រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអះអាងថា រដ្ឋាភិបាលមិនមានគោលការណ៍ដោះដូរ ទីតាំងរបស់មជ្ឈមណ្ឌជាតិ នៃជនពិការតេជោសែន ទៅណាផ្សេងទៀតនោះទេ ពោលគឺដរាបណាសម្តេចធិបតី នៅតែជានាយករដ្ឋមន្ត្រី គឺសម្តេច មិនចុះហត្ថលេខា ឲ្យផ្លាស់ប្តូរជាដាច់ខាត ។
ការអះអាងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីខាងលើនេះ ធ្វើឡើងក្នុងឱកាសអញ្ជើញសម្ពោធសមិទ្ធផលមជ្ឈមណ្ឌលជាតិ នៃជនពិការតេជោសែន និងគណៈកម្មាធិការជាតិ ប៉ារ៉ាឡាំពិកកម្ពុជា នាថ្ងៃទី២១ ខែមីនា ឆ្នាំ២០២៤ ។
ជាការឆ្លើយតបនឹងសំណើប្រធានមជ្ឈមណ្ឌលជាតិ នៃជនពិការតេជោសែន សម្តេចធិបតី ហ៊ុន ម៉ាណែត បានលើកឡើងថា នឹងរក្សាសមិទ្ធផល ដែលមាននៅមជ្ឈមណ្ឌលជាតិ នៃជនពិការតេជោសែន ទៅជាទីតាំងប្រវត្តិសាស្ត្រ សម្រាប់ជនពិការទៅអនាគត។ ក្នុងន័យនេះ សម្តេចធិបតី បានប្រើប្រាស់ពាក្យសាមញ្ញថា កុំឲ្យរើកញ្ជើទៀត ។
ក្នុងនោះ សម្តេចនាយករដ្ឋមន្ត្រី បានរំលឹកថា កាលពីជាង១០ឆ្នាំមុន នៅទីតាំង និងជុំវិញ នៃមជ្ឈមណ្ឌលជាតិ នៃជនពិការតេជោសែន គឺជាវាលស្រែសុទ្ធ ខណៈឥឡូវនេះ ពោលពេញដោយសំណង់លំនៅឋាន និងការអាគារខ្ពស់ៗ ដែលជាការអភិវឌ្ឍមួយយ៉ាងឆាប់រហ័ស និងមិននឹកស្មានដល់ ។
សម្តេចធិបតីនាយករដ្ឋមន្ត្រី បានគូសបញ្ជាក់ថា ៖ “សំខាន់សិលាចារឹក រាប់តោនដឹកមកនេះ មិនងាយរើទៅណាទេ ចឹងឯកភាព គឺត្រូវរក្សានៅទីនេះ កុំឲ្យមានការដោះដូរទៅណា។ រដ្ឋាភិបាល មិនមានគោលការណ៍ ដោះដូរទៅណាទេ។ នេះខ្ញុំនិយាយបាន ក្នុងនាមខ្ញុំជានាយករដ្ឋមន្ត្រីទេ ពីណាផ្សេងមក សិទ្ធិសម្រេចលើគេ តែដរាបណា ខ្ញុំនៅដឹកនាំរដ្ឋាភិបាល អត់មានចុះហត្ថលេខា ផ្លាស់ប្តូរទេ” ។
តាមការលើកឡើងរបស់សម្តេចធិបតី មជ្ឈមណ្ឌជាតិ នៃជនពិការតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា ត្រូវបានបានផ្ទេរសិទ្ធិ ពីក្រសួងកិច្ចការនារី មកឲ្យមជ្ឈមណ្ឌលផ្ទាល់រួចរាល់ហើយ ដូចនេះ សម្តេចនាយករដ្ឋមន្ត្រី បានស្នើឲ្យចូលរួមថែទាំសមិទ្ធផលមួយនេះ ។
សូមបញ្ជាក់ថា មជ្ឈមណ្ឌលជាតិ នៃជនពិការតេជោសែន មានផ្ទៃដីទំហំ ៥,០០០ម៉ែត្រក្រឡា ស្ថិតនៅក្នុងភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ ៕
ចែករំលែកព័តមាននេះ