រាជធានីភ្នំពេញ ៖ ក្រុមគ្រួសារតារាកំប្លែងជុំ រស្មី ហៅស្រីទូច និងក្មួយស្រី ស៊ូ ស៊ីរីកា បានធ្វើសន្និសីទសារព័ត៌មានដង្ហោយរកយុតិ្តធម៌ ខណៈសំណុំរឿងក្ដីកេរមរតកបានដល់តុលាការឧទ្ធរណ៍ហើយ…
រាជធានីភ្នំពេញ ៖ ក្រុមគ្រួសារតារាកំប្លែងជុំ រស្មី ហៅស្រីទូច និងក្មួយស្រី ស៊ូ ស៊ីរីកា បានធ្វើសន្និ
សីទសារព័ត៌មានដង្ហោយរកយុតិ្តធម៌ ខណៈសំណុំរឿងក្ដីកេរមរតកបានដល់តុលាការឧទ្ធរណ៍ហើយ ។ ថ្លែងប្រាប់ក្រុមអ្នកសារព័ត៌មាន កាលពីព្រឹកថ្ងៃទី៥ ខែមីនា ឆ្នាំ២០២៤ នេះ ក្រុមគ្រួសារតារាកំប្លែងជើងចាស់អ្នកស្រី ជុំ រស្មី ហៅស្រីទូច និងក្មួយស្រីតារាចម្រៀងកញ្ញា ស៊ូ ស៊ីរីកា បានដង្ហោយរកភាពយុត្តិធម៌ពីតុលាការពាក់ព័ន្ធរឿងបណ្ដាំមរតករបស់លោកស្រីកែវ មន្ថា ដែលជាម្តាយ ខណៈនីតិវិធីបានដល់ដៃតុលាការឧទ្ធរណ៍ទៅហើយនោះ ។
តារាកំប្លែង ជុំ រស្មី បានបង្ហាញអារម្មណ៍ឈឺចាប់ ដោយបានបញ្ជាក់ថា អ្នកស្រី និងសមាជិកក្រុមគ្រួសារបានខិតខំអស់ពីលទ្ធភាពហើយក្នុងរយៈពេលជាង២ឆ្នាំមកនេះ ដើម្បីតតាំងតាមផ្លូវតុលាការជាមួយនឹងភាគីស្វាមីរបស់អ្នកស្រីកែវ មន្ថា ដែលមិនព្រមអនុវត្តន៍តាមបណ្ដាំមរតក ហើយថែមទាំងបានបណ្ដេញសមាជិកជាកូនចៅបង្កើតរបស់អ្នកស្រី កែវ មន្ថា ចេញពីផ្ទះ ដែលធ្លាប់រស់នៅជួបជុំគ្នាតាំងពីយូរមកហើយនោះទៀតផង ។ ក្នុងនោះក៏មានក្មួយស្រីរបស់អ្នកស្រី គឺតារាចម្រៀង ស៊ូ ស៊ីរីកា ផងដែរ ។
លោកស្រីជុំ រស្មី បានបញ្ជាក់ថា «ថ្ងៃនេះ ខ្ញុំក្រុមគ្រួសារខ្ញុំទាំងកូនក្មួយ ចៅ សុំភាពយុត្តិធម៌ គឺសាលាឧទ្ធរណ៍លោកមេត្តាជួយពិនិត្យសំណុំឯកសាររឿងកេរមរតកនេះឲ្យបានច្បាស់លាស់ ព្រោះថា ភស្តុតាងច្រើនណាស់ ដែលនាងខ្ញុំត្រូវបន្ថែមពាក់ព័ន្ធនឹងសំណុំរឿងនេះ» ។លោកស្រីបានបន្ថែមថា រាល់ឯកសារដែលលោកស្រីទទួលបានបង្ហាញថា ភាគីដែលជាគូក្តីរបស់អ្នកស្រី
សុទ្ធតែជាការមិនពិត ។
លោកស្រីថា រឿងមរតកនេះ មានភាពមិនប្រក្រតីពោល គឺប្រកាសមិនបាន៣សប្តាហ៍ផង ក៏មានការផ្ទេរទៅឲ្យកូនក្រោយគាត់ទាំងក្រុមគ្រួសារអ្នកស្រីមិនបានដឹងផង ។សម្រាប់អ្នកស្រីជុំ រស្មី បញ្ជាក់ថា អ្វីដែលអ្នកស្រីរួមទាំងបងប្អូនកូនចៅ ដែលក្នុងនោះក៏មានតារាចម្រៀងកញ្ញាស៊ូ សីរីកា គឺចង់ឲ្យមានការផ្តល់ភាពយុត្តិធម៌ចំពោះពួកគាត់ដូច ដែលមានសរសេរនៅក្នុងលិខិតបណ្តាំមរតករបស់លោកស្រី កែវ មន្ថា ដែលជាម្តាយ និងជីដូន ។
