ទីក្រុងវ៉ាស៊ីនតោន៖ ក្រុមហ៊ុនឯកជនរបស់ប្រទេសអាមេរិកត្រៀមប្រកាសគម្រោងវិនិយោគសរុបដែលមានទំហំទឹកប្រាក់លើសពីមួយពាន់លានដុល្លារនៅប្រទេសហ្វ៊ីលីពីន។ នេះបើយោងតាមការប្រាប់ឱ្យដឹងពីលោកស្រីចាយណា រ៉ៃម៉ុនដូ (Gina Raimondo) ជារដ្ឋមន្ត្រីក្រសួងពាណិជ្ជកម្មអាមេរិកនៅរសៀលថ្ងៃចន្ទនេះ។ យោងតាមគម្រោងនេះ ការវិនិយោគនឹងផ្ដោតសំខាន់ទៅលើវិស័យផលិតថាមពលអគ្គិសនីពីពន្លឺថ្ងៃ, ការផលិតរថយន្តអគ្គិសនី និងការអភិវឌ្ឍវិស័យឌីជីថល។
លោកស្រីរដ្ឋមន្ត្រីរូបនេះបន្ថែមថានៅតំបន់អាស៊ីអាគ្នេយ៍ ក្រុមហ៊ុនរបស់អាមេរិកហាក់ដូចជាជាប់ចិត្តនឹងការវិនិយោគនៅប្រទេសហ្វ៊ីលីពីនខ្លាំងជាងគេ។ លោកស្រីកំពុងស្ថិតនៅប្រទេសហ្វ៊ីលីពីននៅវេលាថ្មើរនេះដើម្បីបំពេញទស្សនកិច្ចជាផ្លូវការរយៈពេលពីរថ្ងៃ។ នេះជាផ្នែកមួយនៃការជំរុញវិស័យពាណិជ្ជកម្ម និងវិនិយោគតាងនាមជំនួសមុខឱ្យលោកបៃដិន។ គណៈប្រតិភូដែលអមដំណើរលោកស្រីរ៉ៃម៉ុនដូក៏មានជាមន្ត្រីធុរកិច្ចកំពូលៗរបស់ក្រុមហ៊ុនធំៗផងដែរ។
គេនៅចាំបានថាកាលពីខែមករា ឆ្នាំ២០២៤ សេតវិមានធ្លាប់ប្រកាសថាខ្លួននឹងបញ្ជូនបេសកជនពិសេសផ្នែកពាណិជ្ជកម្មទៅហ្វ៊ីលីពីនដើម្បីជំរុញការវិនិយោគរបស់ក្រុមហ៊ុនឯកជនអាមេរិកនៅក្នុងផ្នែកហេដ្ឋារចនាសម្ព័ន្ធ, ថាមពលស្អាត, រ៉ែសំខាន់ៗ, កសិកម្ម និងនវានុវត្តន៍។ អាមេរិក និងហ្វ៊ីលីពីនជាសម្ព័ន្ធមិត្តចាស់វស្សាដែលបានចុះហត្ថលេខាលើសន្ធិសញ្ញាមិត្តភាព-សហការរយៈពេល៧៣ឆ្នាំមកហើយ។
នៅក្នុងចំណោមកិច្ចព្រមព្រៀងនោះ ក៏មានការបង្កើតភាពជាដៃគូសេដ្ឋកិច្ចផងដែរ។ លោកស្រីរ៉ៃម៉ុនដូថ្លែងថាសម្ព័ន្ធភាពរវាងអាមេរិក និងហ្វ៊ីលីពីនមានភាពរឹងមាំប្រៀបបាននឹងមិត្តដែកថែប (iron clad)។ ម៉្យាងទៀតសម្ព័ន្ធភាពនេះបានចាក់ឫសជ្រៅណាស់អស់រយៈពេលជាង៧២ឆ្នាំមកហើយ។ យើងនឹងនៅតែជាមិត្តល្អនឹងគ្នាទៅថ្ងៃអនាគត។ មិនតែប៉ុណ្ណោះ យើងនឹងបង្កើនចំណងមិត្តភាពថែមមួយកម្រិតទៀតក្នុងនាមជាដៃគូដែលបង្កើតនូវភាពរីកចម្រើនទាំងអស់គ្នា៕
ប្រភព៖ Channel News Asia
https://www.channelnewsasia.com/business/us-companies-announce-investments-over-us1-billion-philippines-4186421
ចែករំលែកព័តមាននេះ