រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា ការបណ្តុះបណ្តាលជំនាញពេទ្យទាំងអស់ រួមមានទាំងរដ្ឋ ស្ថាប័នឯកជន អង្គការ គ្រឹះស្ថាននានា ត្រូវតែមានគុណភាពដូចគ្នា ព្រោះការព្យាបាលជីវិតមនុស្សដូចគ្នា ។
ថ្លែងក្នុងពិធីបិទ “សន្និបាតសុខាភិបាល លើកទី៤៣ ឆ្នាំ២០២៣ និងលើកទិសដៅការងារ ឆ្នាំ២០២៤” នារសៀលថ្ងៃទី១៩ ខែមីនា ឆ្នាំ២០២៤ នៅសណ្ឋាគារសូហ្វីតែល សម្តេចធិបតី ហ៊ុន ម៉ាណែត នាយករដ្ឋមន្ត្រី បានលើកឡើងយ៉ាងដូច្នេះថា ៖ «ការបណ្តុះបណ្តាលជំនាញពេទ្យ្ ទាំងស្ថាប័នរដ្ឋ វិស័យឯកជន គ្រឹះស្ថាននានា ត្រូវតែមានជំនាញ ព្រោះថា ការបណ្តុះបណ្តាលនេះ ទៅទីណា ក៏ដោយនៅតែព្យាបាលប្រជាពលរដ្ឋ។ មិនថា ពេទ្យអង្គការ ពេទ្យរដ្ឋ ពេទ្យឯកជនទេ គឺត្រូវតែធានាសុវត្ថិភាព ស្តង់ដា ដែលជាការងារសំខាន់» ។
សម្តេចធិបតី នាយករដ្ឋមន្ត្រី លើកឡើងថា មិនមែន ទាល់តែពេទ្យរដ្ឋ ត្រូវតែមានស្តង់ដាខ្ពស់ជាងពេទ្យឯកជន ខ្ពស់ជាងពេទ្យអង្គការនោះទេ គឺជីវិតមនុស្ស ត្រូវតែព្យាបាលឲ្យត្រូវ ហើយត្រូវតែមានការធានាខុសត្រូវ។ ទាំងពេទ្យរដ្ឋ ពេទ្យរាជធានី ឬពេទ្យខេត្ត ឬពេទ្យឯកជន ត្រូវតែមានជំនាញ ដូច្នេះអ្វីដែលសំខាន់នោះ គឺកក្តាធនធានមនុស្ស ត្រូវយកចិត្តទុកដាក់ក្នុងការបណ្តុះបណ្តាលជំនាញពេទ្យនេះ ។
សម្តេចធិបតី នាយករដ្ឋមន្ត្រី ក៏បានបន្តថា ការបណ្តុះបណ្តាលជំនាញពេទ្យនេះ រាជរដ្ឋាភិបាល បានគិតគូរណាស់ ហើយរាល់ការបណ្តុះបណ្តាលជំនាញពេទ្យទាំងអស់ ទាំងសាលាក្រហម ឬសាលាអាយយូ ឬនៅសាលាពេទ្យណាទៀត គឺមានសមត្ថភាព ក្នុងការប្រឡងចូលក្របខណ្ឌរដ្ឋដូចគ្នា ។
សម្តេចធិបតី នាយករដ្ឋមន្ត្រី បានគូសបញ្ជាក់បន្ថែមថា ៖ «អ៊ីចឹង ការបណ្តុះបណ្តាលជំនាញពេទ្យនេះ គឺត្រូវយកចិត្តទុកដាក់ ហើយរៀនជំនាញពេទ្យ អាចគួរឲ្យរឹង។ ហើយខ្ញុំស្នើសុំ ក្មួយៗនិស្សិត ដែលរៀនជំនាញពេទ្យ កុំស្នើសុំចូលក្របខណ្ឌ ដោយមិនឆ្លងកាត់ការប្រឡងអី» ។
សម្តេចនាយករដ្ឋមន្ត្រី បន្ថែមថា អ្នករៀនជំនាញពេទ្យ ត្រូវយល់ពីស្ថានភាពជំងឺ ហើយវាមិនអាចដូចជាកុំព្យូរទ័រ នោះទេ។ អ្នកជំងឺគឺមានជំងឺដូចគ្នា ប៉ុន្តែអាការៈ មិនដូចគ្នានោះទេ ដូច្នេះយើងអាចវាយតម្លៃខុស អ៊ីចឹងត្រូវធ្វើយ៉ាងណា ត្រូវធានានូវគុណភាព ។
ជាថ្មីម្តងទៀត សម្តេចធិបតី នាយករដ្ឋមន្ត្រី បានសង្កត់ធ្ងន់ថា ការបណ្តុះបណ្តាលពេទ្យ ត្រូវមានស្តង់ដាច្បាស់លាស់ នៅតាមសាលានីមួយៗ។ មានអ្នកខ្លះថា រៀនពេទ្យមានតម្លៃថ្លៃ តែវាត្រូវចំណាយច្រើនលើឧបករណ៍ ពិសោធន៍។ ការរៀនពេទ្យ មិនអាចរៀន តែទ្រឹស្តីហើយ ទៅធ្វើការវះកាត់ តាមកុំព្យូទ័រនោះទេ គឺត្រូវតែចេះវះកាត់ផ្ទាល់តែម្តង។ មិនមែនពេទ្យ ពេលចូលវះកាត់ផ្ទាល់ ឃើញឈាមសន្លប់នោះទេ ៕
ចែករំលែកព័តមាននេះ