មនុស្សជំនិត ឡេង ចាន់ណា ២នាក់ទៀត ត្រូវឃុំខ្លួននៅពន្ធនាគារខេត្តជាបណ្តោះអាសន្ន
- សៀមរាប
ខេត្តសៀមរាប ៖ នៅថ្ងៃទី២១ មីនា ឆ្នាំ២០២៤ នេះ មនុស្សជំនិតជាមួយជនសង្ស័យ ឡេង ចាន់ណា ម្ចាស់ក្រុមហ៊ុនលាន…
ខេត្តសៀមរាប ៖ នៅថ្ងៃទី២១ មីនា ឆ្នាំ២០២៤ នេះ មនុស្សជំនិតជាមួយជនសង្ស័យ ឡេង ចាន់ណា ម្ចាស់ក្រុមហ៊ុនលាន ស៊ីធី វើលដ៍ ឯ.ក ចំនួនពីរនាក់ទៀតហើយ ត្រូវបានឃាត់ខ្លួនបញ្ជូនទៅដាក់ពន្ធនាគារជាណ្តោះអាសន្នក្នុងសង្កាត់ជ្រា ខេត្តសៀមរាប ។ នេះបើតាមសេចក្តីថ្លែងការណ៍របស់សាលាដំបូងខេត្តសៀមរាប ។ សេចក្តីថ្លែងការណ៍ពីសាលាដំបូងខេត្តសៀមរាបស្តីពីការនាំខ្លួន និងឃុំខ្លួនជនត្រូវចោទបន្ថែមក្នុងសំណុំរឿងព្រហ្មទណ្ឌ ពាក់ព័ន្ធនឹងក្រុមហ៊ុនប្រ៊ីលានស៊ីធីវើលដ៏ ឯ.ក ។
អ្នកនាំពាក្យសាលាដំបូងខេត្តសៀមរាបបានប្រាប់ឱ្យដឹងថា នៅថ្ងៃទី២០ ខែមីនា ឆ្នាំ២០២៤ ចៅក្រមស៊ើបសួរនៃសាលាដំបូងខេត្តសៀមរាប បានចេញដីកាបង្គាប់ឱ្យនាំខ្លួនជនត្រូវចោទចំនួន២រូប ម្នាក់ឈ្មោះអ៊ឹម ស្រីវុទ្ធ ភេទស្រី អាយុ៣៥ឆ្នាំ មានស្រុកកំណើត ខេត្តកំពង់ចាម និងឈ្មោះ សយ កុសល ភេទប្រុស អាយុ៣៤ឆ្នាំ មានស្រុកកំណើតនៅខេត្តកំពង់ធំ មកបង្ហាញខ្លួននៅចំពោះមុខចៅក្រមស៊ើបសួរ ដើម្បីសួរចម្លើយពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» តាមបញ្ញតិ្តមាត្រា៣៨នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវកម្ម ។
បន្ទាប់ពីបានសួរចម្លើយជនត្រូវចោទ ពិនិត្យភស្តុតាងក្នុងសំណុំរឿង ព្រមទាំងពិចារណាអង្គហេតុ និងអង្គច្បាប់គ្រប់គ្រប់ជ្រុងជ្រោយ ចៅក្រមស៊ើបសួរ បានសម្រេចឃុំខ្លួនជនត្រូវត្រូវចោទទាំង ២ រូប ខាងលើ ជាបណ្តោះអាសន្ន និងបានបញ្ជូនទៅពន្ធនាគារខេត្តសៀមរាប ដើម្បីបន្តការស៊ើបសួរតាមនីតិវិធីច្បាប់ នៅល្ងាចថ្ងៃទី២១ ខែមីនាឆ្នាំ២០២៤។
អ្នកនាំពាក្យសាលាដំបូងខេត្តសៀមរាប សូមបញ្ជាក់ជូនបន្ថែមថា សាលាដំបូងខេត្តសៀមរាប និង បន្តចាត់ការសំណុំរឿងនេះ ឱ្យបានត្រឹមត្រូវតាមនីតិវិធីច្បាប់ជាធរមាន។ សាលាដំបូងខេត្តសៀមរាប នឹង ជម្រាបជូនព័ត៌មានជាបន្តបន្ទាប់ក្រោយទៀត នៅពេលមានចំណាត់ការថ្មី។
សូមបញ្ជាក់ថា ក្រុមការងារចាត់តាំងដោយអ្នកស្រី ឡេង ចាន់ណា ចំនួន២៥រូបបន្ថែមទៀត ត្រូវបាន ចៅក្រមស៊ើបសួរនៃសាលាដំបូងខេត្តសៀមរាបបានចេញដីកាឱ្យចូលខ្លួន នៅថ្ងៃទី២២ ខែមីនា ឆ្នាំ២០២៤ ដើម្បីសួរចម្លើយពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» តាមបញ្ញតិ្តមាត្រា៣៨នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវកម្ម ។
ចែករំលែកព័តមាននេះ