ADផ្ទាំងផ្សព្វផ្សាយពាណិជ្ជកម្ម

Picture

ថៃ​ដា.ក់​គុ.ក​ចៅអធិការវត្ត៤៦៨​ឆ្នាំ​ពី​បទ​លួ.ច​លុយ​បច្ច័យ​៨​លាន​ដុល្លារ

3 ខែ មុន

ទី​ក្រុង​បាង​កក៖ ថ្មី​ៗ​នេះ អតីត​ចៅ​អធិការ​វត្ត​មួយ​អង្គ​នៅ​ប្រទេស​ថៃ​ដែល​មាន​កិត្តិ​នាម​ល្បី​ល្បាញ​ បែរ​ជា​ប្រព្រឹត្ត​អំពើ​លួច​​លុយ​បច្ច័យ​របស់​ពុទ្ធ​បរិស័ទ​​ដើម្បី​ធ្វើ​មាន​​ធ្វើ​បាន​មួយ​អង្គ​ឯង។ គាត់​​ត្រូវ​តុលាការ​កាត់​​ទោស​ឱ្យ​​ជាប់​ពន្ធ​នាគារ​៤៦៨​ឆ្នាំ​។ ការ​ដាក់​ទោស​អតីត​សង្ឃ​ព្រះ​នាម​​ព្រះ​អាចារ្យ​ខុម (Phra Ajarn khom) ​ដែល​ជា​អតីត​ចៅ​អធិ​ការ​វត្ត​បឋម​​គិរី…

ទី​ក្រុង​បាង​កក៖ ថ្មី​ៗ​នេះ អតីត​ចៅ​អធិការ​វត្ត​មួយ​អង្គ​នៅ​ប្រទេស​ថៃ​ដែល​មាន​កិត្តិ​នាម​ល្បី​ល្បាញ​ បែរ​ជា​ប្រព្រឹត្ត​អំពើ​លួច​​លុយ​បច្ច័យ​របស់​ពុទ្ធ​បរិស័ទ​​ដើម្បី​ធ្វើ​មាន​​ធ្វើ​បាន​មួយ​អង្គ​ឯង។ គាត់​​ត្រូវ​តុលាការ​កាត់​​ទោស​ឱ្យ​​ជាប់​ពន្ធ​នាគារ​៤៦៨​ឆ្នាំ​។ ការ​ដាក់​ទោស​អតីត​សង្ឃ​ព្រះ​នាម​​ព្រះ​អាចារ្យ​ខុម (Phra Ajarn khom) ​ដែល​ជា​អតីត​ចៅ​អធិ​ការ​វត្ត​បឋម​​គិរី (Pa Dhammakiri) នៃ​ខេត្ត​នគរ​រាជ​សីមា (Nakhon Ratchasima) ធ្វើ​ឡើង​កាល​ពី​ថ្ងៃ​ទី​២០ ខែ​មីនា​ តប​តាម​ពាក្យ​បណ្ដឹង​របស់​ព្រះ​រាជ​អាជ្ញា​​។

ព្រះ​អាចារ្យ​ខុមកាល​នៅ​ជា​ចៅ​អធិការ​វត្ត​បឋម​គិរី

​​បក្ស​ពួក​៨​នាក់​ទៀត​ក៏​ត្រូវ​ជាប់​ចោទ​​ពី​បទ​​លួច​លុយ​បច្ច័យ​ជិត​៣០០​លាន​បាត​ ឬ​ស្មើ​នឹង​ជាង​៨​លាន​ដុល្លារ​ដែល​ពុទ្ធ​បរិស័ទ​ខំ​ផ្ដាច់​ពី​មាត់​ពង្រាត់​ពី​ក​​​យក​ទៅ​ធ្វើ​បុណ្យ។​ ​នៅ​ក្នុង​ចំណោម​ជន​ជាប់​ចោទ​៨​នាក់​ទៀត​នោះ​គឺ​ទី​១-​បុគ្គល​ឈ្មោះ​ពុទ្ធិ​មៈ​​ធម្មោ​ (Wutthima Thaomor) ដែល​ធ្លាប់​ជា​ចៅ​អធិការ​វត្ត​ដដែល​មុន​បុគ្គល​ឈ្មោះខុម​មួយ​ជំនាន់​​, ទី២-​​ប្អូន​ស្រី​របស់​បុគ្គល​ឈ្មោះ​ខុម, ទី​៣-​អ្នក​បើក​ឡាន​ឱ្យ​បុគ្គល​ឈ្មោះ​ខុម និង​ទី​៤-​អតីត​សង្ឃ​៥​អង្គ​ដែល​ត្រូវ​គណៈ​វិន័យ​សង្ឃ​​ចាប់​ផ្សឹក​ (defrock)។

