ទីក្រុងអ៊ីស្តាន់ប៊ុល៖ មានហេតុការណ៍លិចទូកដឹកអ្នកចំណាកស្រុកនៅលើផ្ទៃសមុទ្រប្រទេសតួកគី បណ្ដាលឱ្យស្លាប់មនុស្សយ៉ាងតិច២១នាក់។ នៅក្នុងចំណោមនោះក៏មានកុមារចំនួន៥នាក់ផងដែរ។ រហូតមកដល់ពេលនេះ គេមិនទាន់ដឹងអត្តសញ្ញាណជនរងគ្រោះទាំងនោះទេ។ អាជ្ញាធរប្រាប់ថាមនុស្សពីរនាក់ត្រូវគេជួយសង្គ្រោះទាន់ពេលវេលា។ ពីរនាក់ទៀតអាចហែលទៅដល់មាត់ច្រាំងដោយខ្លួនឯង។
សាក្សីនិយាយថាទូកមួយគ្រឿងនោះកំពុងបើកបរនៅលើផ្ទៃសមុទ្រសុខៗស្រាប់តែលិចភ្លឹបទៅក្នុងទឹកតែម្ដងនៅពេលជិតដល់កោះដ៏ធំជាងគេរបស់ប្រទេសតួកគីដែលស្ថិតនៅមិនឆ្ងាយប៉ុន្មានពីសមុទ្រអេហ្គែន (Aegean Sea)។ រដ្ឋបាលថ្នាក់មូលដ្ឋានតួកគីចេញសេចក្ដីប្រកាសថាកងសន្តិសុខជាតិប្រមូលបានសាកសពជនរងគ្រោះសរុប២១នាក់រួមទាំងកុមារ៥នាក់។
គេបានប្រើប្រាស់យន្តហោះមួយគ្រឿង, ឧទ្ធម្ភាគក្រពីរគ្រឿង, ដ្រូនមួយគ្រឿង, ទូក១៨គ្រឿង និងក្រុមអ្នកជួយសង្គ្រោះជាង៥រយនាក់ដើម្បីជួយស្វែងរកអ្នកបាត់ខ្លួន។ សព្វថ្ងៃនេះ ប្រទេសតួកគីទទួលឱ្យស្នាក់នៅនូវជនភៀសខ្លួនជិត៤លាននាក់។ ភាគច្រើននៃអ្នកទាំងនោះភៀសខ្លួនពីប្រទេសស៊ីរីជំនាន់បដិវត្តផ្កាម្លិះនៅមជ្ឈិមបូព៌ា។ អ្នកចំណាកស្រុកខ្លះព្យាយាមជិះទូកចេញពីប្រទេសតួកគីសំដៅទៅប្រទេសក្រិចដើម្បីឆ្លងទៅរស់នៅសហភាពអឺរ៉ុប។
អ្នកខ្លះគ្មានវាសនាបានទៅដល់គោលដៅចុងក្រោយរបស់ពួកគេទេ។ ពួកគេត្រូវលង់ទឹកស្លាប់កណ្ដាលសមុទ្រដោយសារការលិចទូក។ អាជ្ញាធរមូលដ្ឋានប្រាប់ថាទូកដែលលិចនោះគឺលិចបន្តិចម្ដងៗនៅពេលយប់ងងឹត។ នៅព្រឹកថ្ងៃសុក្រ គេឃើញរថយន្តគិលានសង្គ្រោះ (ឡានពេទ្យ) ដាក់តម្រៀបគ្នាចាំទទួលសាកសព។
ប៉ុន្មានអាទិត្យចុងក្រោយនេះ សកម្មភាពជិះទូកចំណាកស្រុកពីតួកគីទៅក្រិចហាក់ដូចជាគគ្រឹកគគ្រេងសម្បើមណាស់។ ឆ្មាំសមុទ្រតួកគីថ្លែងថាខ្លួនជួយសង្គ្រោះ ឬស្ទាក់ចាប់ទូកដែលដឹកមនុស្សរាប់រយនាក់ មានក្មេង មានចាស់។
ប៉ុន្មានឆ្នាំចុងក្រោយនេះ សមុទ្រមែឌីទែរ៉ាណេជាទីតាំងដែលអ្នកចំណាកស្រុកសម្រុកធ្វើដំណើរពីទ្វីបអាហ្វ្រិក និងមជ្ឈិមបូព៌ាឆ្ពោះទៅទ្វីបអឺរ៉ុប។ ប៉ុន្តែដំណាក់កាលដែលអ្នកចំណាកស្រុកស្លាប់ច្រើនជាងគេគឺឆ្នាំ២០១៥។ កាលនោះ មនុស្សសម្រុកចាកចេញពីប្រទេសស៊ីរីដើម្បីគេចេញពីសង្គ្រាមស៊ីវិល។ ឆ្នាំ២០១៦ សហភាពអឺរ៉ុបបានចរចាគ្នាជាមួយតួកគីដើម្បីឱ្យតួកគីជួយទប់ស្កាត់អ្នកចំណាកស្រុក។ ជាថ្នូរត្រឡប់មកវិញ អឺរ៉ុបផ្ដល់លុយកាក់ និងអត្ថប្រយោជន៍ដទៃទៀតទៅឱ្យតួកគី។
តួកគី និងក្រិចមិនសូវត្រូវធាតុគ្នាប៉ុន្មានទេ។ ដូច្នេះ បញ្ហាអ្នកចំណាកស្រុកឆ្លងពីតួកគីទៅក្រិចជាបញ្ហាធ្វើឱ្យមើលមុខគ្នាមិនចំ។ ក្រិចចោទប្រកាន់ថាតួកគីបណ្ដោយឱ្យអ្នកចំណាកស្រុកឆ្លងដែនតាមចិត្ត។ ចំណែកតួកគីចោទថាក្រិចលេងក្រឡាខូច។ អ្នកចំណាកស្រុកដែលឆ្លងទៅដល់ក្រិចហើយ ក្រិចមិនទទួលយកទេ បែរជាបណ្ដេញពួកគេឱ្យជិះទូកត្រឡប់ក្រោយវិញ។
ប៉ុន្តែនៅទីបំផុត ប្រទេសទាំងពីរស្រុះស្រួលគ្នាកាលពីខែធ្នូ ឆ្នាំ២០២៣ដើម្បីបើកទំព័រសករាជថ្មីនៃទំនាក់ទំនង និងរួមគ្នាដោះស្រាយបាតុភាពមិនប្រក្រតីនៃអ្នកចំណាកស្រុក។ គេគិតថាបញ្ហានេះក៏ជាប្រធានបទក្ដៅផងដែរដែលត្រូវជជែកគ្នានៅពេលនាយករដ្ឋមន្ត្រីក្រិចទៅបំពេញទស្សនកិច្ចនៅរដ្ឋធានីអង់ការ៉ា (Ankara) ប្រទេសតួកគីនាខែឧសភាខាងមុខនេះ៕
ប្រភព៖ South China Morning Post
https://www.scmp.com/news/world/europe/article/3255600/5-children-among-21-migrants-killed-after-boat-capsizes-turkeys-aegean-coast
ចែករំលែកព័តមាននេះ