ខេត្តកំពង់ឆ្នាំង ៖ បុរសជាកម្មករសំណង់ផែផ្សារក្រោមម្នាក់បានជិះម៉ូតូដួលខ្លួនឯងបណ្តាលឱ្យរងរបួសយ៉ាងធ្ងន់ធ្ងរ ហើយក៏បានស្លាប់បាត់បង់ជីវិតខណៈដឹកចេញពីមន្ទីរពេទ្យខេត្ត ទៅកាន់មន្ទីរពេទ្យឯរាជធានីភ្នំពេញដើម្បីសង្គ្រោះ។ ហេតុការណ៍នេះបានកើតឡើងនៅវេលាម៉ោង១០និង១០នាទីយប់ ថ្ងៃទី២៩ ឧសភា នៅចំណុចភូមិទួលក្រឡាញ់
ខេត្តកំពង់ឆ្នាំង ៖ បុរសជាកម្មករសំណង់ផែផ្សារក្រោមម្នាក់បានជិះម៉ូតូដួលខ្លួនឯងបណ្តាលឱ្យរងរបួសយ៉ាងធ្ងន់ធ្ងរ ហើយក៏បានស្លាប់បាត់បង់ជីវិតខណៈដឹកចេញពីមន្ទីរពេទ្យខេត្ត ទៅកាន់មន្ទីរពេទ្យឯរាជធានីភ្នំពេញដើម្បីសង្គ្រោះ។ ហេតុការណ៍នេះបានកើតឡើងនៅវេលាម៉ោង១០និង១០នាទីយប់ ថ្ងៃទី២៩ ឧសភា នៅចំណុចភូមិទួលក្រឡាញ់ សង្កាត់កំពង់ឆ្នាំង។
តាមរបាយការណ៍ប៉ូលិសក្រុងកំពង់ឆ្នាំងឱ្យដឹងថា ជនរងគ្រោះឈ្មោះហោ គីមហ័ន អាយុ៣៥ឆ្នាំ រស់នៅភូមិផ្សារឆ្នាំង។ នៅយប់ថ្ងៃកើតហេតុបុរសរូបនោះស្រវឹងចេញពីហាងខារ៉ាអូខេ៩៨ បានជិះម៉ូតូម៉ាកសង់កូរ៉េពណ៌ក្រហម ពាក់ស្លាកលេខ ក-៦២៧៧ កឆ១ ស្របថ្នល់ជាតិលើផ្លូវក្រាលក្រួសក្រហម។ លុះដល់ចំណុចកើតហេតុពេលបត់ម៉ូតូឡើងថ្នល់ជាតិក៏ដួលបោកក្បាលនៅលើថ្នល់បណ្តាលឱ្យរបួសធ្ងន់ ហើយត្រូវបានគេដឹកយកទៅសង្គ្រោះនៅមន្ទីរពេទ្យ ខេត្ត ប៉ុន្តែដោយសាររបួសធ្ងន់ពេកក៏ដឹកទៅភ្នំពេញ តែបានស្លាប់តាមផ្លូវ ទើបដឹកសពមកដាក់នៅវត្តយាយទេព ដើម្បីធ្វើបុណ្យតាមប្រពៃណី។
ដោយឡែកនៅវេលាម៉ោង១២និង១៥នាទីថ្ងៃត្រង់ ថ្ងៃទី៣០ ឧសភា មានរថយន្តម៉ាកឡិចស៊ីសពណ៌ស្ករមួយគ្រឿង ពាក់ស្លាកលេខភ្នំពេញ 8992 បានបើកកៀរកុមារាឈ្មោះនឿន លីហួ អាយុ៦ឆ្នាំ បណ្តាលឱ្យរងរបួសចង្កាត្រូវពេទ្យដេរអស់៦ថ្នេរ។
មន្ត្រីប៉ូលិសនិយាយថា រថយន្តឡិចស៊ីសធ្វើដំណើរពីទិសខាងត្បូងទៅទិសខាងជើង លុះដល់ចំណុចកើតហេតុក្មេងប្រុសរងគ្រោះបានរត់ឆ្លងថ្នល់ពីទិសខាងលិចទៅទិសខាងកើត ហើយក៏បុកនឹងរថយន្តតែម្តង។ ប៉ូលិសបញ្ជាក់ថា មិនមែនរថយន្តបុកចំពីមុខទេ គឺក្មេងប្រុសរងគ្រោះរត់ទៅបុកនឹងជញ្ជាំងរថយន្ត ហើយក៏ដួលទៅលើថ្នល់បណ្តាលឱ្យរងរបួសបែបនេះ។ រថយន្តត្រូវបានរក្សាទុកនៅអធិការដ្ឋានក្រុង ចំណែកកុមាររងគ្រោះកំពុងទទួលការសង្គ្រោះពីក្រុមគ្រូពេទ្យនៅក្នុងមន្ទីរពេទ្យខេត្ត៕
ចែករំលែកព័តមាននេះ