ខេត្តកំពត ៖ គួរឱ្យសង្វេគណាស់ ទារកម្នាក់បានស្លាប់ពេលបញ្ជូនទៅមន្ទីរពេទ្យនៅរាជធានីភ្នំពេញ ដើម្បីសង្គ្រោះបន្ត ក្រោយពេលសម្រាលនៅមន្ទីរពេទ្យបង្អែកខេត្ត ។
តាមប្រភពព័ត៌មានឱ្យដឹងថា ស្ត្រីម្នាក់បានទៅឆ្លងទន្លេនៅមន្ទីរពេទ្យបង្អែកខេត្ត កាលពីវេលាម៉ោងប្រមាណ៥ និង៣០នាទីព្រឹកថ្ងៃទី១៨ ខែមីនា ឆ្នាំ២០២៤ តែជាគ្រោះអកុសល ដោយទារកកើតមកបញ្ច្រាសជើង គ្រូពេទ្យសម្រាលដែលមានទាំងបុរសនិងស្ត្រី ពេលចាប់ទាញចេញពីផ្ទៃម្ដាយ ស្រាប់តែបាក់ជើងទាំងសងខាង និងបាក់ដៃម្ខាង ។
បន្ទាប់ពីដឹងថា បាក់ដៃជើងទារក ក្រុមគ្រូពេទ្យបានយកបង់អបជើង និងដៃទារក ហើយនិយាយប្រាប់ជីដូនទារកថា «ត្រូវតែបញ្ជូនទៅភ្នំពេញ បើទុកនៅទីនេះគឺមានសង្ឃឹមតិចណាស់» ។
នៅវេលាម៉ោង៩ព្រឹកថ្ងៃដដែល ទារកត្រូវបានក្រុមគ្រូពេទ្យនៅមន្ទីរពេទ្យបង្អែកខេត្ត បញ្ជូនតាមរថយន្តសង្គ្រោះទៅមន្ទីរពេទ្យកុមារជាតិនៅរាជធានីភ្នំពេញ តែទៅមិនទាន់ដល់ផង ទារកក៏ស្លាប់នៅត្រឹមផ្សារឈូក ហើយរថយន្តសង្គ្រោះក៏បានដឹកសពទារកយកទៅផ្ទះ ។
ស្ត្រីជាម្ដាយរបស់ទារកនេះ ឈ្មោះ ឈឿន សម្បូរ អាយុ១៨ឆ្នាំ ជាកូនដំបូង រស់នៅភូមិកោះផ្ដៅ
ឃុំកំពង់ត្រាចខាងលិច ស្រុកកំពង់ត្រាច ។ នៅពេលរថយន្តដឹកសពទារកទៅផ្ទះប្រគល់ឱ្យក្រុមគ្រួសារ គឺម្ដាយរបស់ទារកនៅកំពុងសម្រាកព្យាបាលនៅមន្ទីរពេទ្យបង្អែកខេត្តនៅឡើយទេ ។
ចំពោះករណីខាងលើនេះ បើទោះបីជាមានការជជែកវែកញែកផុលផុសយ៉ាងណាក៏ដោយ ក៏ពេលនេះស្ត្រីជាម្តាយទារក និងក្រុមសាច់ញាតិ បានដាក់ពាក្យបណ្ដឹងទៅស្នងការដ្ឋាននគរបាលខេត្តរួចហើយ ។
នៅរសៀលថ្ងៃទី១៨ ខែមីនា ឆ្នាំ២០៤ ក្រុមគ្រូពេទ្យស្រុក និងនគរបាលស្រុក បានទៅពិនិត្យសពទារកផ្ទាល់រួចរាល់ហើយឃើញថា ទារកពិតជាបាក់ជើងបាក់ដៃដូចការអះអាងរបស់ជីដូនទារកមែន ។ សូមបញ្ជាក់ថា ទារកជួបគ្រោះអកុសលនេះ គឺជាកូនដំបូងរបស់ស្ត្រីឈ្មោះ ឈឿន សម្បូរ និងឪពុក ដែលជាកសិករ ។
ទោះបីជាបែបណា ការស្លាប់ទារកនេះ នៅមិនទាន់ឱ្យស្ត្រីជាម្តាយដឹងនៅឡើយទេ ។ ហើយមកទល់ថ្ងៃទី២០ មីនា នេះ ខាងមន្ទីរពេទ្យក៏មិនទាន់មានការឆ្លើយបំភ្លឺបែបណានៅឡើយទេ ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