រាជធានីភ្នំពេញ ៖ តារាសម្តែងអ្នកនាង ផាន់ ផាភួង បានចេញមុខបកស្រាយជំនួសកូនស្រី អាង សុជាតា ដែលកំពុងផ្ទុះរឿងទំនាក់ទំនងស្នេហ៍ជាមួយបុរសម្នាក់យ៉ាងស្ងៀមស្ងាត់ ខណៈពេលដែលគេបានប្រទះឃើញតារាស្រីវ័យក្មេង…
រាជធានីភ្នំពេញ ៖ តារាសម្តែងអ្នកនាង ផាន់ ផាភួង បានចេញមុខបកស្រាយជំនួសកូនស្រី អាង សុជាតា ដែលកំពុងផ្ទុះរឿងទំនាក់ទំនងស្នេហ៍ជាមួយបុរសម្នាក់យ៉ាងស្ងៀមស្ងាត់ ខណៈពេលដែលគេបានប្រទះឃើញតារាស្រីវ័យក្មេង អាង សុជាតា បានបង្ហាញរូបភាពសកម្មភាពស្និទ្ធិស្នាលជាមួយបុរសម្នាក់នៅលើបណ្ដាញសង្គម ។
អ្នកនាងផាន់ ផាភួង បានបញ្ជាក់យ៉ាងខ្លីប្រាប់កោះសន្តិភាពតាមសារអេឡិចត្រូនិចថា អ្វីដែលមហាជនបានឃើញកូនស្រីអាង សុជាតា បង្ហោះលើបណ្ដាញសង្គមខាងលើនេះ គឺគ្រាន់តែជាការស្និទ្ធិស្នាលធម្មតាបែបមិត្តភក្តិប៉ុណ្ណោះ ពោលមិនមានទំនាក់ទំនងស្នេហាអ្វីនោះឡើយ ។
អ្នកនាងថា សកម្មភាពនោះគ្រាន់តែជាពួកម៉ាកគ្នីគ្នាគាត់ប៉ុណ្ណោះ មិនមែនមានទំនាក់ទំនងស្នេហាអ្វីឡើយ ក្នុងពេលដែលនាងក៏បានសួរនាំកូនស្រីដែរ ហើយគាត់ក៏ឆ្លើយថា មិនដឹងរឿងអ្វីដូចគ្នា ។
ការចេញមុខបកស្រាយខាងលើពីអ្នកនាង អាង សុជាតា នាពេលនេះបានធ្វើឡើង បន្ទាប់ពីតារាសម្តែងនាង អាង សុជាតា បានបង្ហោះរូបភាពស្និទ្ធិស្នាលដោយអមដំណើរក្នុងរថយន្តជាមួយបុរសវ័យក្មេងមួយរូបតាមរយៈបណ្តាញសង្គម Tik Tok ។
សកម្មភាពនោះបានក្លាយជាការចាប់អារម្មណ៍ពីបណ្ដាអ្នកលេងបណ្ដាញសង្គម ក្នុងពេលដែលមានមហាជនខ្លះបានចាត់ទុកថា បុរសរូបនោះអាចជាគូស្នេហ៍របស់ អាង សុជាតា មិនមែនជាមិត្តភក្តិនោះឡើយ ។
ជាការកត់សម្គាល់ រហូតមកទល់ពេលនេះ តារាសម្តែងនាង អាង សុជាតា នៅមិនទាន់លេចឮ ឬបង្ហាញទំនាក់ទំនងស្នេហាពិតប្រាកដ ជាមួយបុរសណាម្នាក់ជាសាធារណៈនៅឡើយទេ បើទោះបីជាពេលបច្ចុប្បន្ន នាងបានឈានចូលវ័យ១៩ឆ្នាំ ជាមួយរូបសម្រស់ដ៏ស្រស់ផូរផង់ក៏ដោយ ។
កន្លងមក អាង សុជាតា ធ្លាប់បានលើកឡើងថា បញ្ហាស្នេហានាងនៅមិនទាន់គិតគូរនាពេលនេះ នៅឡើយទេ ដោយសារតែនាងកំពុងជាប់ដៃសិក្សាជាមួយការងារសិល្បះដែលកំពុងក្តាប់ណែននៅក្នុងដៃផងនោះ ទើបនាងមិនទាន់គិតដល់បញ្ហាមួយនេះ ។
តារាសម្តែងវ័យក្មេងអាង សុជាតា ហៅឈូឈូ បានប្រឡងជាប់បាក់ឌុបនាឆ្នាំ២០២២ កន្លងទៅនេះ ដោយនាងទទួលបាននិទ្ទេស D ហើយនាងបានជ្រើសរើសរៀនបន្តផ្នែកគ្រប់គ្រងនៅសាកលវិទ្យាល័យ IU ដោយសារតែនាងឱ្យគោលបំណងបើកអាជីវកម្មខ្លួនឯង ដូច្នេះ មុខវិជ្ជានេះជាជម្រើសល្អសម្រាប់នាង ។
នាងបញ្ជាក់ថា រវាងការងារសិល្បៈ និងការសិក្សា វាពិតជាប្រទាញប្រទង់គ្នាខ្លាំងណាស់ នៅពេលការងារសិល្បៈរវល់ ការរៀនសូត្រត្រូវធ្លាក់ចុះ ដូច្នេះ ដើម្បីឱ្យការងារសិល្បៈ និងការសិក្សាដើរទន្ទឹមគ្នាទៅរលូន យើងត្រូវអត់ធ្មត់ខិតខំប្រឹងប្រែងខ្លាំងណាស់ ។
គួរបញ្ជាក់ថា តារា អាង សុជាតា បានចូលសិល្បៈតាំងពីមានវ័យ៧ឆ្នាំមក ដោយសម្តែងក្នុងកុនដំបូងរឿង «ម្ចាស់គំនុំ ម្ចាស់ស្នេហ៍» ហើយរហូតមកទល់នាពេលនេះ តារាសម្តែងមានវ័យមានវ័យ១៩ឆ្នាំរូបនេះ ធ្លាប់បានសម្តែងកុនភាគនិងកុនខ្នាតធំរហូតដល់ជាង២០រឿងមកហើយ ៕
ចែករំលែកព័តមាននេះ