ព្រះ​អាចារ្យ​ខុម​ក្រោយ​​ពេល​ចាប់​ផ្សឹក និង​នាំ​ខ្លួន​ទៅ​មន្ទីរ​ឃុំ​ឃាំង

​តុលាការ​រក​ឃើញ​ថា​បុគ្គល​ឈ្មោះ​ខុម​បាន​ឃុប​ឃិត​គ្នា​ជា​មួយ​ព្រះ​សង្ឃ​ដែល​ត្រូវ​ចាប់​ផ្សឹក​ទាំង​៥​អង្គ​នោះ​ដើម្បី​កេង​កិប​លុយ​បច្ច័យ​។ បន្ទាប់​មក ខុម​វេរ​លុយ​ដែល​លួច​បាន​ដាក់​ចូល​ទៅ​ក្នុង​កុង​ធនាគារ​ផ្ទាល់​ខ្លួន​របស់​គាត់​។ មាន​តែ​ប្អូន​ស្រី​របស់​គាត់​តែ​ប៉ុណ្ណោះ​ទើប​អាច​​ដក​លុយ​នោះ​បាន។ តុលាការ​រក​ឃើញ​ថា​ប្អូន​ស្រី​រូប​នេះ​ដក​លុយ​ពី​កុង​​ធនាគារ​ចំនួន​៧៦​ដង​។​ ខុម​ប្រាប់​ឱ្យ​ប្អូន​ស្រី​​​គាត់​ដក​លុយ​ជា​សាច់​ប្រាក់​សុទ្ធ​​ រួច​យក​ទៅ​​លាក់​ទុក​នៅ​ក្នុង​ផ្ទះ​របស់​គាត់។

ព្រះ​អាចារ្យ​ខុមកាល​នៅ​ជា​ចៅ​អធិការ​វត្ត​បឋម​គិរី, ព្រះ​អង្គ​កំពុង​សម្ដែង​ធម្ម​ទេសនា​ឱ្យ​ពុទ្ធ​បរិស័ទ​ខិត​ខំ​លះ​បង់​កិលេស កាម​រាគៈ លោភៈ ទោសៈ​ មោហៈ។ ប៉ុន្តែ​ខ្លួន​ឯង​កំពុង​បន្លំ​លួច​លុយ​វត្ត​រាប់​លាន​ដុល្លារ​។ នេះ​ជា​ចរិត​មាយា​ធិបតេយ្យ ឬ​ចរិត​លាក់​ពុត​​ (hypocrisy) របស់​បុគ្គល​ខ្លះ​ដែល​ចូល​ចិត្ត​និយាយ​បែប​នេះ ប៉ុន្តែ​ធ្វើ​បែប​​នោះ។

​សមត្ថ​កិច្ច​រឹប​អូស​បាន​ក្រដាស​ប្រាក់​សរុប​៥១,៤​លាន​បាត​ ឬ​ស្មើ​នឹង​១លាន ៤​សែន​ដុល្លារ​អាមេរិក។ ខុម​​បាន​​បង្គាប់​ឱ្យ​បុគ្គល​ដទៃ​ទៀត (​ដែល​កាល​នោះ​នៅ​ជា​លោក​លោក​​សង្ឃ​ដូច​គ្នា) ​ដើម្បី​លាក់​ទុក​ទ្រព្យ​សម្បត្តិ​របស់​វត្ត​នៅ​កន្លែង​ផ្សេង។ ជា​សរុប, អាជ្ញាធរ​រក​ឃើញ​របស់​របរ​ចំនួន​១៤៥៥​គ្រឿង និង​សាច់​ប្រាក់​​ជា​ច្រើន​។ របស់​របរ​ដែល​លួច​បាន​ទាំង​នេះ​សរុប​ជា​​ទឹក​ប្រាក់​២៩៩,៥​លាន​បាត​ ឬ​ស្មើ​នឹង​៨​លាន​ ៣​សែន​ដុល្លារ​។

លុយ​បច្ច័យ​ដែល​ពុទ្ធ​បរិស័ទ​ខំ​ផ្ដាច់​ពី​មាត់​ពី​ក​យក​ទៅ​ធ្វើ​បុណ្យ​ត្រូវ​ព្រះ​អាចារ្យ​ខុម​វ័ធ​ខ្ទេច​។ គាត់​បង្គាប់​ឱ្យ​បក្ស​ពួក​របស់​គាត់​យក​លុយ​ទៅ​លាក់​ទុក​នៅ​ខាង​ក្រៅ​បរិវេណ​វត្ត​ដើម្បី​ងាយ​ស្រួល​បណ្ដោះ​ចេញ​ទៅ​ដាក់​នៅ​ក្នុង​កុង​ធនាគារ។ បន្ទាប់​មក​ បង្វែរ​ពី​កុង​ធនាគារ​ដក​ជា​លុយ​សុទ្ធ​វិញ​។ គិត​ទៅ លោក​សង្ឃ​អង្គ​នេះ​ចេះ​វិធី​លាង​លុយ​ក​ខ្វក់​ទៀត​។ ពិត​ជា​ល្បិច​ខ្ពស់​មែន​។

