ខេត្តពោធិ៍សាត់ ៖ បទបញ្ជារបស់រាជរដ្ឋាភិបាល ចុះទប់ស្កាត់បទល្មើសធនធានធម្មជាតិ ក្នុងភូមិសាស្ត្រស្រុកវាលវែង និងស្រុកភ្នំក្រវាញខេត្តពោធិ៍សាត់ បាននិងកំពុងតែរុករុលទៅមុខជានិច្ច ធ្វើឲ្យជនអគតិ ដែលស្រេកឃ្លានដីធ្លីមិនចេះឆ្អែត រត់ចោលទីតាំងបណ្ដោះអាសន្ន…
ខេត្តពោធិ៍សាត់ ៖ បទបញ្ជារបស់រាជរដ្ឋាភិបាល ចុះទប់ស្កាត់បទល្មើសធនធានធម្មជាតិ ក្នុងភូមិសាស្ត្រស្រុកវាលវែង និងស្រុកភ្នំក្រវាញខេត្តពោធិ៍សាត់ បាននិងកំពុងតែរុករុលទៅមុខជានិច្ច ធ្វើឲ្យជនអគតិ ដែលស្រេកឃ្លានដីធ្លីមិនចេះឆ្អែត រត់ចោលទីតាំងបណ្ដោះអាសន្ន ចាំឃ្លាំមើលសកម្មភាពរបស់សមត្ថកិច្ច ។
កម្លាំងស្រួចរបស់នាយឧត្តមសេនីយ៍ សៅ សុខា រួមជាមួយកម្លាំងគណៈបញ្ជាការឯកភាពរដ្ឋបាលខេត្តពោធិ៍សាត់ ដែលបែងចែកជា១០ក្រុម បានចុះប្រតិបត្តិការទាំង១០គោលដៅ យ៉ាងក្ដៅគគុកបំផុត ដោយបានរុះរើខ្ទម និងរោងអនាធិបតេយ្យចោល បំផ្លាញដំណាំ កម្ទេចវត្ថុតាងដែលពិបាកដឹកជញ្ជូន ឃាត់ខ្លួនមនុស្សមួយចំនួន និងឃ្លុំដីទុកជាសម្បត្តិរដ្ឋ។
តាមការស្រាវជ្រាវបានឲ្យដឹងថា អ្នកដែលកាប់ទន្ទ្រានរានដីព្រៃ និងកោរភ្នំនោះ ភាគច្រើនមកពីខេត្តផ្សេង ធ្វើជាកម្មករ និងជាអ្នកជួលដីគេជាដើម រីឯមេខ្លោងជាអ្នកមានលុយ និងជាអ្នកមានអំណាចមួយចំនួន មិនចេញមុខនោះទេ ។
ក្នុងកិច្ចប្រជុំអនុគណៈកម្មការទាំង១០ នៅសាលាស្រុកវាលវែង នារសៀលថ្ងៃទី១៧ ខែមីនា ឆ្នាំ២០២៤ លោក ខូយ រីដា ប្រធានគណៈបញ្ជាការឯកភាពខេត្ត បានចេញបទបញ្ជាយ៉ាងម៉ឺងម៉ាត់ ឲ្យអនុគណៈកម្មការទាំង១០ ស្វែងរកចាប់ខ្លួនជនខិលខូចបន្តទៀត។ មន្ត្រីជំនាញ សមត្ថកិច្ច និងអាជ្ញាធរមូលដ្ឋាន បើរកឃើញជាប់ពាក់ព័ន្ធ ឬនៅពីក្រោយខ្នងជនប្រព្រឹត្តបទល្មើស នឹងត្រូវចាត់វិធានការមុនគេ ដោយប្រើអភិក្រមទាំង៥ តែម្ដង។ ឧក្រិដ្ឋកម្មព្រៃឈើយ៉ាងធ្ងន់ធ្ងរបំផុត នៅក្នុងភូមិសាស្ត្រស្រុកវាលវែង និងស្រុកភ្នំក្រវាញនេះ បើខ្មោចក្នុងមិនឲ្យដៃ ក៍ខ្មោចក្រៅមិនហ៊ានដែរ។ ស្ថានភាពនេះ បើយើងមិនសុំគោលការពីរាជរដ្ឋាភិបាល ជួយអន្តរាគមន៍ទេ ទៅថ្ងៃមុខ មិនត្រឹមតែអស់ព្រៃឈើប៉ុណ្ណោះទេ គឺថែមទាំងប្រឈមមុខនឹងការបាចទឹកដាក់គ្នាទៀតផង ។
