ្នាំ​២០២៣ ។ ម្នាក់​ៗ​រក​លុយ​មិនសូវ​បាន​សេ​ដ (sad) ទៅ​ទទួលទាន​បៀរ​គាស់​យក​រង្វាន់​ក្រែងលោ​បាន​ដែល​វា​ផ្ទុះ​ទៅ​ការ​ទទួលទាន​គ្រឿង​ស្រវឹង ហើយ​ក៏​បាន​ជំរុញ​អោយ​កំណើនសេដ្ឋកិច្ច​តាម​រយៈ​ការ​ផលិត​គ្រឿង​ស្រវឹង​» ។

លោក​បណ្ឌិត គី សេរី​វឌ្ឍន៍ បន្ត​ថា ការ​ផលិត​គ្រឿង​ស្រវឹង​នេះ​ច្រើន​ក៏​ជា​កត្តា​ជំរុញ​កំណើន​ការងារ​មួយ​ចំនួន ហើយ​ផល​ប៉ះពាល់​នៃ​គ្រឿង​ស្រវឹង​នេះ​ជា​រឿង​មួយ​ផ្សេង​ទៀត និង​ម្យ៉ាងទៀត​ចំណូល​នៃ​ការ​ផលិត​ក៏​មានការ​កើនឡើង ។ តាម​សេចក្តីរាយការណ៍​របស់​គេហទំព័​ត​ស្តា​ធី​ស្តា (Statista ) បាន​ឲ្យ​ដឹង​ថា ពលរដ្ឋ​កម្ពុជា​នៅ​ក្នុង​មួយ​ឆ្នាំ​ម្នាក់​អាច​ទទួលទាន​គ្រឿង​ស្រវឹង​ដល់​ទៅ​២៧,៣៨​លី​ត្រ ហើយ​ពាណិជ្ជកម្ម​គ្រឿង​ស្រវឹង​អាច​មាន​ទំហំ​ទីផ្សារ​ដែល​មាន​តម្លៃ​ជាង ១.២០០ លាន​ដុល្លារ ៕ ដោយៈ ស នី​ត

អត្ថបទសរសេរ ដោយ

កែសម្រួលដោយ