រាជធានីភ្នំពេញ ៖ រដ្ឋសភាកម្ពុជា បានស្នើដល់រដ្ឋាភិបាលបារាំង ជួយផ្តល់អាហាររូបករណ៍ ដល់និស្សិតពេទ្យ និងវេជ្ជបណ្ឌិត ទៅរៀននៅប្រទេសបារាំងឲ្យបានច្រើន ព្រោះថា រាជរដ្ឋាភិបាល…
រាជធានីភ្នំពេញ ៖ រដ្ឋសភាកម្ពុជា បានស្នើដល់រដ្ឋាភិបាលបារាំង ជួយផ្តល់អាហាររូបករណ៍ ដល់និស្សិតពេទ្យ និងវេជ្ជបណ្ឌិត ទៅរៀននៅប្រទេសបារាំងឲ្យបានច្រើន ព្រោះថា រាជរដ្ឋាភិបាល ត្រូវការមន្ត្រីសុខាភិបាលបន្ថែមទៀត ។
ថ្លែងក្នុងសន្នីសីទសារព័ត៌មាន នាព្រឹកថ្ងៃទី១១ ខែមីនា ឆ្នាំ២០២៤ ក្រោយចុះពីចុះពីយន្តហោះមកពីចូលរួមកិច្ចប្រជុំនៅប្រទេសបារាំងដឹកនាំដោយសម្តេចរដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា បានគូសបញ្ជាក់ថា ៖ «យើងខ្ញុំបានស្នើសុំបារាំង ឲ្យជួយបន្ថែមអាហាររូបករណ៍ ដល់និស្សិត ដល់វេជ្ជបណ្ឌិតពេទ្យនៅប្រទេសបារាំង ឲ្យបានច្រើនជាងមុន ពីព្រោះថា អាទិភាពពិសេសរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នឹងពង្រឹងសេវាជាសកលនេះ គឺលោកត្រូវការមន្ត្រីសុខាភិបាល ពេទ្យជាច្រើន» ។
បើតាមលោកជំទាវ ឡោក ខេង បានអះអាងថា ភាគីបារាំងបានទទួលយកសំណើរនេះ ប៉ុន្តែនៅក្នុងប្រទេសបារាំង ក៏ខ្វះគ្រូពេទ្យផងដែរ។ក្នុងកិច្ចប្រជុំនោះដែរ លោកជំទាវ ក៏បានស្នើភាគីបារាំង ផ្តល់អ្នកបច្ចេកទេសមកជួយបណ្តុះបណ្តាលនៅកម្ពុជា ព្រោះថា បារាំងជាប្រទេសមួយ មានអ្នកបច្ចេកទេសផ្នែកអេឡិចត្រូនិចខ្លាំង ។
លោកជំទាវ បានបញ្ជាក់ថា ៖ «អ៊ីចឹងខ្ញុំបានស្នើសុំឲ្យភាគីបារាំងជួយ ដើម្បីឲ្យកម្ពុជា សម្រេចបានក្នុងការជួយបណ្តុះបណ្តាលជំនាញដល់យុវជនក្រីក្រឲ្យទទួលបានជំនាញមួយ ច្បាស់លាស់» ។
បើតាមលោកជំទាវ ឡោក ខេង បានអះអាងថា ភាគីបារាំង បានលើកឡើងថា កម្ពុជាគឺមានចំណងមិត្តភាពតាំងយូរលង់ណាស់មកហើយ ហើយជាដៃគូរមួយ ដែលមិនអាចខ្វះបាន ហើយភាគីបារាំងបានលើកឡើងថា ខ្លួននឹងខិតខំជួយសម្របសម្រួលជួយភាគីកម្ពុជាចំពោះ សំណើរខាងលើនេះ ។
សូមជម្រាបថា សម្ដេចមហារដ្ឋសភាធិការធិបតី ឃួន សុដារី បានកំពុងដឹកនាំគណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា ទៅបំពេញទស្សនកិច្ចជាផ្លូវការ និងចូលរួមកិច្ចប្រជុំកំពូលប្រធានសភាស្ត្រី នៅសាធារណរដ្ឋបារាំង ចាប់ពីថ្ងៃទី២ ដល់ថ្ងៃទី១១ ខែមីនា ឆ្នាំ២០២៤ តបតាមការអញ្ជើញរបស់លោកជំទាវ យ៉ាអ៊ែល ប្រូន ពីវេ (Yaël Braun-Pivet) ប្រធានរដ្ឋសភា នៃសាធារណរដ្ឋបារាំង ។
ដំណើរទស្សនកិច្ចនាពេលនេះ ធ្វើឡើងក្នុងគោលបំណងជំរុញការលើកកម្ពស់ទំនាក់ទំនងស្ថាប័ននីតិប្បញ្ញត្តិ និងទំនាក់ទំនងរវាងប្រជាជននៃប្រទេសទាំងពីរកម្ពុជា-បារាំងឱ្យកាន់តែជិតស្និទ្ធ និងដើម្បីពង្រឹងវិស័យការទូតសភាកម្ពុជា ជាមួយសភានានា នៅលើសកលលោក ជាពិសេសការលើកកម្ពស់សមភាពយេនឌ័រ គោលការណ៍ពហុភាគីនិយម ដើម្បីថែរក្សាការពារសុខសន្តិភាព ស្ថិរភាព និងវិបុលភាពសង្គមប្រកបដោយចីរភាព និងបរិយាបន្ន ។
ក្នុងក្របខណ្ឌទ្វេភាគី ប្រទេសកម្ពុជា និងបារាំង បានកំពុងពង្រឹងពង្រីកទំនាក់ទំ នងកិច្ចសហប្រតិបត្តិការជាមួយគ្នា ទាំងស្ថាប័ននីតិប្បញ្ញត្តិ និងនីតិប្រតិបត្តិ។ កាលពីពាក់កណ្តាលខែមករា កន្លងមកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានអញ្ជើញបំពេញទស្សនកិច្ចជាផ្លូវការ និងមិត្តភាព នៅសាធារណរដ្ឋបារាំងផងដែរ តបតាមការអញ្ជើញ របស់ ឯកឧត្តម អេម៉ានុយអែល ម៉ាក្រុង ប្រធានាធិបតីបារាំង ៕
ចែករំលែកព័តមាននេះ