រាជធានីភ្នំពេញ ៖ មានកំហុសឆ្គងជាច្រើនដែលឪពុកម្តាយមួយចំនួនបានបង្កើតឡើងក្នុងការចិញ្ចឹមកូន ដូច្នេះកុំធ្វើខុសបន្តទៀត ។ ខាងក្រោមនេះ គឺជាទម្លាប់មិនល្អមួយចំនួនដែលអ្នកគួរចៀសវាង ៖ ១. ការឈ្លោះប្រកែកគ្នា…
រាជធានីភ្នំពេញ ៖ មានកំហុសឆ្គងជាច្រើនដែលឪពុកម្តាយមួយចំនួនបានបង្កើតឡើងក្នុងការចិញ្ចឹមកូន ដូច្នេះកុំធ្វើខុសបន្តទៀត ។ ខាងក្រោមនេះ គឺជាទម្លាប់មិនល្អមួយចំនួនដែលអ្នកគួរចៀសវាង ៖
១. ការឈ្លោះប្រកែកគ្នា ៖ រឿងមួយនេះ គឺពិបាកណាស់ ។ ការឈ្លោះប្រកែកគ្នា ជាការរំខានដ៏ធំមួយសម្រាប់ក្រុមគ្រួសារភាគច្រើន ប៉ុន្តែអ្នកត្រូវរកវិធីរហ័ស ដើម្បីដោះស្រាយ ។ ជាឧទាហរណ៍ ពេលនៅក្នុងឡាន បើកូនឈ្លោះគ្នា អ្នកគួរឈប់ឡានរហូតពួកគេឈប់ឈ្លោះគ្នា ។ ប្រសិនបើក្មេងៗវាយគ្នាដណ្តើមតុក្កតា ឬប្រដាប់ប្រដាក្មេងលេង នៅថ្ងៃបន្ទាប់ ចូរយករបស់ទាំងនោះទុក ហើយប្រាប់ពួកគេថា អ្នកលែងឱ្យពួកគេលេងទៀតហើយ បើនៅដណ្តើមគ្នាទៀត ។
២. ការរៀបចំមិនបានល្អ ៖ យើងនឹងមិនដែលមានគ្រួសារល្អឥតខ្ចោះនោះទេ ប៉ុន្តែការរៀបចំទុកដាក់ឱ្យបានល្អ គឺជារឿងចាំបាច់ណាស់ក្នុងគ្រួសារ ។ ចូរចាប់ផ្តើមជាមួយនឹងតារាងពេលវេលា កាលវិភាគ និងប្រតិទិនដ៏អស្ចារ្យសម្រាប់សមាជិកគ្រួសារអ្នក ។ ត្រូវបង្រៀនខ្លួនឯង និងគ្រួសារអ្នកឱ្យចេះគ្រប់គ្រងកាលវិភាគ ហើយអនុវត្តវាឱ្យបានល្អ ។
៣. ការចំណាយខ្ជះខ្ជាយ ៖ ពេលនាំកូនញ៉ាំអាហារខាងក្រៅ អ្នកគួរកាត់បន្ថយការចំណាយខ្ជះខ្ជាយក្នុងការហៅម្ហូបច្រើន ហើយញ៉ាំមិនអស់ ។ មុនទិញរបស់របរ អ្នកអាចសួរខ្លួនឯង និងសមាជិកគ្រួសារផ្សេងទៀត តើនេះជាតម្រូវការ ឬការចង់បាន ? ប្រសិនបើវាជាតម្រូវការយើងនឹងទទួលបានរបស់របរនោះដោយរីករាយ ។ ប៉ុន្តែប្រសិនបើវាជាការចង់បាន អ្នកអាចសម្រេចចិត្តគិតម្តងទៀត ។ ម្យ៉ាងទៀត អ្នកគួរបង្រៀនកូនចែករំលែករបស់របរប្រើប្រាស់មួយចំនួនជាមួយគ្នា ដើម្បីកាត់បន្ថយការទិញរបស់ដដែលនោះពីរបីដូចគ្នា ។
៤. មិនញ៉ាំអាហារពេលល្ងាចជាលក្ខណៈគ្រួសារ ៖ នៅពេលដែលយើងឃើញថា ខ្លួនយើង
រវល់ពេញមួយសប្តាហ៍ នេះគឺជាសកម្មភាពដែលធ្វើឱ្យគ្រួសាររងទុក្ខ ។ ធ្វើឱ្យវាជាអាទិភាពក្នុងការទទួលទានអាហារពេលល្ងាចជាលក្ខណៈគ្រួសារជាមួយគ្នាយ៉ាងហោចណាស់ ៣ ឬ ៤ ដងក្នុងមួយសប្តាហ៍ ។
៥. បច្ចេកវិទ្យា ៖ លើកទឹកចិត្តកូនរបស់អ្នកឱ្យចំណាយពេលលេងនៅខាងក្រៅ ឬជាមួយមិត្តភក្តិរបស់ពួកគេផ្ទាល់ ។ ម្យ៉ាងទៀត កុំឱ្យកូនរបស់អ្នកយកទូរទស្សន៍ ទូរស័ព្ទ ឬថេប្លេតរបស់ពួកគេទៅបន្ទប់នៅពេលយប់ ។
៦. ការប្រៀបធៀប ៖ កុំប្រៀបធៀបកូនរបស់អ្នកទៅនឹងក្មេងផ្សេងទៀត ប្តី ឬប្រពន្ធរបស់អ្នកជាមួយប្តី ឬប្រពន្ធផ្សេងទៀត ។ កុំបន្ថែមសម្ពាធនោះទៅក្នុងគ្រួសាររបស់អ្នក ៕ ប្រភព ៖ susanme
អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និងសាលារៀនណត្សឡាញន៍ ។ សាលារៀននឹងបើកដំណើរការសាខាថ្មី ៣ បន្ថែមទៀតនៅពេលខាងមុខនេះ គឺសាខាក្រុងតាខ្មៅ សាខាទួលពង្រ និងសាខាក្រុងច្បារមន ខេត្តកំពង់ស្ពឺ ។ សាលារៀនផ្តល់ជូនកម្មវិធីមត្តេយ្យភាសាខ្មែរ និងអង់គ្លេស កម្មវិធីភាសាអង់គ្លេសសម្រាប់កុមារ កម្មវិធីភាសាអង់គ្លេសសិស្សធំ កម្មវិធីចំណេះទូទៅខ្មែរ ពីថ្នាក់ទី ១ ដល់ទី ១២ និងកម្មវិធីភាសាចិន ។
លើសពីនេះ សាលារៀនក៏បន្ថែមនូវវេទិកា និងមធ្យោបាយសិក្សាយ៉ាងសម្បូរបែបជាមួយនឹងប្រព័ន្ធគ្រប់គ្រងសាលារៀន ប្រព័ន្ធគ្រប់គ្រង់ការសិក្សា និងអេបសាលារៀនជូនដល់មាតាបិតាសិស្ស និងសិស្សានុសិស្សក្នុងការគ្រប់គ្រងការសិក្សា និងតាមដានព័ត៌មានសិក្សារបស់បុត្រធីតាផងដែរ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕
ចែករំលែកព័តមាននេះ