រាជធានីភ្នំពេញ ៖ ថ្លែងជាសាធារណៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានចំអកទៅកាន់វិទ្យុមួយនៅក្រៅប្រទេស ប្រើសម្ដីមន្ត្រីជាន់ខ្ពស់ក្រសួងសេដ្ឋកិច្ច…
រាជធានីភ្នំពេញ ៖ ថ្លែងជាសាធារណៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានចំអកទៅកាន់វិទ្យុមួយនៅក្រៅប្រទេស ប្រើសម្ដីមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ពាក់ព័ន្ធនឹងគម្រោងព្រែកជីក ហ្វូណន-តេជោ គឺជាគម្រោង អត់បានការ គឺមិនមានវិជ្ជាជីវៈ នោះទេ ។
ក្នុងឱកាសអញ្ជើញត្រួតពិនិត្យ វឌ្ឍនភាព នៃការសាងសង់អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី១២ ខែមីនា ឆ្នាំ២០២៤ សម្ដេចធិបតី បានថ្លែងថា មន្ត្រីរបស់រាជរដ្ឋាភិបាល បានយល់ច្បាស់ពីការអភិវឌ្ឍគម្រោងព្រែកជីក ហ្វូណន-តេជោ ដែលនឹងផ្តល់ផលប្រយោជន៍ដល់សេដ្ឋកិច្ចជាតិ ។
សម្តេចធិបតី នាយកដ្ឋមន្ត្រី បានបញ្ជាក់យ៉ាងដូច្នេះថា ៖ «គម្រោងព្រែកជីក ហ្វូណន-តេជោ មិនមែនខ្ចីប្រាក់ពីបរទេស មកធ្វើការអភិវឌ្ឍនោះទេ គឺធ្វើឡើងតាមរយៈ BOT (គឺក្រុមហ៊ុនខ្ចីលុយយកមកវិនិយោគ ដើម្បីកសាង ហើយរដ្ឋាភិបាលឱ្យសិទ្ធិក្នុងការធ្វើអាជីវកម្ម) ហើយ សម្តេចក៏មិនជឿថា មន្ត្រីរាជរដ្ឋាភិបាល មិនល្ងង់ដល់ថ្នាក់មិនស្គាល់ពាក្យ BOT នោះទេ» ។
ជាមួយគ្នានោះដែរ សម្តេចធិបតី ហ៊ុន ម៉ាណែត បានថ្លែងបន្ថែមថា រាជរដ្ឋាភិបាលមានចក្ខុវិស័យខ្ពស់ ក្នុងគម្រោងអភិវឌ្ឍន៍នានា ទាំងផ្លូវអាកាស ផ្លូវទឹក និងផ្លូវគោក ដើម្បីជំរុញកំណើនសេដ្ឋកិច្ច និងបម្រើផលប្រយោជន៍ប្រជាពលរដ្ឋ ។
សម្ដេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះទៀតថា ៖ «មានអ្នកខ្លះ ១ថ្ងៃៗ វ៉ៃតែព្រែកជីកហ្វូណន ថាព្រែកជីកហ្វូណន ធ្វើឥតប្រយោជន៍ ធ្វើបានតែផ្ទះលើទឹក ទូករកត្រី បានតូចតាច។ ខ្ញុំសូមបញ្ជាក់ថា មានវិទ្យុមួយនោះ ឧស្សាហ៍និយាយមន្ដ្រីជាន់ខ្ពស់ក្រសួង សេដ្ឋកិច្ច និងហិរញ្ញវត្ថុ បាននិយាយថា គម្រោងព្រែកជីកហ្វូណន គឺជាគម្រោងអត់បានការ ហើយគ្មានបានផលប្រយោជន៍ខ្មែរបន្ដិចសោះ។ ហើយទី១ កុំទៅលាបពណ៌ មន្ដ្រីជាន់ខ្ពស់កម្ពុជា ហើយទី២ បើមន្ដ្រីជាន់ខ្ពស់នៅក្រសួងសេដ្ឋកិច្ច និយាយបែបហ្នឹង ខ្ញុំមិនជឿនោះទេ មិនជឿមានមន្ដ្រីកម្ពុជាណា ដែលមិនយល់ហេតុផលថា កម្ពុជាយកព្រែកជីកហ្វូណន ជាកន្លែងជំពាក់លុយគេ វ័ណ្ឌក យកលុយគេមកធ្វើអត់ប្រយោជន៍ ឱ្យខ្មែរ ខ្ញុំថា បើមន្ដ្រីក្រសួងសេដ្ឋកិច្ច និងហិរញ្ញវត្ថុ ពិតប្រាដក គេមិនល្ងង់ដល់ថ្នាក់ហ្នឹងទេ» ។
សម្ដេចធិបតី បន្ដថា គម្រោងព្រែកជីក ហ្វូណន-តេជោ មានសមត្ថភាពដឹកជញ្ជូន រហូតដល់ទៅ ៣ពាន់តោន។ ព្រែកជីកហ្វូណន នឹងផ្តល់ផលប្រយោជន៍ដល់ពលរដ្ឋកម្ពុជា ខណៈដែលរាជរដ្ឋាភិបាលបានខិតខំប្រឹងប្រែងប្រព័ន្ធដឹកជញ្ជូនទាំងផ្លូវទឹក ផ្លូវគោក និងផ្លូវអាកាស ។
ជាមួយគ្នានោះដែរ សម្ដេចធិបតី បានអះអាងថា ព្រែកជីកហ្វូណន ជួយកាត់បន្ថយ ថ្លៃដឹកជញ្ជូន។ សម្ដេច ថា ៖ «ព្រែកជីហ្វូណន គឺជាប្រព័ន្ធចរាចរណ៍ផ្លូវទឹក ពីទឹកសាប ទៅទឹកប្រៃ» ។
សូមបញ្ជាក់ថា គម្រោង «ព្រែកជីក ហ្វូណន-តេជោ» មានប្រវែង១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចចូលតាមព្រែ កតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ៖ ខេត្តកណ្តាល ខេត្តតាកែវ ខេត្តកំពត និងខេត្តកែប។ ផ្លូវទឹកនេះ នឹងមានទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹកប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ ចំនួន ២គន្លង អាចចេញ-ចូល និងជៀសគ្នាបាន ដោយសុវត្ថិភាព។ ការសាងសង់គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារ និងរយៈពេលសាងសង់ប្រមាណ ៤ឆ្នាំ ៕
ចែករំលែកព័តមាននេះ