រាជធានីភ្នំពេញ ៖ ស្របនឹងឱកាសពិសេសទិវាកុមារអន្តរជាតិ ១ មិថុនា ព្រឹត្តិការណ៍ហ្វេសប៊ុកសប្បុរសធម៌បានបង្កើតឡើងក្នុងគោលបំណងប្រមូលថវិកាជួយដល់ក្រុមកុមារឥតទីពឹងជាច្រើននាក់ដែលកំពុងរស់នៅក្នុងស្ថានភាពខ្វះ ខាតក្នុងសមាគម UNA CAS។ ព្រឹត្តិការណ៍នេះបានប្រារព្ធឡើងនៅឯផ្សារទំនើបស៊ីធីម៉លជាន់ទី២ក្នុងរាជធានីភ្នំពេញ ដោយមានការចូលរួមពីបណ្តាមិត្តភក្តិហ្វេសប៊ុកប្រមាណ៦០០នាក់ដែលជាសិស្ស និស្សិត គ្រូបង្រៀន សាស្ត្រាចារ្យ ពាណិជ្ជករ បុគ្គលិកអង្គការ មន្ត្រីរដ្ឋាភិបាល កុមារា កុមារី រួមទាំងសិល្បករ សិល្បការិនី តារាចំរៀងល្បីៗប្រចាំព្រះរាជាណាចក្រកម្ពុជាដូចជាកញ្ញា មាស សុខសោភា ពូឃ្លាំង តារាបង្ហាញម៉ូដCambodia Super Model ក្រុមសៀករហស្សកម្មសូឡូ ក្រុមកំប្លែងCTN ដែលដឹកនាំដោយលោកវិចទ័រ ក្រុមតន្រ្តី Animation ពិធីករនិងពិធីការិនីនៃទូរទស្សន៍អាស៊ីអាគ្នេហ៍គឺលោក Boom កញ្ញាលីនដា ព្រមទាំងក្រុមចំរៀង P2 និងក្រុមរាំ BD ផងដែរ។
ដោយមានការអញ្ជើញជាអធិបតីដ៏ខ្ពង់ខ្ពស់ពីលោកខៀវ កាញារីទ្ធ រដ្ឋមន្ត្រីក្រសួងព៌ត័មានបានញ៉ាំងឱ្យកម្មវិធីនេះកាន់តែមានភាពស្រស់បំព្រង ហើយមានអត្ថន័យដែល
ជាកំលាំងចិត្តដ៏សំខាន់ដល់មិត្តភក្តិហ្វេសប៊ុកទាំងអស់ដែលចូលរួមក្នុងកម្មវិធី។ កម្មវិធីបានចាប់ផ្តើមដោយសុន្ទរកថាបើករបស់លោកស៊ីវ សុខខឿន(អ្នកផ្តើមគំនិតនិងជាអ្នករៀបចំ)ដែលប្លែកជាងសុន្ទរកថាធម្មតាដោយសុន្ទរកថារបស់លោកមានការច្រៀងកាត់ពីតារាចំរៀងមាស សុខសោភា អាដា សំអាត ពូឃ្លាំង និងបញ្ញា ព្រមទាំងការចូលរួមសំដែងពីក្រុមកុមារកំព្រា នៅមជ្ឈមណ្ឌល UNACAS ផងដែរ។ ចំរៀង នោះមានចំណងជើងថា«យើងទាំងអស់គ្នាដើម្បីកុមារ»។ សុន្ទរកថាដ៏ប្លែកនេះបានធ្វើអោយលោករដ្ឋមន្ត្រី និងអ្នកចូលរួមទាំងអស់អត់ទ្រាំមិន ទះដៃមិនបាន។
លោកប៊ុន តុកសិលា ដែលជាអ្នកដឹកនាំមជ្ឈមណ្ឌល UNACAS បានឡើងថ្លែងអំពីមជ្ឈមណ្ឌលរបស់លោកដែលមានកុមារកំព្រា៩២នាក់ និងស្ត្រីមេម៉ាយ៣៨នាក់។ មជ្ឈមណ្ឌលរបស់លោកមានការលំបាកខ្លះ ដោយពេលខ្លះជួបការខ្វះខាតផ្នែកស្បៀងអាហារ សំលៀកបំពាក់កុមារ សំភារសិក្សា សម្ភារអនាម័យយានជំនិះសំរាប់កុមារធ្វីដំណើរទៅសាលារៀនតុកៅអីក្នុងបន្ទប់កុមារនីមួយៗជាដើម។ លោកបានថ្លែងអំណរគុណដល់រាជរដ្ឋាភិបាលដែលដឹកនាំដោយសម្តេចតេជោហ៊ុន សែន ដែលសមេ្តចជារឿយៗតែងយកចិត្តទុកដាក់ដល់កុមារកំព្រានិងស្ត្រីមេម៉ាយ។ លោកក៏បានបញ្ចប់សេចក្តីថ្លែងដោយការអំពាវនាវសូមអោយទ្រង់ ឯកឧត្តម លោកជំទាវ អស់លោក លោកស្រី យុវជន យុវនារី និង មិត្តភក្តិេហ្វសប៊ុកទាំងអស់មេត្តារំលែកពេលវេលាទៅសួរសុខទុក្ខកុមារកំព្រានៅមជ្ឈមណ្ឌល UNACAS និងពាំនាំនូវអំណោយសប្បុរសធម៌ជួយដល់កុមារនៅទីនោះ ។
បន្ទាប់មកលោកខៀវ កាញារីទ្ធ បានឡើងថ្លែងសំណេះសំណាលស្វាគមន៍និងលើកទឹកចិត្តដល់មិត្តភក្តិទាំងអស់ដែលបានជួបជុំគ្នាធ្វើកម្មវិធីដ៏មានអត្ថន័យនេះ ដ្បិត Facebook ជាប្រព័ន្ធបណ្តាញសង្គមដែលភ្ជាប់ទំនាក់ទំនងរវាងគ្នានិង គ្នាបានរហ័សតាមចិត្ត ហើយងាយស្រួលក្នុងការ ចែកចាយព័ត៌មានផងដែរ។ លោកបានលើកសរសើរដល់លោកស៊ីវ សុខខឿន ដែលបានផ្តួចផ្តើមនិងរៀបចំកម្មវិធីនេះឡើងហើយក៏សូមអោយកម្មវិធីនេះមានកាន់តែច្រើនថែមទៀតដើម្បីជួយកុមារ។
លោករដ្ឋមន្ត្រីបានផ្តល់អង្ករចំនួន ២តោន កុំព្យូទ័រយួរដៃ២គ្រឿង សៀវភៅសរសេរ៥០០ក្បាល និងប៊ិច៥០០ដើមដែលជាអំណោយផ្ទាល់ខ្លួនរបស់លោកដល់កុមារកំព្រាដ្បិតលោកស្រលាញ់ដល់កុមារកំព្រា។ បន្ទាប់មកមានមតិលើកទឹកចិត្តនិងការអំពាវនាវឱ្យមានការផ្តល់អំណោយសប្បុរសធម៌ពីបណ្តាមិត្តភក្តិហ្វេសប៊ុកដល់កុមារកំព្រា UNACASរបស់លោកគ្រូអ៊ួង រៀន ដែលជាប្រធានគណៈកម្មការអំណោយសប្បុរសធម៌ ចំរៀង ពិសេសរបស់កញ្ញាមាស សុខសោភា និងពូឃ្លាំងជាមួយកុមារ។ មានការសំដែងសៀករហស្សកម្មរបស់ក្រុមSoloនិងការសំដែងអំពីតំលៃកុមាររបស់ក្រុមកំប្លែងCTN ដែល ដឹកនាំដោយលោកវិចទ័រ។
កម្មវិធីបានប្រព្រឹត្តទៅដោយជោគជ័យជា មួយនឹងការបរិភោគអាហារួមគ្នា ការជួបមិត្តភក្តិ ផ្ទាល់ និងនាំយកអំណោយសប្បុរសធ៌មដល់កុមារកំព្រា UNACAS ដោយមានការឧបត្ថម្ភធំពីទស្សនាវដ្តី CM និងសហការឧបត្ថមដោយ ក្រុមហ៊ុន CBM BB World, Sabay Com puter, Coca-Cola, Town Production, Vital, Svang Dara Production, និង Cambodia Supper Model។ តាមរយៈលោក ស៊ីវ សុខឿន បានជំរាបថា នេះជាកម្មវិធីលើកទី៤ហើយសម្រាប់ការ ជួបជុំមិត្តភក្តិហ្វេសប៊ុក ប៉ុន្តែវាជាកម្មវិធីសប្បុរសធម៌លើកទី១ដែលពួកគេអាចចូលរួមជួយ ដល់សង្គម៕
ចែករំលែកព័តមាននេះ