​នេះ​ជា​សំណុំ​រឿង​ក្ដៅ​កក្រើក​ប្រទេស​ថៃ​។ តុលាការ​រក​ឃើញ​ថា​​ខុម​មាន​ទោស​ដូច​ការ​ចោទ​ប្រកាន់​ចំនួន​​​៧៨​ករណី​។ មួយ​ករណី​ៗខុម​ត្រូវ​ជាប់​ពន្ធ​គារ​៦​ឆ្នាំ​។ ដូច្នេះ តុលាការ​សម្រេច​ផ្ដន្ទា​ទោស​ឱ្យ​គាត់​ជាប់​ពន្ធ​នា​គារ​សរុប​៤៦៨​ឆ្នាំ។ ​ដោយ​ឡែក​ អ្នក​សម​គំនិតដទៃ​ទៀត​ក៏​ជាប់​ពន្ធ​នាគារ​មិន​តិច​រយ​ឆ្នាំ​ដែរ​។ បុគ្គល​ឈ្មោះ​ពុទ្ធិមៈ​ត្រូវ​តុលាការ​រក​ឃើញ​ថា​មាន​ទោស​៧៨​ករណី​ត្រូវ​ជាប់​ពន្ធ​នា​គារ​៣១២​ឆ្នាំ​។ ប្អូន​ស្រី​របស់​ខុម​មាន​ទោស​៧៧​ករណី​ត្រូវ​ជាប់​ពន្ធ​នា​គារ​៣០៨​ឆ្នាំ។

លុយ និង​របស់​របរ​ដទៃទៀត​ដែល​ពុទ្ធ​បរិស័ទ​ចូល​ជា​បច្ច័យ​ ឬ​ជា​ទេយ្យ​ទាន ​ត្រូវ​ព្រះ​អាចារ្យ​ខុម និង​បក្ស​ពួក​លួច​ចេញ​ពី​វត្ត​។ សមត្ថ​កិច្ច​បាន​ប្រមូល​របស់​ទាំង​នេះ​ដើម្បី​ទុក​ជា​ភស្តុ​តាង​ដាក់​បន្ទុក។

ចំណុច​សំខាន់​មួយ​ដែល​គួរ​កត់​សម្គាល់​នៅ​ក្នុង​ប្រព័ន្ធ​ច្បាប់​របស់​ប្រទេស​ថៃ​។ រយៈ​ពេល​អតិ​បរមា​ដែល​ទណ្ឌិត​ម្នាក់​ៗ​អាច​អនុវត្ត​ទោស​នៅ​ក្នុង​ពន្ធ​នា​គារ​អស់​ល្បត់​ត្រឹម​៥០​ឆ្នាំ​។ អ្នក​ពាក់​ព័ន្ធ​ដទៃ​ទៀត​ជួយ​សហ​ការ​យ៉ាង​ល្អ​នៅ​ក្នុង​ការ​ផ្ដល់​សក្ខីកម្ម និង​វែក​មុខ​អ្នក​មេ​គំនិត​នៅ​ក្នុង​រឿង​នេះ។ ដូច្នេះ តុលាការ​យោគ​យល់​ចំពោះ​ពួក​គេ​ និង​ផ្ដន្ទា​ទោស​ដាក់​គុក​ល្មម​ៗ​ត្រឹម​ពីរ​បី​ឆ្នាំតែ​​ប៉ុណ្ណោះ៕

ប្រភព៖ Bangkok Post
https://www.bangkokpost.com/thailand/general/2761971/former-abbot-gets-468-year-term-for-embezzlement

លុយ និង​របស់​របរ​ដទៃទៀត​ដែល​ពុទ្ធ​បរិស័ទ​ចូល​ជា​បច្ច័យ​ ឬ​​ជា​ទេយ្យ​ទាន ​ត្រូវ​ព្រះ​អាចារ្យ​ខុម និង​បក្ស​ពួក​លួច​ចេញ​ពី​វត្ត​។ សមត្ថ​កិច្ច​បាន​ប្រមូល​របស់​ទាំង​នេះ​ដើម្បី​ទុក​ជា​ភស្តុ​តាង​ដាក់​បន្ទុក។
អ្នក​សម​គំនិត​ជា​មួយ​ព្រះ​អាចារ្យ​ខុម​ត្រូវ​សមត្ថ​កិច្ច​នាំ​ខ្លួន​ទៅ​ផ្សឹក​ និង​ចាប់​ឃុំ​ខ្លួន
អ្នក​សម​គំនិត​ជា​មួយ​ព្រះ​អាចារ្យ​ខុម​ត្រូវ​សមត្ថ​កិច្ច​នាំ​ខ្លួន​ទៅ​ផ្សឹក​ និង​ចាប់​ឃុំ​ខ្លួន
លុយ​ទាំង​ដុំៗ​ដែល​ជា​កម្លាំង​ញើស​ឈាម​ខំ​រហេម​រហាម​របស់​ពុទ្ធ​បរិស័ទ​យក​ទៅ​ធ្វើ​បុណ្យ​ដើម្បី​កសាង​កុសល​សម្រាប់​អនាគត​ជាតិ​ត្រូវ​ព្រះ​អាចារ្យ​ខុម និង​បក្ស​ពួក​វ័ធ​ខ្ទេច​ដើម្បី​ធ្វើ​មាន​ធ្វើ​បាន​តែ​ក្រុម​ខ្លួន​។

អត្ថបទសរសេរ ដោយ

កែសម្រួលដោយ