ការសម្រេចចិត្តថា តើត្រូវចាប់ផ្តើមអាជីវកម្មដោយប្រាក់ផ្ទាល់ខ្លួនរបស់អ្នក ឬជាមួយប្រាក់ កម្ចីពីធនាគារ គឺពាក់ព័ន្ធនឹងការថ្លឹងថ្លែងពីកត្តាជាច្រើន រួមទាំងស្ថានភាពហិរញ្ញវត្ថុរបស់អ្នកការរិះគិតចំពោះហានិភ័យផែនការអាជីវកម្ម និងគោលបំណងនៃការលូតលាស់ អាជីវកម្មនៅក្នុងក្តីស្រមៃរបស់អ្នក ។
ជម្រើសទាំងពីរមានគុណសម្បត្តិ និងគុណវិបត្តិរបស់វា ។ ដូច្នេះហើយវាចាំបាច់ដែលអ្នក ត្រូវតែពិចារណាដោយប្រុងប្រយ័ត្ននូវកាលៈទេសៈ និងបញ្ហាព្រមទាំងស្ថានភាពរបស់អ្នក មុនពេលធ្វើការសម្រេចចិត្ត ។
ខាងក្រោមនេះ គឺជាការវិភាគនៃការពិចារណាសំខាន់ៗដែលកម្មវិធីលុយនៃសារព័ត៌មានកោះសន្តិភាពបានស្រាវជ្រាវសម្រាប់ជាជម្រើសនៅក្នុងការសម្រេចចិត្តរបស់អ្នកៈ
I.ការចាប់ផ្តើមជាមួយលុយផ្ទាល់ខ្លួនរបស់អ្នក
ក. គុណសម្បត្តិ
១.ការគ្រប់គ្រងពេញលេញ ការប្រើប្រាស់មូលនិធិផ្ទាល់ខ្លួនរបស់អ្នកផ្តល់ឱ្យអ្នកនូវសិទ្ធិនៃការគ្រប់គ្រងដោយពេញលេញ លើអាជីវកម្មដោយមិនចាំបាច់ឆ្លើយទៅកាន់ម្ចាស់បំណុល ឫអ្នកពាក់ព័ន្ធផ្សេងៗ ។
២.គ្មានបំណុល
អ្នកនឹងមិនមានបន្ទុកលើការសងប្រាក់កម្ចី ឬការទូទាត់ការប្រាក់ដែលអនុញ្ញាតឱ្យអ្នកវិនិយោគប្រាក់ចំណេញមកវិញក្នុងអាជីវកម្ម ។
៣.កាត់បន្ថយហានិភ័យ
ដោយសារអ្នកមិនខ្ចីលុយគេ វាគ្មានហានិភ័យនៃការខកខានក្នុងការទូទាត់ប្រាក់កម្ចី ឬបាត់បង់វត្ថុបញ្ចាំឡើយ ។
ខ.គុណវិបត្តិ
១.ធនធានមានកំណត់
ការសន្សំប្រាក់ផ្ទាល់ខ្លួនរបស់អ្នកអាចផ្តល់តែចំនួនដើមទុនដែលមានកំណត់ ដូច្នេះវាអាចប៉ះពាល់ដល់ការកំណត់នូវវិសាលភាពនៃអាជីវកម្មរបស់អ្នក ។
២.អាចបាត់បង់ឱកាសដោយសារទុនមិនគ្រប់គ្រាន់ ការវិនិយោគដោយប្រាក់ផ្ទាល់ខ្លួនរបស់អ្នក មានន័យថា អ្នកអាចបោះបង់ចោលនូវផលចំណេញពីការវិនិយោគ ឬប្រាក់សន្សំផ្សេងទៀត ។
៣.កង្វះអានុភាព
បើគ្មានហិរញ្ញប្បទានពីខាងក្រៅទេអ្នកអាចនឹងបាត់បង់ឱកាស ដើម្បីពន្លឿនកំណើន ឬពង្រីកប្រតិបត្តិការ ។
II.ការចាប់ផ្តើមជាមួយកម្ចីធនាគារ
ក.គុណសម្បត្តិ
១.លទ្ធភាពទទួលបានដើមទុន
កម្ចីធនាគារផ្តល់លទ្ធភាពទទួលបានដើមទុនបន្ថែមភ្លាមៗ ដែលអនុញ្ញាតឱ្យអ្នកស្វែងរក ឱកាសអាជីវកម្មធំ ឬប្រតិបត្តិការដែលមានទំហំកាន់តែលឿន និងធំទូលាយ។
២.ការសន្សំទុកនូវទុនបម្រុង
