ខេត្តសៀមរាប ៖ ក្មេង​ដុតភ្លើង​យកឃ្មុំ​ ​បង្កជាអគ្គិភ័យ​ឆេះ​ព្រៃរាលដាលដល់​ចម្ការអំពៅ​អស់​១៥ ហិកតា នេះជា​លើកទីពីរហើយ ដែលបង្កការភ្ញាក់​ផ្អើល​ដល់ប្រជាពលរដ្ឋ និង​សមត្ថកិច្ច​ សំណាងល្អ ​មិនឆេះ​រាលដាលដល់ផ្ទះអ្នកជិតខាង ​និង​​គ្មាន​មនុស្សណាម្នាក់​រងរបួស ក្នុងហេតុការណ៍ភ្លើងឆេះ ចម្ការ​អំពៅ​នេះ​ឡើយ។

ហេតុការណ៍​ខាងលើ​នេះបានកើតឡើងនៅវេលាម៉ោង​១​និង​៤០​នាទី​រសៀល​ថ្ងៃទី៥ ខែមីនា ឆ្នាំ ២០២៤ ស្ថិតនៅក្នុងភូមិអញ្ចាញ សង្កាត់នគរធំ ក្រុងសៀមរាប​ ខេត្តសៀមរាប ។

បើតាមប្រសាសន៍របស់លោកឧត្តមសេនីយ៍ត្រី ឌុត ខុន ស្នងការរងទទួលការិយាល័យបង្ការ ពន្លត់អគ្គីភ័យ និង​សង្គ្រោះ​នៃស្នងការដ្ឋាននគរ​បាលខេត្តសៀមរាប បាន​ឱ្យ​ដឹង​​កាលពី​រសៀលថ្ងៃទី៥ ខែមិនា ឆ្នាំ២០២៤ កន្លងទៅ​នេះថា មានករណី​អគ្គីភ័យឆេះ​ចម្ការអំពៅ បណ្ដាលឱ្យខូចខាតអស់ ចំនួន១៥​ហិតា ដោយមិនទាន់ដឹងមូលហេតុ ។

ករណីនេះបានរលត់វិញ នៅវេលាម៉ោង៣និង២១​នាទីរសៀលថ្ងៃខែដដែល ដោយមិនបណ្ដាលឱ្យមានគ្រោះ​ថ្នាក់ដល់មនុស្សឡើយ ដោយប្រើប្រាស់រថយន្តអគ្គីភ័យអស់ចំនួន​១០​គ្រឿង ក្នុងនោះរថយន្តអគ្គីភ័យស្នងការខេត្តចំនួន៦​គ្រឿង, រថយន្តពន្លត់អគ្គីភ័យអប្សរាចំនួន២គ្រឿង, រថយន្តពន្លត់អគ្គីភ័យអាវុធហត្ថចំនួន២គ្រឿង។ មូលហេតុមកពីក្មេងដុត​ភ្លើង​យក​ឃ្មុំ ទើបបណ្ដាលឱ្យរាលដាល ឆេះ​ព្រៃ រាលដាលដល់ចម្ការអំពៅ​នេះជាលើកទីពីរ ។

បច្ចុប្បន្ន ចម្ការអំពៅ​ដែល​ត្រូវ​បាន​ក្មេង​នាំគ្នា​ដុតព្រៃ​យក​ឃ្មុំ​ដែល​កើតឡើងជា​លើក​ទីពីរ​នេះ បើ​គិតជាទឹកប្រាក់​អស់​ប្រមាណ​ជាង​២​ម៉ឺនដុល្លារ ៕