នៅពេលដែលលុយដុល្លារក្តីលុយរៀលក្តី ជួបបញ្ហារហែក ឬក៏សត្វល្អិតជាពិសេសកណ្តៀរវាស៊ី សូមកុំអាលអស់សង្ឃឹមហើយយកវាទៅបោះចោល ចូស្វែងរកកន្លែងប្តូរពីព្រោះវាអាចនៅសេសសល់តម្លៃដែលយើងអាចទៅប្តូរវិញបាន គ្រាន់តែគេកាត់ខាត ខ្លះៗប៉ុណ្ណោះ ។
អ្នកស្រី ហួន ឈានហ្គិច អាជីវករដូរលុយរហែកនៅផ្សារចាស់ រាជធានីភ្នំពេញបានអោយដឹងថា មិនថាលុយដុល្លារ ឬលុយរៀលនោះទេ នៅពេលរហែក ទក់ ប្រឡាក់ ឬខូចទ្រង់ទ្រាយ ប្រជាពលរដ្ឋខ្មែរនៅតែអាចយកមកប្តូរជាក្រដាសប្រាក់ថ្មីវិញបានដោយគ្រាន់តែការប្តូរមានការកាត់ខាតទៅតាមទំហំនៃការខូចខាតរបស់ក្រដាសប្រាក់ ។
អ្នកស្រី ហួន ឈានហ្គិច បានអោយកម្មវិធីលុយនៃសារព័ត៌មានកោះសន្តិភាពដឹងថា«និយាយទៅកាត់ទឹកតាមសភាពលុយ ។ លុយដែលមិនអាចទទួលប្តូរបាននោះ គឺលុយខូចខាតអស់សាច់ប្រហែល៥០ភាគរយ»។ អ្នកស្រី ហួន ឈានហ្គិច បន្តថា ចំពោះការកាត់ទឹកពេលយកលុយដុល្លាររហែកទៅដូរ គឺគេកាត់ទឹកទៅតាមសភាពនៃលុយរបស់អ្នក ពោល គឺទាល់តែអ្នកយកលុយរហែកទៅដល់កន្លែងដូរលុយគេពិនិត្យមើលសភាពរបស់លុយជាក់ស្ដែងទើបដឹង ។
អ្នកស្រី ហួន ឈានហ្គិច បន្តថា ក្រដាសប្រាក់ដែលប្តូរនោះ ប្រសិនបើជាក្រដាសប្រាក់រៀលលុយចាស់ៗ រហែកខ្លាំងខូចទ្រង់ទ្រាយត្រូវបានធនាគារជាតិប្រមូលយកទៅដុតកម្ទេចចោលនៅទីលានចាក់សម្រាមម្តុំភ្នំប្រសិទ្ធ ឬកន្លែងចាក់សំរាមជើងឯក ។ យើងរើសយកលុយណាដែលនៅប្រើបានសម្រាប់លុយណាដែលប្រើលែងបានត្រូវកាត់ចិញ្ច្រាំយកទៅដុតចោល ។ ចំណែកក្រដាស់ប្រាក់ដុល្លាវិញត្រូវប្រមូលបញ្ជូនទៅកាន់ សហរដ្ឋអាមេរិកវិញ ។
ដោយឡែកទាក់ទងនឹងចំនួនអតិថិជនដែលតែងតែយកលុយរហែកលុយសត្វល្អិតស៊ី ឬក៏លុយដែលខូចទ្រុងទ្រាយដើមប៉ុន្មាននាក់ពិតប្រាកដនោះ លោកស្រី ហួន ឈានហ្គិច មិនបានដឹងប្រាកដឡើយ ។ អ្នកស្រី បញ្ជាក់បន្ថែមថា ៖«អតិថិជនមិនបានរាប់ផង ព្រោះមួយថ្ងៃទៅមួយថ្ងៃច្រើននាក់ដែរមិនដែលបានរាប់ផង ។ និយាយរួមលុយបរទេសក៏ទទួលលុយខ្មែរក៏ទទួល ។ ទទួលគ្រប់ប្រភេទ» ។