លោក ខូយ រីដា មានប្រសាសន៍កោតសរសើរដល់កម្លាំងទ័ពស្រួចទាំង១០ក្រុម ទោះបីផ្លូវលំបាកជិះម៉ូតូ ជិះគោយន្ត ឡើងភ្នំចុះភ្នំ កាត់ជ្រោះជ្រលងដងអូរ និងអាកាសធាតុក្ដៅយ៉ាងណាក៍ដោយ ក៍នៅតែទៅមុខជានិច្ចមិនរាថយឡើយ ។
លោកសូមឲ្យកងកម្លាំងបន្តបោសសំអាតឲ្យអស់ ហើយលោកនឹងគៀងគររកស្បៀងជួយទំនុកបំរុងជាបន្តបន្ទាប់ រហូតបេសកកម្មទទួលបានជោគជ័យ។ ចំណែកដី ដែលដកហូតបានពីជនខិលខូចទាំងប៉ុន្មាន នឹងឃ្លុំទុកជាសម្បត្តិរដ្ឋ និងដាំដើមឈើឡើងវិញ ។
លោក ចាយ សាមិត្ត រដ្ឋលេខាធិការក្រសួងបរិស្ថាន បានលើកឡើងថា ក្នុងគោលដៅពង្រឹងការអនុវត្តច្បាប់ និងការអនុវត្តគម្រោងឲ្យបានត្រឹមត្រូវ ចៀសវាងប៉ះពាល់ ខូចខាតដល់បរិស្ថាន នៅក្នុងតំបន់ការពារធនធានធម្មជាតិ ដែលអាចកើតមានឡើងជាយថាហេតុ ក្រសួងបរិស្ថាន សហការជាមួយស្ថាប័ន និងសមត្ថកិច្ចពាក់ព័ន្ធ ចុះត្រួតពិនិត្យ និងវាយតម្លៃ ការអនុវត្តគម្រោងអភិវឌ្ឍន៍ ក្នុងតំបន់ការពារធនធានធម្មជាតិ តាមគោលដៅដូចខាងក្រោម ៖
១.គម្រោងអភិវឌ្ឍទាំងឡាយណា ដែលបានទទួលកិច្ចសន្យានិងកំពុងដំណើរការ ម្ចាស់គម្រោងត្រូវអនុវត្តឲ្យបានត្រឹមត្រូវ តាមផែនការអភិវឌ្ឍនិងកិច្ចសន្យា។
២.គម្រោងអភិវឌ្ឍទាំងឡាយណា ដែលទទួលបានគោលការ និងចុះកិច្ចសន្យារួច តែពុំទាន់បានចាប់ផ្ដើមអនុវត្តទេ ម្ចាស់គម្រោងត្រូវរៀបចំផែនការអភិវឌ្ឍ និងត្រូវផ្ដើមអនុវត្តជាបន្ទាន់ ក្នុងរយៈពេលមិនលើសពី៦ខែ ចាប់ពីពេលនេះតទៅ ។
៣.ទាំងគម្រោងអភិវឌ្ឍដែលកំពុងដំណើរការអាជីវកម្ម ទាំងគម្រោងអភិវឌ្ឍដែលបានទទួលកិច្ចសន្យារួច ត្រូវអនុវត្តឲ្យបានត្រឹមត្រូវ តាមគោលការណ៍និងនីតិវិធីជាធរមាន បើពុំនោះទេត្រូវប្រឈមនឹងការដកហូតមកវិញ។
ក្រសួងបរិស្ថាន បាននិងកំពុងបន្តសហការ ជាមួយក្រសួង ស្ថាប័ន អង្គភាពពាក់ព័ន្ធ និងរដ្ឋបាលថ្នាក់ក្រោមជាតិ ក្នុងការចាត់វិធានការយ៉ាងម៉ឺងម៉ាត់ លើការទប់ស្កាត់ លុបបំបាត់ និងបង្ក្រាបនូវរាល់សកម្មភាពល្មើសច្បាប់នានា ដែលកើតមានឡើងក្នុងតំបន់ការពារធនធានធម្មជាតិ ដោយអនុលោមតាមបទបញ្ញាតិច្បាប់ និងលិខិតបទដ្ឋានគតិយុត្តជាធរមាន ៕
ចែករំលែកព័តមាននេះ