រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចាត់ទុកព្រលានយន្តហោះថ្មី គឺជានិមិត្តរូប នៃការរីកចម្រើនរបស់កម្ពុជា ខណៈប្រទេសមួយចំនួន…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចាត់ទុកព្រលានយន្តហោះថ្មី គឺជានិមិត្តរូប នៃការរីកចម្រើនរបស់កម្ពុជា ខណៈប្រទេសមួយចំនួន ចាត់ទុកកម្ពុជា ជាប្រទេស ដែលមានស្ថិរភាព និងសន្តិភាពរាប់សិបឆ្នាំ តទៅទៀត ។
ការគូសបញ្ជាក់របស់សម្ដេចធិបតី នាយករដ្ឋមន្ដ្រី បែបនេះ ក្នុងឱកាសអញ្ជើញចុះត្រួតពិនិត្យការសាងសង់ព្រលានយន្តហោះ អន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹងខេត្តកណ្តាល ព្រឹកថ្ងៃទី១២ ខែមីនា ឆ្នាំ២០២៤ ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា ព្រលានយន្តហោះថ្មី ដែលកំពុងសាងសង់ គឺជានិមិត្តរូប នៃការរីកចម្រើនរបស់ប្រទេសកម្ពុជា ដែលទីកន្លែងមួយ ហើយវាជានិមិត្តរូប នៃការប្រែក្លាយពីប្រទេស ដែលធ្លាប់មានសង្គ្រាម ទៅជាប្រទេស ដែលមានសុខសន្តិភាព ។
សម្ដេចធិបតី អះអាងថា តែប្រសិនបើ មិនមានសន្តិភាពទេនោះ ក៏យើងមិនចាំបាច់កសាងព្រលានយន្តហោះតម្លៃ ១,៥០០លានដុល្លារអាម៉េរិកនោះទេ សូម្បីតែក្រុមហ៊ុន ក៏គេមិនហ៊ានទាំងដាក់ទុនផង កុំថាឡើយអ្នកនិវិយោគ ទិញបតនោះ គេទុកលុយនៅតៃវ៉ាន់ នៅចិន នៅកូរ៉េ នៅអង់គ្លេស ចៀសជាងយកមកដាក់វិនិយោគនៅទីនេះ តែផ្ទុយទៅវិញ គេហ៊ានយកមកវិនិយោគហេដ្ឋារចនាសម្ព័ន្ធមួយ ដោយការគិតវែងឆ្ងាយទៅអនាគត ថាកម្ពុជាជាប្រទេសមួយ ដែលមានស្ថិរភាព និងសន្តិភាពរាប់សិបឆ្នាំតទៅទៀត បានជាគេហ៊ានវិនិយោគបែបនេះ ដែលនេះ គឺជានិមិត្តរូបមួយធំណាស់ ។
សម្ដេចធិបតី ហ៊ុន ម៉ាណែត បានថ្លែងថា ព្រលានយន្តហោះអន្តរជាតិតេជោនេះ គឺជាព្រលានយន្តហោះ ដ៏ទំនើបលើកដំបូង នៅកម្ពុជា ហើយក៏ជាសមិទ្ធផលជាប្រវត្តិសាស្ត្រថ្មី សម្រាប់កម្ពុជាផងដែរ ។
សម្តេចធិបតី បានថ្លែងបញ្ជាក់ថា នៅទីនេះក៏មានដែរនូវគ្រាប់មីន និងគ្រប់មិនទាន់ផ្ទុះ តែយើងបានធ្វើការបោសសម្អាតអស់ហើយដើម្បីប្រែក្លាយទីនេះឱ្យទៅជាព្រលានយន្តហោះថ្មី និងទំនើបដោយអាចទទួលការចុះចតពីយន្តហោះគ្រប់ប្រភេទ គ្រប់ទំហំ បានទាំងអស់ ជាកន្លែង ដែលមានចលនាជីវិតរស់រវើក ជាកន្លែងសម្រាប់ទទួលអ្នកដំណើរច្រើនលាននាក់នាពេលអនាគត ។
សម្តេចធិបតី បានបញ្ជាក់ឱ្យដឹងថា នៅទីនេះក៏ជាការបង្ហាញឱ្យឃើញនូវកំណើនសេដ្ឋកិច្ច តាមរយៈការដឹកមនុស្សឆ្លងកាត់ទីនេះ ផ្ទុយពីពេលមុន ដែលយើងប្រើប្រាស់ព្រលានយន្តហោះ សម្រាប់ដឹកមនុស្សរត់គេចចេញពីសង្គ្រាមនោះ ។
សូមរម្លឹកផងដែរថា ការសាងសង់ព្រលានយន្តហោះអន្តរជាតិ តេជោ នេះឡើងនៅលើផ្ទៃដីទំហំប្រមាណ ២,៦០០ហិកតា ស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅក្នុងស្រុកបាទី ខេត្តតាកែវ។ ព្រលានយន្ដហោះថ្មីនេះ គឺជាគម្រោងដ៏ធំដែលមានទំហំ នៃការវិនិយោគប្រមាណ ១,៥០០លានដុល្លារអាម៉េរិក ជាព្រលានយន្តហោះប្រភេទ 4F ដែលអាចឱ្យប្រភេទយន្តហោះគ្រប់ធុនចុះចតបាន ៕
ចែករំលែកព័តមាននេះ