ដោយឡែកអ្នកនាង ប៊ុល គារី ជាអាជីវករលក់គ្រឿងអគ្គិសនី ក្បែរផ្សារដេប៉ូ បានអោយដឹងថា កន្លងមកអ្នកនាងធ្លាប់បានប្តូរក្រដាសប្រាក់ដុល្លារ ក្នុងចំនួន១០០ដុល្លារ កាត់ខាតអស់២០ភាគរយ ដែលភាគច្រើនអ្នកនាងផ្ទាល់ដូរនៅតាមទីតាំងបញ្ជលក់មាស ប្តូរប្រាក់នៅតាមផ្សារនានាក្នុងរាជធានីភ្នំពេញ ។
អ្នកនាង ប៊ុល គារី បន្ថែមថា ការប្តូរកាត់ខាតទៅតាមទំហំខូចខាតខ្លាំងកម្រិតណាជាទូទៅការកាត់ខាតចន្លោះពី២០ទៅ៣៥ភាគរយ ខុសៗគ្នាតាមបញ្ជអ្នកប្តូរប្រាក់នីមួយៗ ។ ចំណែកក្រដាសប្រាក់ដែលខូចៗ រហែក ឬប្រឡាក់នោះអ្នកនាងមិនដឹងថា អ្នកប្តូរយកទៅទីណានោះទេ ។
កន្លងមក ធនាគារជាតិនៃកម្ពុជា បានអំពាវនាវឲ្យពលរដ្ឋយកក្រដាសប្រាក់រៀល ចាស់ ទក់ និងរហែក អាចយកមកដូរថ្មី ដោយមិនគិតថ្លៃសេវានៅគ្រប់បញ្ជរ បេឡារបស់សាខាធនាគារជាតិនៃកម្ពុជា រាជធានីខេត្ត លើកលែងតែស្នាក់ការកណ្តាលនៅរៀងរាល់ម៉ោងធ្វើការ ។
ក្នុងករណីដែលក្រដាសប្រាក់រៀល មានការខូចខាត ឬបាត់បង់ទ្រង់ទ្រាយដូចមានចែងក្នុងមាត្រា ៥១ មាត្រា៥២ និងមាត្រា៥៣ នៃច្បាប់ស្ដីពីការរៀបចំ និងការប្រព្រឹត្តទៅនៃធនាគារជាតិកម្ពុជា១៩៩៦ ធនាគារជាតិនៃកម្ពុជារក្សាសិទ្ធិដកហូតដោយគ្មានសំណង ។
មាត្រា៥១ ចែងថា «ធនាគារកណ្តាលអាចបដិសេធមិនប្តូរក្រដាសប្រាក់ និងកាសបើសិនរូបភាពវាលែងមានភាពច្បាស់លាស់ បាត់បង់រូបភាពដើម ឬធ្លុះធ្លាយ ឬដែលបាត់បង់ទំហំ៣០ ភាគរយ ឬលើសពីនេះ។ រូបិយវត្ថុទាំងនេះ ត្រូវដកចេញពីចរាចរណ៍ ហើយបំផ្លាញចោលដោយគ្មានសំណងចំពោះម្ចាស់ទេ លើកលែងតែករណីពិសេសដែលធនាគារកណ្តាលអាចយល់ព្រមសងមួយចំណែក ឬទាំងអស់» ។
មាត្រា ៥២ ចែងថា «ក្រដាសប្រាក់ក្លែងក្លាយដែលយកមកបង់ ឬប្តូរត្រូវរឹបអូសដោយគ្មានសំណង ហើយត្រូវជូនព័ត៌មានទៅអាជ្ញាធរមានសមត្ថកិច្ច» ។ ចំណែកមាត្រា៥៣ បានចែងថា «ម្ចាស់ប្រាក់មិនអាចទាមទារពីធនាគារកណ្តាលឱ្យសងចំពោះក្រដាសប្រាក់ ឬកាលណាដែលខ្លួនធ្វើឱ្យបាត់បង់ ឬធ្វើឱ្យអន្តរាយនោះឡើយ ។ ធនាគារកណ្តាលអាចដកហូតដោយគ្មានថ្នូរនូវក្រដាសប្រាក់ដែលមានការខូចខាតរូបភាពក្រៅ ពិសេសចំពោះក្រដាសប្រាក់ណាដែលមានសរសេរ លាបពណ៌ បោះពុម្ព បោះត្រា ឬបិទវត្ថុស្អិតពីលើ ឬឆ្លុះធ្លាយ ឬបាត់រូបភាពដោយប្រការណាក៏ដោយ» ៕ ដោយៈ ស នីត
ចែករំលែកព័តមាននេះ