ពលរដ្ឋខ្មែរបានបន្តចាកចេញទៅព្យាបាលជំងឺនៅប្រទេសជិតខាងកម្ពុជាមានប្រទេសថៃជាដើមរាប់សិបនាក់នៅក្នុងមួយថ្ងៃៗ ។ ការចាកចេញទៅព្យាបាលនៅក្រៅប្រទេសរបស់ពលរដ្ឋ បានចំណាយថវិការាប់រយដុល្លារដល់ពាន់ដុល្លារនៅក្នុងមួយលើកមួយៗ ។
កាលពីចុងសប្តាហ៍មុននេះ មានពលរដ្ឋទៅព្យាបាលនៅប្រទេសថៃប្រមាណ៣០នាក់ គ្រាន់តែ តាមរយៈជើងយន្តហោះមួយ ។ នៅពេលយន្តហោះចុះចតក្នុងព្រលានអន្តរជាតិសុវណ្ណភូមិ ក្រុមអ្នកមកទទួលអ្នកជំងឺខ្មែរបានស្វាគមន៍អ្នកជំងឺដោយរទេះរុញ និងលើកស្លាកឈ្មោះ យ៉ាងព្រោងព្រាតនៅលើផ្លូវធ្វើដំណើរក្នុងព្រលានយន្តអន្តរជាតិរបស់ប្រទេសថៃ ។
![](https://kohsantepheapdaily.com.kh/wp-content/uploads/2024/03/46744deb66f9341e4f2cf29fc1ea5a31.png)
ពលរដ្ឋបានចេញទៅព្យាបាលជំងឺនៅប្រទេសថៃ មានអ្នកចាកចេញទៅព្យាបាលជាប្រចាំខែ ឬ តាមការកំណត់របស់វេជ្ជបណ្ឌិត ។ ពលរដ្ឋប្រភេទនេះជាអ្នកមានជំងឺប្រចាំកាយដែលត្រូវ ព្យាបាលរយៈពេលវែង ហើយពួកគាត់ត្រូវគេយករទេះរុញមកទទួល ។ ចំណែកពលរដ្ឋមួយប្រភេទទៀតចេញទៅព្យាបាលនៅប្រទេសគេ ដោយភ្ជាប់ជាមួយដំណើរទេសចរណ៍តែម្តង ។ ក្នុងលក្ខខណ្ឌនេះ មានពលរដ្ឋខ្លះទៅពិនិត្យសុខភាពលើកដំបូង និងមានអ្នកខ្លះទៀតធ្លាប់ទៅពិនិត្យម្តងឬពីរដងហើយ ក៏បានបន្តទៅពិនិត្យម្តងទៀត ក្រោយរយៈពេលកន្លះឆ្នាំ ឬមួយឆ្នាំ ។ មានអ្នកខ្លះលើកមុនទៅពិនិត្យព្យាបាលជំងឺតែម្នាក់ឯង ហើយលើកនេះទៅពិនិត្យនាំទាំងស្វាមី នាំទាំងភរិយា ឬបន្ថែមសមាជិកគ្រួសារម្នាក់ពីរទៅចាយលុយលើសេវាពេទ្យនៅស្រុកគេ ។
ពលរដ្ឋចេញទៅពិនិត្យព្យាបាលជំងឺនៅប្រទេសថៃ ខ្លះត្រូវទៅពិនិត្យនៅមន្ទីរពេទ្យរដ្ឋ និងមានអ្នកខ្លះទៅពិនិត្យព្យាបាលជំងឺនៅមន្ទីរពេទ្យឯកជន ។ ពលរដ្ឋខ្លះចេញទៅពិនិត្យនៅតាមខេត្តនានារបស់ប្រទេសថៃជាប់ព្រំដែនកម្ពុជា និងមានពលរដ្ឋមួយចំនួនទៅព្យាបាលនៅក្នុងមន្ទីរពេទ្យក្រុងបាងកក ប្រទេសថៃ ។
![](https://kohsantepheapdaily.com.kh/wp-content/uploads/2024/03/b1f3f96cc198d8a6dd6abca8dbeaaad3.jpg)
ការចេញទៅព្យាបាលជំងឺនៅប្រទេសថៃ ក្នុងនាមជាជនបរទេស ពលរដ្ឋត្រូវចំណាយថវិកា លើសពីពលរដ្ឋថៃម្ចាស់ស្រុក ។ ក្រៅពីនេះ ពលរដ្ឋត្រូវចំណាយថវិកាលើការធ្វើដំណើរស្នាក់ និងហូបចុកជាដើម ។ អ្នកខ្លះទៅព្យាបាលជំងឺសម្រាកនៅស្រុកគេមួយយប់ ខ្លះពីរយប់ ហើយមានអ្នកខ្លះត្រូវសម្រាកមួយសប្តាហ៍ ឬពីរសប្តាហ៍ក៏មាន ។
ពលរដ្ឋខ្មែរចេញទៅព្យាបាលនៅប្រទេសគេ តែងស្វែងសណ្ឋាគារស្នាក់នៅជិតៗមន្ទីរពេទ្យ ដើម្បីងាយស្រួលធ្វើដំណើរ ។ នៅមន្ទីរពេទ្យ ដើម្បីទំនាក់ទំនងជាគ្រូពេទ្យ ពលរដ្ឋខ្មែរត្រូវរក សេវាអ្នកបកប្រែភាសាថៃ ។ គ្រូពេទ្យថៃ ហាក់មិនចង់និយាយភាសាអង់គ្លេស ។ ពួកគេបាន ព្យាយាមឱ្យអ្នកជំងឺស្វែងរកសេវាបកប្រែ ។ អ្នករកស៊ីបកប្រែភាគច្រើនជាពលរដ្ឋខ្មែរ ដែលបានចេញទៅរស់នៅប្រទេសថៃយូរឆ្នាំ ។ បកប្រែជូនអ្នកជំងឺម្នាក់ថ្លៃ៥០០បាតក្នុងមួយពេល ។
