ខេត្តបាត់ដំបង ៖ បុរសម្នាក់ដែលសមត្ថកិច្ចអះអាងថា ធ្លាប់ជាប់គុករាប់ភ្លេច ពេលនេះ ត្រូវកម្លាំងកងរាជអាវុធហត្ថឃាត់ខ្លួនជាថ្មី ក្រោយវាយដំប្រពន្ធស្ទើរទក់សាច់ កាលពីវេលាម៉ោង១០យប់ថ្ងៃទី០៥ មីនា នៅបន្ទប់ផ្ទះជួល ស្ថិតក្នុងភូមិកាប់គោថ្មី សង្កាត់អូរចា ក្រុងបាត់ដំបង ព្រោះតែខឹងនឹងប្រពន្ធចេះតែដើរលេងយប់ ។
របាយការណ៍កងរាជអាវុធហត្ថបានឲ្យដឹងថា ជនសង្ស័យឈ្មោះ ធៀង នុរក្ស ហៅទ្រេន អាយុ៣៦ឆ្នាំ ។ រីឯប្រពន្ធឈ្មោះស្នា រឿម ហៅយ៉ុង អាយុ៣៥ឆ្នាំ រស់នៅចំណុចកើតហេតុ ។ ជនដៃដល់ត្រូវបានកម្លាំងកងរាជអាវុធហត្ថក្រុងបាត់ដំបងឃាត់ខ្លួន ក្រោយពេលកើតហេតុ ។
បើតាមការសួរនាំអំពើហិង្សានេះ បានកើតឡើងដោយប្ដីខឹងប្រពន្ធ ដែលតែងដើរលេងយប់ហាមមិនស្ដាប់។ មេបញ្ជាការមូលដ្ឋានកងរាជអាវុធហត្ថក្រុងបាត់ដំបង លោក សំ វិឡុង បាននិយាយថា ជនដៃដល់ធ្លាប់ជាប់ពន្ធនាគារច្រើនលើកមកហើយក្នុងសំណុំរឿង«ហឹង្សាគ្រឿងញៀន និងអំពើចោរកម្ម»។
លោកថា ប្ដីប្រពន្ធនេះមិនមានចុះអេតាស៊ីវិលទេ តែបានគ្នាជាប្ដីប្រពន្ធរហូតមានកូនទៅហើយ និងតែងមានអំពើហិង្សាស្ទើររាប់ភ្លេច។ លោកបានប្រាប់ថា នៅយប់កើតហេតុ ជនដៃដល់បានប្រើប្រាសញញួរដេញវាយប្រពន្ធ ហើយប្រើកន្ត្រៃដេញចាក់ តែវាយមិនបានចាក់មិនត្រូវ ក៏ប្រើកណ្ដាប់ ដៃវាយទះតប់ប្រពន្ធ បណ្ដាលឲ្យរងរបួសជាំមុខ និងរាងកាយស្ទើរទក់សាច់ ។
បើចម្លើយសារភាព អតីតទណ្ឌិតជាប់គុកស្ទើររាប់ភ្លេចរូបនេះ បានប្រាប់សមត្ថកិច្ចថា មូលហេតុដែលខ្លួនប្រើហឹង្សាទៅលើប្រពន្ធហេងស៊យរបស់ខ្លួន ក៏ព្រោះតែខ្លួនខឹងប្រពន្ធចេះតែដើរលេងយប់ហាមមិនស្ដាប់។ ប៉ុន្តែលោក សំ វិឡុង បានសង្ខេបប្រវត្តិរឿងប្ដីប្រពន្ធហេងស៊យនេះថា រឿងប្ដីប្រពន្ធនេះ គឺប្រហាក់ប្រហែលគ្នា។
ដូច្នេះ ហើយទើបប្តីប្រពន្ធនេះ ចេះតែមានអំពើហឹង្សាមិនចេះចប់ រីឯបុរសជាប្ដីវិញ ក៏ជាមុខសញ្ញាប្រព្រឹត្តបទល្មើសគ្រឿងញៀន និងអំពើចោរកម្មផងដែរ ។ យ៉ាងណាក្ដី ដោយយោងបណ្ដឹងស្ត្រីជាប្រពន្ធ ពេលនេះ មន្ត្រីជំនាញកំពុងសួរនាំអតីតទណ្ឌិតរូបនេះ ដើម្បីកសាងសំណុំរឿងចាត់ការតាមនីតិវិធីហើយ ។
ចែករំលែកព័តមាននេះ