រាជធានីភ្នំពេញ ៖ តារាចម្រៀងលោក ណុប បាយ៉ារិទ្ធ បានបើកបង្ហាញនូវតារាសម្តែងពីរដួងដែលលោកតែងតែចូលចិត្តទស្សនា និងស្ងើចសរសើរពីទេពកោសល្យនៃសម្តែងភាពយន្តដ៏ល្អ ។ តារាសម្តែងទាំងពីរនោះ គឺអ្នកនាងស្វែង…
រាជធានីភ្នំពេញ ៖ តារាចម្រៀងលោក ណុប បាយ៉ារិទ្ធ បានបើកបង្ហាញនូវតារាសម្តែងពីរដួងដែលលោកតែងតែចូលចិត្តទស្សនា និងស្ងើចសរសើរពីទេពកោសល្យនៃសម្តែងភាពយន្តដ៏ល្អ ។ តារាសម្តែងទាំងពីរនោះ គឺអ្នកនាងស្វែង សុជាតា និងអ្នកនាងសាំង ភ័ស្តា ខណៈពេលដែលតារាចម្រៀងរូបនេះក៏បង្ហាញគោលបំណងចង់ឃើញតារាទាំងពីរបានសម្តែងរួមគ្នានៅក្នុងពេលណាមួយ ។
តារាចម្រៀងលោក ណុប បាយ៉ារិទ្ធ បានលើកឡើងថា ថ្ងៃនេះ ខ្ញុំសូមបង្ហាញពីតារាសម្តែងស្រី២រូបដែលខ្ញុំស្រលាញ់ចូលចិត្តស្ងើចសរសើរពីស្នាដៃទេពកោសល្យសម្តែងរបស់ពួកគាត់ខ្លាំងមែនទែន ។
លោកបញ្ជាក់ថា ទី១-អ្នកនាងស្វែង សុជាតា ខ្ញុំធ្លាប់សម្តែងរឿងជាមួយគាត់រឿង «ភូមិគ្រឹះចម្លែក» ចាប់តាំងពីរឿងទី១មកដល់ពេលនេះ គឺខ្ញុំនៅតែតាមដានរឿងដែលគាត់សម្តែងគ្រប់រឿង ហើយគាំទ្រសមត្ថភាពគាត់ក្នុងនាមជាអ្នកគាំទ្រម្នាក់ ខ្ញុំចង់និយាយថា រាល់ការសម្តែងរបស់គាត់ គឺសឹងតែថា មើលទៅជាជីវិតពិត មិនមែនជាការសម្តែង មិនថា ជាតួអង្គចរិតលក្ខណៈបែបណា កាច ឆ្នាស់ ឆ្នើម ម៉ឺងម៉ាត់ មាយារដកខ្ញី ឬសាហាវ ស្លូត កំសត់ គឺគាត់ធ្វើបានល្អបំផុតលេងដល់កម្រឹតសឹងតែគ្មានកន្លែងទាស់ ខ្ញុំពិតជាសរសើរសមត្ថភាពរបស់គាត់ខ្លាំងណាស់ ហើយខ្ញុំនៅតែបន្តរតាមដានទស្សនារាល់សមិទ្ធផលការងារសម្តែងថ្មីៗរបស់គាត់បន្តរទៀត ។
លោកបន្តថា ទី២-ប្អូនស្រីសាំង ភ័ស្តា ខ្ញុំធ្លាប់ស្តែងMVបទ «កែចិត្ត» របស់ផលិតកម្មហង្សមាសជាមួយគាត់លើកទី១ កាលនោះគាត់បានធ្វើអោយខ្ញុំចាប់អារម្មណ៍ពីទេពកោសល្យរបស់គាត់ខ្លាំងណាស់ ក្រោយពីដឹងថា គាត់គឺជានាថការិនីរបាំបុរាណទៀត គឺខ្ញុំរឹតតែភ្ញាក់ផ្អើល ម្យ៉ាងទៀតឪពុករបស់គាត់ លោកគ្រូសូត្រគឺជាសិល្បករផ្នែកតន្ត្រីបូរាណខ្លុយ ប៉ី ដែលតែងតែចូលរួមប្រគុំថតជាសំឡេងតន្ត្រីក្នុងបទចម្រៀងប្រជាប្រិយ ចង្វាក់ប្រពៃណីខ្មែរ ក្នុងបទចម្រៀងផលិតកម្មហង្សមាសកន្លងមក ។ ក្រោយមកទៀតខ្ញុំបានទស្សនាការសម្តែងរបស់គាត់នៅរឿងខ្មោចដើមចេកជ្វា និងរឿងបន្តរបន្ទាប់រហូតដល់បច្ចុប្បន្ន សមត្ថភាពសម្តែងរបស់គាត់រឹតតែរីកចម្រើន រឹតតែល្អជាងមុនខ្លាំង។
លោកថា ខ្ញុំពិតជាស្ងើចសរសើរទេពកោសល្យរបស់គាត់ណាស់ គាត់សម្តែងមានលក្ខណៈធម្មជាតិល្អសម្តែងដល់ស័ក្តិសមហើយមើលទៅអត់ប្រឹងសោះ សមនិងពាក្យដែលគាត់ប្រាប់ខ្ញុំថា៖ «ពិតដូចសម្តែង សម្តែងដូចពិត» ជាការសម្តែងមែនតែមើលទៅដូចជីវិតពិត ហាក់ដូចមិនមែនជាសម្តែងសោះ បើទោះជាបច្ចុប្បន្នគាត់សម្តែងជាតួរបងស្រីតួម្តាយ តែសមត្ថភាពគាត់គឺពិបាកនិងមានអ្នកណាប្រគួតប្រជែងបន្តិចហើយ ។
យ៉ាងណា បើតាមលោក ណុប បាយ៉ារិទ្ធ បំណងខ្ញុំគឺចង់ឃើញតារាស្រីទាំង២រូបបានសម្តែងជាមួយគ្នានៅក្នុងរឿងណា១ បើក្លាយជាការពិតមែន ហើយសាច់រឿងល្អទៀត ខ្ញុំជឿជាក់ថា រឿងនោះនិងទទួលបានជោគជ័យ ហើយខ្ញុំនេះហើយជាអ្នកគាំទ្រម្នាក់ គាំទ្រខ្លាំងនិងមានមោទនភាពចំពោះអ្នកទាំង២ ។
សង្ឃឹមថា មានឃើញអ្នកទាំង២សម្តែងជាមួយគ្នា ចុងក្រោយចង់ប្រាប់ថា ខ្ញុំស្រលាញ់ ចូលចិត្ត គាំទ្រ និង ស្ញប់ស្ញែងសមត្ថភាពអ្នកទាំង២ខ្លាំងណាស់ ។ ជូនពរអ្នកទាំង២អោយទទួលបានជោគជ័យក្នុងវិស័យសិល្បៈអោយកាន់តែខ្លាំង និងមានសមិទ្ធិផលថ្មីជាបន្តបន្ទាប់ ។
ចែករំលែកព័តមាននេះ