ប៉ុន្តែរហូតមកដលពេលនេះ អ្នកស្រីនៅមិនទាន់ទទួលបានដំណោះស្រាយផ្លូវច្បាប់ណាមួយដែលស្របនឹងឆន្ទះរបស់មរតកជនលោកស្រី កែវ មន្ថា ឬដំណោះស្រាយណាមួយសមរម្យដែលរូបអ្នកស្រី និងសមាជិកគ្រួសារទាំងអស់អាចទទួលយកបាននៅឡើយ ស្របពេលសំណុំរឿងនេះកំពុងនៅក្នុងដៃរបស់សាលាឧទ្ធរនៅឡើយ ។
យ៉ាងណាក្តី លោកស្រីក៏ដូចជាក្រុមគ្រួសារស្នើឲ្យតុលាការកាត់សេចក្តីផ្តល់កេរមរតកនេះមកអ្នកស្រីនិងក្រុមគ្រួសារបាន៥០%ក៏បាន ដើម្បីឲ្យអ្នកស្រីមានលទ្ធភាពចិញ្ចឹមកូនចៅដែលកំពុងស្ថិតក្នុងបន្ទុក ។
ម្ចាស់ដើមបណ្ដឹងរដ្ឋប្បវេណីរូបនេះបញ្ជាក់ថា ក្នុងរយៈពេល២ឆ្នាំនៃដំណើរការនីតិវិធីច្បាប់ពីសាលាដំបូងរាជធានីភ្នំពេញដល់សាលាឧទ្ធរណ៍ ព្រោះតែអ្នកស្រីចង់រក្សាការពារផលប្រយោជន៍ ស្របច្បាប់ដែលសមាជិកគ្រួសារទាំងអស់ គួរទទួលបានស្របតាមឆន្ទះនិងគោលបំណងរបស់ម្ដាយនៅក្នុងបណ្ដាំមរតកដែលត្រូវបានប្រកាសដោយមេធាវីប៉ុណ្ណោះ ។
ជាពិសេស គឺស្វែងរកភាពយុត្តិធម៌ជូនសមាជិកទាំងអស់ដែលមិនទទួលបានមរតក ថែមទាំងត្រូវបណ្ដេញចេញពីផ្ទះយ៉ាងអយុត្តិធម៌។ អ្នកស្រីបានស្នើដល់សម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម កើត រិទ្ធ ឧបនាយករដ្ឋមន្ត្រីជារដ្ឋមន្ត្រីក្រសួងយុត្តិធម៌ សូមជួយរកយុត្តិធម៌ដល់ក្រុមគ្រួសារពួកអ្នកស្រីផង ។
អ្នកស្រី ជុំ រស្មី ហៅស្រីទូច បានទទូចក្នុងនាមក្រុមគ្រួសារទាំងអស់ ដែលកំពុងរងភាពអយុត្តិធម៌ សូមអំពាវនាវយ៉ាងទទូចដល់ស្ថាប័នតុលាការ ក៏ដូចជាក្រសួងយុត្តិធម៌ជួយពន្លឿនរឿងក្តីនេះដល់សមាជិកគ្រួសារទាំងអស់ផង ។ ម្យ៉ាងទៀត ពេលនេះ សមាជិកគ្រួសារជាច្រើនកំពុងគ្មានផ្ទះជ្រកកោណនោះទេ និងត្រូវរស់នៅយ៉ាងលំបាកវេទនា ។
ចំណែកតារាចម្រៀង កញ្ញា ស៊ូ ស៊ីរីកា ក៏បានបានអំពាវនាវដល់ប្រមុខថ្នាក់ដឹកនាំឱ្យរកយុតិ្តធម៌យ៉ាងពិតប្រាដក ពីប្រព័ន្ធតុលាការ ព្រោះថារឿងក្តីនេះ កំពុងដំណើរការដល់សាលាឧទ្ធរណ៍ ក៏ប៉ុន្តែងមិននៅទាន់ទទួលបានយុតិ្តធម៌សម្រាបរូបនាងនៅឡើយ ។