ការប្រើប្រាស់មូលនិធិដែលបានមកពីប្រាក់កម្ចី គឺអាចឲ្យអ្នករក្សាការសន្សំផ្ទាល់ខ្លួនរបស់អ្នកសម្រាប់គ្រាអាសន្ន ឬពេលដែលអ្នកជួបឱកាសវិនិយោគផ្សេងៗទៀត។
៣.បង្កើតឥណទាន
ការសងប្រាក់កម្ចីធនាគារទាន់ពេលវេលាអាចជួយបង្កើត ឬកែលម្អទម្រង់ឥណទាន អាជីវកម្មរបស់អ្នក ដែលធ្វើឱ្យវាកាន់តែងាយស្រួលក្នុងការទទួលបានហិរញ្ញប្បទាននាពេលអនាគត ។
ខ.គុណវិបត្តិ
១.កាតព្វកិច្ចបំណុល
ការខ្ចីប្រាក់ពីធនាគារមានន័យថា ការប្តេជ្ញាចិត្តក្នុងការសងប្រាក់ទៀងទាត់ រួមទាំងការប្រាក់ ដែលអាចធ្វើឱ្យលំហូរសាច់ប្រាក់របស់អ្នកមានភាពតានតឹង ជាពិសេសក្នុងដំណាក់កាល ដំបូងនៃអាជីវកម្ម ។
២.ហានិភ័យនៃការខកខានការសង់ប្រាក់
ប្រសិនបើអាជីវកម្មបរាជ័យក្នុងការបង្កើតប្រាក់ចំណូលគ្រប់គ្រាន់ ដើម្បីសងប្រាក់កម្ចីនោះ អ្នកអាចប្រថុយនឹងការខកខានដែលនាំឱ្យមានការរឹបអូសទ្រព្យសម្បត្តិ ឬខូចខាតដល់ពិន្ទុ ឥណទានរបស់អ្នក ។
៣.ការចំណាយលើការប្រាក់
ការបង់រំលោះថ្លៃដើមនៃការខ្ចីប្រាក់រួមមានការទូទាត់ការប្រាក់ ដែលអាចបង្កើនការចំណាយសរុបនៃការបើកដំណើរការ និងប្រតិបត្តិការអាជីវកម្ម ។
ជាចុងក្រោយ ការសម្រេចថា អ្នកគួរចាប់ផ្តើមអាជីវកម្មដោយប្រាក់កម្ចី ឬក៏ប្រាក់សន្សំផ្ទាល់ខ្លួន ជាការសម្រេចចិត្តដែលគួរជម្រើសដ៏ល្អបំផុត គឺអាស្រ័យទៅលើកាលៈទេសៈជាក់លាក់របស់អ្នកការអត់ធ្មត់ចំពោះហានិភ័យ និងគោលដៅដែលអ្នកចង់បាន ។ ប្រសិនបើអ្នកមានប្រាក់សន្សំផ្ទាល់ខ្លួនគ្រប់គ្រាន់ ហើយចង់រក្សាការគ្រប់គ្រងពេញលេញលើអាជីវកម្មរបស់អ្នកការប្រើលុយផ្ទាល់ខ្លួនរបស់អ្នកអាចជាជម្រើសដែលល្អប្រសើរមួយ ។
តែទោះជាយ៉ាងណាក៏ដោយ ប្រសិនបើអ្នកត្រូវការដើមទុនបន្ថែម ដើម្បីគាំទ្រមូលនិធិដល់ គំនិតផ្តួចផ្តើមឆ្ពោះទៅរកកំណើន ឬមានស្ថានភាពដែលអាចទូទាត់ឬដោះស្រាយបញ្ហា ជំពាក់បំណុល កម្ចីធនាគារអាចផ្តល់ធនធានហិរញ្ញវត្ថុចាំបាច់ ដើម្បីសម្រេចបាននូវគោល បំណងអាជីវកម្មរបស់អ្នក ។
ម្យ៉ាងវិញទៀត ប្រសិនបើអ្នកពិបាកនៅក្នុងការសម្រេចចិត្ត អ្នកក៏គួរតែពិគ្រោះជាមួយអ្នកប្រឹក្សាហិរញ្ញវត្ថុ ឬអ្នកណែនាំអាជីវកម្ម ដើម្បីវាយតម្លៃលទ្ធភាពជោគជ័យ និងផលប៉ះពាល់នៃជម្រើសនីមួយៗ មុនពេលធ្វើការសម្រេចចិត្ត ៕ ដោយៈ ហេង ចេស្តារ
ចែករំលែកព័តមាននេះ