![](https://kohsantepheapdaily.com.kh/wp-content/uploads/2024/03/8c916d5211edd79646eec339b94fb3d7.jpg)
លោកសុផល ពលរដ្ឋខ្មែរចេញទៅពិនិត្យជំងឺនៅប្រទេសថៃ ជាលើកដំបូង កាលពីសប្តាហ៍មុន បាននិយាយថា លោកមានជំងឺក្រពះដែលទទួលការព្យាបាលនៅក្នុងស្រុក មិនជាសះស្បើយ នៅក្នុងរយៈពេល៥ខែមកហើយ ។ ដូច្នេះកាលពីចុងសប្តាហ៍មុនលោកសម្រេចចិត្តទៅពិនិត្យ ព្យាបាលនៅប្រទេសថៃម្តង ។
មន្ត្រីរាជការម្នាក់នេះ និយាយថា នេះជាលើកទី១ ដែលលោកចេញទៅព្យាបាលជំងឺនៅ ប្រទេសថៃ ។ នៅក្នុងមន្ទីរពេទ្យឯកជនមួយនាទីក្រុងបាងកក លោកបានជួបពលរដ្ឋខ្មែរជាង២០នាក់បានចេញធ្វើដំណើរទៅដល់មន្ទីរពេទ្យនោះដើម្បីព្យាបាលជំងឺ ។ លោកថា ក្នុង ចំណោមពលរដ្ឋខ្មែរទាំងនោះមានអការៈជំងឺផ្សេងៗគ្នា ។ ខ្លះឈឺក្រពះ ខ្លះលើសឈាម ស្ពឹកដៃស្ពឹកជើង ខ្លះរោគស្ត្រីជាដើម។
ពលរដ្ឋខ្មែរដែលបានចេញទៅព្យាបាលនៅប្រទេសថៃ និយាយថា ដោយសារមានពលរដ្ឋខ្មែរជាច្រើននាក់បានចេញទៅព្យាបាលនៅក្នុងមន្ទីរពេទ្យនោះជាប្រចាំមន្ទីរពេទ្យបានប្រើប្រាស់ភាសាខ្មែរបន្ទាប់ពីភាសាថៃ ។ នៅតាមបន្ទប់ និងនៅតាមអគារកន្លែងពិនិត្យជំងឺ គេបានប្រើអក្សរខ្មែរសម្រាប់អ្នកជំងឺខ្មែរងាយស្រួល ។ គ្រូពេទ្យមួយចំនួនចេះភាសាខ្មែរមួយម៉ាត់ៗ ហើយបានព្យាយាមនិយាយមកកាន់អ្នកជំងឺ ។
![](https://kohsantepheapdaily.com.kh/wp-content/uploads/2024/03/e1f15270710a3052140bfe547729fd38.jpeg)
ក្រៅពីការលើកអក្សរខ្មែរជាស្លាកសម្គាល់ សូម្បីនៅលើវេជ្ជបញ្ជា និងសំបកថ្នាំក៏ប្រើប្រាស់អក្សរខ្មែរដែរ ។ ដូចជា ថាថ្នាំនេះត្រូវលេបប៉ុន្មានដងក្នុងមួយថ្ងៃ និងប៉ុន្មានគ្រាប់ក្នុងមួយដងជា ដើម ។ តាមប្រភពអ្នកជំងឺ ដែលបានចេញទៅព្យាបាលនៅប្រទេសថៃ អះអាងថាការចេញទៅ ព្យាបាលជំងឺនៅស្រុកគេបានចំណាយថវិកាច្រើន ។ លោកសុផល បានណាយថវិកាប្រមាណ ១ពាន់ដុល្លារ នៅក្នុងការពិនិត្យសួត ក្រពះ ពោះវៀន និងទ្វារលាមក ។
ប្រភពពីអ្នកជំងឺខាងលើថា លោកត្រូវបានគ្រូពេទ្យថៃស្នើឱ្យពិនិត្យបន្តលើសពីអ្វីដែលលោកបានពិនិត្យដើម្បីស្វែងរកប្រភពជំងឺក្រពះរបស់លោក ប៉ុន្តែលោកបដិសេធធ្វើតាមដោយសារ លោកគិតថា មានតម្លៃថ្លៃពេក ។ តាមអ្នកជំងឺខាងលើថា ការចេញទៅព្យាបាលជំងឺនៅស្រុកគេ ពិតជាត្រូវចំណាយថវិកាច្រើន ហើយការស្នាក់នៅ និងហូបចុកនៅក្នុងប្រទេសពេលអំឡុងពេលព្យាបាលជំងឺក៏ច្រើន ។ ដូច្នេះ ការចេញទៅព្យាបាលនៅប្រទេសថៃការចំណាយមិនធម្មតានោះទេ ។ លោកថា ជំងឺល្មមៗ ចំណាយមិនតិចជាង១ពាន់ដុល្លារឡើយគ្រាន់តែថ្លៃពេទ្យ ។
ជាទូទៅលោកសង្កេតឃើញថា ដើម្បីសន្សំថវិកាទុកព្យបាលជំងឺពលរដ្ឋខ្មែរត្បិតត្បៀតលើការស្នាក់នៅការធ្វើដំណើរ និងការហូបចុកដើម្បីទុកលុយចំណាយដ៏ច្រើនលើថ្លៃពេទ្យ៕
ចែករំលែកព័តមាននេះ