ស៊ូ ស៊ីរីកា មានអំពាវនាវដល់ប្រមុខថ្នាក់ដឹកអស់ឱ្យជួយរកយុតិ្តធម៌ដល់រូបនាង ព្រោះពេលនេះ នាង កំពុងតែមានជីវភាពលំបាកខ្លាំង ។ បើតាមតារាចម្រៀងរូបនេះ តាំងពីកើតរហូតដល់ដឹងក្ដី នាងបានរស់នៅក្រោមការមើលថែទាំយ៉ាងល្អបំផុតពីជីដូនលោកស្រី កែវ មន្ថា ប្រៀបបានទៅនឹងម្ដាយកូនដូច្នេះដែរ ។ ជីដូនរបស់នាងបានផ្គត់ផ្គង់គ្រប់បែបយ៉ាង សូម្បីតែលុយដែលនាងរកបានពីការច្រៀងកន្លងមក ក៏ផ្ញើជាមួយជីដូនជាអ្នកទុកដាក់ឱ្យដែរ ។
ប៉ុន្តែបន្ទាប់លោកស្រី កែវ មន្ថា បានទទួលអនិច្ចកម្មទៅមិនបានប៉ុន្មាន ទ្រព្យសម្បត្តិយ៉ាងឡាយ ដែលជី ដូនទិញជាអំណោយទាំងអស់ ត្រូវបានដកហូតដូចជារថយន្ត ខុនដូ សូម្បីតែផ្ទះវីឡាដែលធ្លាប់ រួមរស់ជាមួយជីដូនរហូតមក ក៏ត្រូវបានស្វាមីរបស់ជីដូនបណ្ដេញចេញដែរ រួមជាមួយនឹងសមាជិកដទៃទៀត ។
ស៊ូ ស៊ីរីកា បញ្ជាក់ថា៖ «ខ្ញុំបាត់បង់គ្រប់យ៉ាង ពេលអត់ពីម៉ាក់យាយទៅ សូម្បីតែកន្លែងជ្រកកោន ហើយដែលខ្ញុំស្ងាត់កន្លងមក ព្រោះតែរឿងនេះ ។ ខ្ញុំចង់បានអ្វីដែលតាមបណ្តាំរបស់ម៉ាក់យាយផ្តល់ឲ្យខ្ញុំមិនចង់បានរបស់គេនោះទេ ហើយសុំតែយុត្តិធម៌បានហើយ»។
គួររំលឹកដែរថា កាលពីថ្មីៗកន្លងទៅនេះ ក្រុមគ្រួសាររបស់តារាកំប្លែងអ្នកស្រី ទូច ក៏ធ្លាប់បានចេញមកទម្លាយភាពអយុត្តិធម៌ជាមួយបងប្អូនចំនួន១៤នាក់ ពាក់ព័ន្ធរឿងទំនាស់មរតក ដែលលោកស្រី កែវ មន្ថា បានបន្សល់ទុកតាមរយៈមេធាវីផ្ទាល់ដោយបែងចែក ទ្រព្យសម្បត្តិ មួយចំណែកទៅឱ្យកូនៗនិងចៅដែលរួមរស់ជាមួយបន្ទាប់ពីលោកស្រីទទួលមរណភាពទៅ ។
ប៉ុន្តែបើតាមអ្នកស្រី ជុំ រស្មី ហៅស្រីទូច បានបញ្ជាក់ថា ស្វាមី(ប្តីលោកស្រីកែវ មន្ថា) របស់ខ្លួនពុំបានបំពេញតាមលិខិតបណ្ដាំនោះទេ ព្រមទាំងបានផ្ទេរអចលនទ្រព្យមួយចំនួនទៅឱ្យកូនៗរបស់ខ្លួន ហើយពុំបានអើពើដោះស្រាយតាមបណ្ដាំមរតកម្ដាយ ឬរកដំណោះស្រាយណាមួយសមរម្យនោះឡើយ ។ នៅពេលឃើញទង្វើបែបនេះទើបអ្នកស្រី និងបងប្អូន និងក្មួយស្រី ស៊ូ ស៊ីរីកា សម្រេច គ្នាដាក់ពាក្យបណ្ដឹងទៅតុលាការ ខណៈការសម្រេចរបស់សាលាដំបូងអ្នកស្រី និងគ្រួសារមិនអាចទទួលយកបាន ទើបបន្តទៅដល់សាលាឧទ្ធរណ៍ ។
មានព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