រាជធានីភ្នំពេញ ៖ លោកវរសេនីយ៍ទោ មឿន ដារ៉ារិទ្ធ នាយរងការិយាល័យ បានដឹកនាំកម្លាំងជំនាញឃាត់ខ្លួនជនសង្ស័យ២នាក់ កាលពីវេលាម៉ោង២០និង៣៥នាទីថ្ងៃទី០៣ ខែមីនា ឆ្នាំ២០២៤…
រាជធានីភ្នំពេញ ៖ លោកវរសេនីយ៍ទោ មឿន ដារ៉ារិទ្ធ នាយរងការិយាល័យ បានដឹកនាំកម្លាំងជំនាញឃាត់ខ្លួនជនសង្ស័យ២នាក់ កាលពីវេលាម៉ោង២០និង៣៥នាទីថ្ងៃទី០៣ ខែមីនា ឆ្នាំ២០២៤ ត្រង់ចំណុចមុខវត្ដស្ទឹងមានជ័យ សង្កាត់ស្ទឹងមានជ័យទី១ ខណ្ឌមានជ័យ ពាក់ព័ន្ធករណីលួចមានស្ថានទម្ងន់ទោស (លួចកង់បីឥណ្ឌា) ។
ការឃាត់ខ្លួនជនសង្ស័យខាងលើនេះ ធ្វើឡើងតាមបទបញ្ជារបស់ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ លោកឧត្តមសេនីយ៍ត្រី វុទ្ធី វង្សវិបុល អនុប្រធាននាយកដ្ឋាន និងលោកវរសេនីយ៍ឯក ឡេង ប៊ុនហួរ នាយការិយាល័យព្រហ្មទណ្ឌកម្រិតស្រាល ។
ជនសង្ស័យទាំង២នាក់ រួមមាន ៖
ទី១-ឈ្មោះ អ៊ុល ប៊ុននឿន អាយុ២៤ឆ្នាំ ស្នាក់នៅផ្ទះជួល បន្ទប់លេខ១ ភូមិតេភ្នា សង្កាត់ស្ទឹងមានជ័យ១ ខណ្ឌមានជ័យ
និងទី២-ឈ្មោះ ស៊ន សុខហេង អាយុ២៣ឆ្នាំ ស្នាក់នៅភូមិតេភ្នា សង្កាត់ស្ទឹងមានជ័យទី១ ខណ្ឌមានជ័យ ។
កម្លាំងជំនាញ ដកហូតបាន កង់បីឥណ្ឌា ចំនួន១គ្រឿង ពណ៌ស ពាក់ស្លាកលេខព្រៃវែង1O-5956, ម្សៅក្រាមស ចំនួន១កញ្ចប់ និងសម្ភារមួយចំនួនទៀត ។
ក្រោយសួរនាំនៅថ្ងៃទី០៤ ខែមីនា ឆ្នាំ២០២៤ ជនសង្ស័យទាំង២នាក់ បានចង្អុលបង្ហាញជនសង្ស័យម្នាក់ទៀត ដែលទទួលផលចោរកម្ម (ទិញ PassApp) កម្លាំងជំនាញបានទៅដល់ចំណុចភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ បានឃើញ និងឃាត់ជនសង្ស័យម្នាក់បន្ថែមទៀត ឈ្មោះ វ៉ា ប៊ុនថា អាយុ៣៦ឆ្នាំ ស្នាក់នៅផ្ទះលេខ៨ ភូមិតេភ្នា សង្កាត់ស្ទឹងមានជ័យ២ ខណ្ឌមានជ័យ ។
ក្នុងនោះកម្លាំងជំនាញដកហូតបាន ម៉ូតូចំនួន ១គ្រឿង ម៉ាក Smash 110 ពណ៌ខ្មៅលាយខៀវ (មិនប្រក្រតី បែកគ្រាប់សោ), កាំបិតខ្លី ចំនួន១ដើម, ច្រវ៉ាក់ខ្លី ចំនួន១ខ្សែ, សោរម៉ូតូចំនួន១ និងមេសោចំនួន១ ។
បច្ចុប្បន្ន កម្លាំងជំនាញបានកសាងសំណុំរឿងបញ្ជូនជនសង្ស័យទៅកាន់សាលាដំបូងរាជធានីភ្នំពេញ ដើម្បីចាត់ការបន្ដតាមនីតិវិធី ។
ជាមួយគ្នានេះផងដែរ នាយកដ្ឋាននគរបាលព្រហ្មទណ្ឌ សូមប្រកាសស្វែងរកម្ចាស់កង់បីឥណ្ឌា មួយគ្រឿង ពណ៌ស ពាក់ផ្លាកលេខព្រៃវែង 1O-5956 ជាសាធារណៈ ដើម្បីយកឯកសារទៅផ្ទៀងផ្ទាត់ទទួលយកវិញ ៕
ចែករំលែកព័តមាននេះ